Gbò nen á ne fã̀ gã́bug gbò ńbàlì lọ̀l gé tṍó e ba beè dààmà togó gè tõó boo kunukẽ̀í. Sõò, Kpá Káí kọ́ọ̀ à íe áá tẽ̀ènè kà Bàrì ea dì ea “palàge bọọ èl kọ̀láá kà gbò ńbàlì.” (2 Krónikòl 2:5) Níà mée ẽ́? Vaá éé ní ea náa kọọ̀ ẹlẹ á bọọ èl dénè dõòna kà gbò ńbàlì e gbò nen gé fã ẽ́? Mm̀ nakà nu gè nòí, èé nó nú e nakà Bàrìí gbĩ́ kọ ó nyimá ea kilìè é ló.

1. Béè Bàrì kọlà vàẹ, vaá éé ní ea náa èé láá àgala boo kọọ̀ à gbĩ́ kọ é nyimàè a bée é?

Bàrì tú a lóó tẹlẹ bàlà kẽ nèi mm̀ Kpá Káí. À kọ́ọ̀: “Nda ní em dúù Jìhóvà ẹ. Níà ńdáà bée é.” (Bugi Àìzáíà 42:5, 8.) À dú gè tàb “Jìhóvà” lọl ló moǹ bel Híbrù ea tõó dọ̀ “Ẹlẹ Ólò Naa Kọ Á Naaá.” Jìhóvà gbĩ́ kọ é nyimàè a bée. (Ẹ́xọdọ̀s 3:15) Éé ní ea náa èé láá àgala boo naa vó é? Béè Bàrì ẽ́á mm̀ Kpá Káí nú ea sígá ló 7,000 tóm! a Jìhóvà ní ea dú béè “kà kà Bàrì ea di káála nè boo kunukẽ̀í ẽ́.”—Dìtolónomì 4:39.

2. Éé ní e Kpá Káí kọ́ nèi ea kil ló Jìhóvà ẹ?

Kpá Káí kọ́ọ̀ áá Jìhóvà ní ea dú kà kà Bàrì zẹ̀ẹ̀ dénè gbò ńbàlì e gbò nen ólò fã̀e. Ló éé? À íe gã́bug nú ea náa vaá à dì naa vó. Jìhóvà ní ea íe lẹ̀ẹ̀là bel ea bọọ lọ̀l vaá à lee é, vaá ẹlẹ ní ea “Bọọ Lọ̀l Vaá À Lee boo zivèkà kunukẽ̀í ẽ́.” (Bugi Psalm 83:18.) Kpá Káí kólíe “Bàrì ea íe dénè lẹ̀ẹ̀là bel” boo béè kọọ̀ à íe kpóó gè naamá kọ̀láá kà nú ea gbĩ́ gè naa. Ẹlẹ ní ea beè “dèm dénè nu ẽ́,” ea dú bàlà booí nè dénè nú ea di dùm boo kunukẽ̀í. (Kùùà Nù 4:8, 11) Áá Jìhóvà ní e bè náa íe dààà togó é, vaá àé di dọ̀ọ̀mà dè-dè.—Psalm 90:2.

 4. Jìhóvà gbĩ́ kọ ó nyimàè a bée nè ge olòó tú kolmàèe

5. Jìhóvà gbĩ́ kọọ̀ ó duè a kóò

 NÚ E NI NÓ

Jìhóvà ní ea dú béè kà kà Bàrì e. À gbĩ́ kọ é nyimàè a bée vaá tú kolmàèe kọbé è láá tõo bãèé ló.

Ge Òòa Boo

• Éé ní ea náa kọọ̀ Jìhóvà á dú kele ló dõòna kà gbò ńbàlì e gbò nen ólò fã̀e?

• Éé ní ea náa vaá à bọ́ló kọ é kolí béè Bàrì e?

• Éé ní ea zógè kọọ̀ Jìhóvà gbĩ́ kọ ó tõonìè bãèé ló é?