ƝAAKWƐLƐI 04
Gbɛɛ ɓaa Yálá ?
Ə həɠə kpɔ yɛnɛɛ kɔwɔtɔɔ yələ ɓa ə həli la yiihu ɓa nukanŋaa da yálá huwu tamaa ɓatoo. Kɛlɛɛ Biblə a Yálá ta maamɛni ɓo yii ‘ gɛnɛ Yálá kəlee ɓa ’ (Tɔɔɓəlaa kɛmɛni veelɛ 2:4 [2:5, NWT]). Gbɛɛ ɓaa Ɲálái tii ? Ə lɛɛ lə mɛni ɓa gɛnɛi dɛɛ yálá takpɛliɠaa diɛ, diɛi nukanŋaa da kɛ di ɓatooi ? Ɲaakwɛlɛi ŋɛi hu, ə́ kaa pai gaai pələi Ɲálái tii a gbɔɔ lɛ la yɛ́.
1. Yálá laa ɓaa gbɛɛ, ə lɛɛ lə ɓə a nɛ yɛ ma gaa bɔ gu kɛ a naa kɔlɔnŋaa ?
Yálá a gbɔɔ lɛ guɔ Biblə hu. Gaa kɛi guɔ : “ Zehova ɓaa ɲáá. Náá katii ” (Esai 42:8, NWT). Hebreu-woo katii di ɉu woo pɛɛn diɛ kɛ ma “ Zehova. ” Naa tii mukulaa ɓaa “ yii lɔpee a kɛ bɔ ə gɛ a gɛ. ” Zehova kaa bɔ gu naa kɔlɔn. (Lɛɛ gbɔwɔ ɓa 3:15, NWT). Lə ɓə a nɛ yɛ ma gaa bɔ gu naa kɔlɔn. Biblə hu naa tii maamɛni ɓoɔ naa hee 7 000 da da a ! Ə lɛɛ Yálá, yai a ‘ Yálá kpɔkpɔ yələkɔlɔn ɉu, ə ma kɛ lɔi mɛi, yɛnɛɛ ɓɛ ’ ya ɓə Zehova laa tii kaa ma (Dɔ́n ɉɛɓɛ 4:39).
2. Lə ɓə Biblə a nɛ yɛ hwilɛn na Zehova ɓa ?
Biblə a mo yɛ ma ɲáláɠaai kpɔ nukanŋaa da matoo, Zehova yaa tɔnɔ gbən ɓə gaa a Yálá leelee. Lə mɛni ɓa Biblə a mo tii guɔ ? Biblə a yili ɓo mɛni tamaa maamɛni ɓa. Ŋaawooɓolaa ta ho laa gɛnɛ dɛɛ Zehova ŋɔ ŋaawooɓolaa ɓa ə lɛɛ yaa tɔnɔ gbən ɓə “ Hɛn Gəlee Mɛi, lɔi mɛi naa kəlee ” (Maatɛnɛ 83:18 ɓo, NWT). Gaa ɓaa “ Hééɓo kəlee Namu Yálá ” yili mukulaa ɓaa mɛni lɔpee a ɉəɠə ɉu yii yaan ə gɛ ɲee a pɛli ma. Ya ɓə “ hɛn gəlee pɛli ” yɛnɛɛ kəlee ə lɛɛ da nɔɔn-nɔɔn ɉɛn gəlee lɔi mɛi (Kulɔ ponoŋa hɛɓɛ 4:8, 11). Zehova nwɛi, ho yɛ nu lɔpee ta. Gaa wɔlɔ yɛnɛɛ a yələ kəlee ə lɛɛ gaa lɔ pai kɛi yɛnɛɛ a yələ kəlee (Maatɛnɛ 90:2).
Ə́ WƆ MƐNIKƆLƆNŊAA TA PƐLƐ MA
Yálá laa kaa tanɔn gbən. Gaa bələi naa tii kulɔbɔ kɛɛ la giliin naaɠaa diɛ. Ə lɛɛ gaa bələi ə naa lɛ la yɛ́ ə lɛɛ lə mɛni ɓa ə gɛ tii.
3. Kiliin naa tamaa kaa Yálá ɓa, kɛlɛɛ naa kaa lɔ tanɔn
Nu laa da nu kiliin naa ho tanɔn. VIDIO ŋɛi kaa, ə lɛɛ ka lono kɛ gɛɛmaalən ŋɛi mɛi.
-
Kiliin naaɠaa yɛ bələi “ Námu ” kaa la, lə ɓə a da laa leelee di kulɔbɔ kɛ ?
Biblə a mo yɛ ma nua da yálá tamaa ɓatoo ə ma kɛ námu tamaa. Maatɛnɛ 136:1-3 ɓo, ə lɛɛ ka lono kɛ gɛɛmaalən ŋɛi mɛi :
-
Gbɛɛ ɓaa “ yáláɠaa di wɔ Yálá ” ə lɛɛ “ tɔɔɓəlaa di wɔ Tɔɔmun ” ?
4. Zehova kaa bɔ ə́ naa kɔlɔn ə lɛɛ yɛ́ mo
Ə́ gɔlɔn ləi yɛ́ ma Zehova kaa bɔ ə́ naa kɔlɔn ? VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Ə́ wɔ kili ɓa Zehova kaa bɔ di naa kɔlɔn ? Lə mɛni ɓa ?
Zehova kaa bɔ nua di naa kɔlɔn. Biblə kaa kɛi ma : “ Nui lɔpee a Zehova təli a naa, maanui nwunmaa a ɓo ” (Romə 10:13, NWT). Ka lono kɛ gɛɛmaalənŋaa ŋɛi mɛi :
-
Zehova laa ɓo mɛni kaa a mɛni yii maamɛni wala-walaa kpɔ kɛnɛ, lə mɛni ɓa ?
-
Ə́ laa kili a lɛɛ nuta ŋa, ə lɛɛ yɛ ə́ təli la, lə ɓə yili a gɛ yɛ́ ?
-
Ya kɛi Zehova təli a naa, ə́ wɔ kili ɓa lə ɓə yili a gɛ ma ?
5. Zehova kaa bɔ ə́ kɛ a məlanmun
Cambodge nɛɛnu ta yii da kɛ ma Soten ə mo yɛ ma Yálá laa kɔlɔn mɛni ə kwəinɛɛ kɛnɛ tɛɛ bɔ yii ho ta kɛ da hɔlɔɓo li. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Vidio hu, lə ɓə Yálá laa kɔlɔn mɛni ə gɛ Soten ɓa ?
Gɛɛ hó kɛ a nuta məlanmun ya gbea nii naa kɔlɔn. Ɉakə 4:8a ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə ɓə Zehova kaa kɛi yɛ́ ə́ gɛ ?
-
Ya kɛ a Yálá laa kɔlɔnŋaa ə lɛɛ ya kɛi naa ɓo, yili a kpɔnmaa tɛɛ ləi ə́ pɔ ə́ gaa yɛ́ ma ə́ maalɛɠɛɛ ma ?
NUTAƓAA DA KƐ KƐI MA : “ Yálá kaa lɔ tanɔn, yili ɓa pələi lɔpee nu ya kɛ bɔ ya dəli la. ”
-
Ə́ laana yɛ́ ma Yálá laa ɓaa Zehova ?
-
Ya pɛli nɛi ləi nuta ɓa yɛ́ ma Yálá kaa bɔ gu kɛ dəlii a naa ?
YII GU GALAN
Yálá kpɔkpɔ laa ɓaa Zehova, gaa bɔ gu naa kɔlɔn ə lɛɛ guɔ mo yii yaan gu kɛ a məlanmun.
Nɛɛ ə́ kili pɔ
-
Zehova da ɲálá takpɛliɠaai nua da kɛ di ɓatooi, lə ɓə a di kulɔbɔ kɛ ?
-
Lə mɛni ɓa maanɛɛ guɔ Yálá laa ɓo ?
-
Lə ɓə a nɛ yɛ ma Zehova kaa bɔ ə́ kɛ a məlanmun ?
MƐNI TAKPƐLIƓAA
Mɛniɠaai da gɛ gu laana kpɔ a neelee guɔ ma Yálá kaa laa, nɔɔli kaa.
“ Yálá kaa laa kpɔ a neelee ? ” (Hɛɓɛ yii gaa gwɛli yɛli ɓa)
Yálá ŋɔ yɛnɛɛ kɔwɔtɔɔi ho ma, lə mɛni ɓa yili hwa nu kwəi pili ma ?
Lə mɛni ɓa maanɛɛ guɔ Yálá laa ɓo, bələi ma gu ho gɔlɔn na bələi di kɛi naa tii ɓo la toloo.
Bələi lɔpee gu ma Yálá təli la, yili kaa mɔɔn a mɛni ta ? Gaa lə mɛni ɓa gwa pɛli gu mo guɔ ma, laa tɔnɔ gbən ɓə gaa ma.
a Ya kɛ bɔ ə́ mɛni takpɛliɠaa kɔlɔn yɛ hwilɛn na Yálá laa mukulaa ɓa ə lɛɛ lə mɛni ɓa Biblə huwoo pɛɛn takpɛliɠaa di naa tii kulɔ Biblə hu, La Bible Traduction du monde nouveau hu kaa ɓɛi ŋɛi gaa laa pɛɛn ni Appendice A4.
