LEKSION 04
Sin-o ang Dios?
Halin sang una, ang mga tawo nagasimba sa madamo nga dios kag diosa. Pero ang Biblia nagasiling nga may isa lang ka Dios kag ‘mas gamhanan sia sangsa iban nga mga dios.’ (2 Cronica 2:5) Sin-o sia? Kag ngaa mas gamhanan sia sangsa iban nga dios nga ginasimba sang mga tawo? Sa sini nga leksion, matun-an mo kon paano ginapakilala sang Dios ang iya kaugalingon sa imo.
1. Ano ang ngalan sang Dios, kag paano kita makasiguro nga gusto niya nga mabal-an naton ini?
Ginapakilala sang Dios ang iya kaugalingon sa aton sa Biblia. Nagsiling sia: “Ako si Jehova. Amo ina ang akon ngalan.” (Basaha ang Isaias 42:5, 8.) Ang “Jehova” amo ang translation sang isa ka Hebreo nga ngalan, nga suno sa madamo nga iskolar nagakahulugan sing “Ginapahanabo Niya nga Mangin Amo.” Gusto ni Jehova nga mahibaluan naton ang iya ngalan. (Exodo 3:15) Ngaa makasiguro kita sina? Ginpasulat niya sa Biblia ang iya ngalan sing sobra 7,000 ka beses! a Ang ngalan nga Jehova para lang gid sa “matuod nga Dios sa langit kag sa duta.”—Deuteronomio 4:39.
2. Ano ang ginasugid sang Biblia parte kay Jehova?
Ang Biblia nagasiling nga sa tanan nga dios nga ginasimba sang mga tawo, si Jehova lang gid ang matuod nga Dios. Ngaa? Ari ang pila ka rason. Si Jehova ang may pinakamataas nga posisyon kag sia lamang “ang Labing Mataas sa bug-os nga duta.” (Basaha ang Salmo 83:18.) Sia ang “Labing Gamhanan,” buot silingon may gahom sia nga himuon ang bisan ano nga gusto niya. Sia man ang ‘nagtuga sang tanan nga butang’—lakip ang uniberso kag ang tanan nga buhi nga butang sa duta. (Bugna 4:8, 11) Indi sia pareho sa aton, kay si Jehova wala sing ginsuguran kag wala man sing katapusan.—Salmo 90:2.
USISAA PA GID
Hibaluon naton kon ano ang kinalain sang mga titulo sang Dios sa iya pinasahi nga ngalan. Dayon usisaon naton kon paano kag kon ngaa ginpakilala niya ang iya ngalan sa imo.
3. Ang Dios madamo sing titulo pero isa lang ang iya ngalan
Para mabal-an mo kon ngaa lain ang titulo sang tawo sa iya ngalan, tan-awa ang VIDEO, dayon binagbinaga ang masunod nga pamangkot.
-
Ngaa lain ang titulo, pareho sang “Ginuo,” sa ngalan?
Ang Biblia nagasiling nga ang mga tawo nagasimba sa madamo nga dios kag ginuo. Basaha ang Salmo 136:1-3, dayon binagbinaga ini nga pamangkot:
-
Sin-o ang “Dios sang mga dios” kag “Ginuo sang mga ginuo”?
4. Gusto ni Jehova nga mabal-an mo ang iya ngalan kag gamiton ini
Ngaa makasiling ka nga gusto ni Jehova nga mabal-an mo ang iya ngalan? Tan-awa ang VIDEO, dayon binagbinaga ang masunod nga mga pamangkot.
-
Sa banta mo, gusto ni Jehova nga isugid ang iya ngalan? Ngaa?
Gusto ni Jehova nga tawgon sia sang mga tawo sa iya ngalan. Basaha ang Roma 10:13, dayon binagbinaga ini nga mga pamangkot:
-
Ngaa importante nga tawgon naton ang Dios sa iya ngalan nga Jehova?
-
Ano ang batyagon mo kon nadumduman ka sang isa ka tawo kag gintawag ka niya sa imo ngalan?
-
Sa banta mo, ano ang ginabatyag ni Jehova kon tawgon mo sia sa iya ngalan?
5. Gusto ni Jehova nga mangin malapit ka sa iya
Ang isa ka babayi nga taga-Cambodia nga si Soten nagsiling nga grabe gid ang iya kalipay sang nabal-an niya ang ngalan sang Dios. Tan-awa ang VIDEO, dayon binagbinaga ang masunod nga pamangkot.
-
Sa video, ano pa gid ang gusto himuon ni Soten sang nabal-an niya ang ngalan sang Dios?
Antes mo mangin abyan ang isa, dapat mabal-an mo anay ang iya ngalan. Basaha ang Santiago 4:8a, dayon binagbinaga ini nga mga pamangkot:
-
Ano ang gusto ni Jehova nga himuon mo?
-
Sa banta mo, mangin malapit ka sa Dios kon mabal-an mo ang iya ngalan kag ginagamit ini?
KON MAGSILING ANG IBAN: “Isa man lang ang Dios, ti indi na importante kon ano ang pagtawag mo sa iya.”
-
Nagapati ka bala nga Jehova ang ngalan sang Dios?
-
Ngaa gusto sang Dios nga tawgon naton sia sa iya ngalan?
SUMARYO
Isa lang gid ang matuod nga Dios, kag ang iya ngalan amo si Jehova. Gusto niya nga mabal-an naton ang iya ngalan kag tawgon naton sia sa sini para mangin malapit kita sa iya.
Rebyu
-
Ngaa si Jehova lain gid sa tanan nga dios nga ginasimba sang mga tawo?
-
Ngaa dapat naton tawgon ang Dios sa iya ngalan?
-
Ngaa masiling mo nga gusto ni Jehova nga mangin malapit ka sa iya?
DUGANG NGA IMPORMASYON
Basaha ang lima ka ebidensia nga may ara gid sang Dios.
Binagbinaga kon ngaa mapatihan nga ang Dios wala sing ginsuguran kag wala sing katapusan.
“Sin-o ang Nagtuga sa Dios?” (Ang Lalantawan, Agosto 1, 2014)
Basaha kon ngaa dapat naton gamiton ang ngalan sang Dios, bisan pa wala sing nakahibalo kon paano ini ginamitlang sang una.
Importante bala kon ano ang pagtawag naton sa Dios? Hibalua kon ngaa isa lang gid ang iya ngalan.
a Para sa dugang nga impormasyon parte sa kahulugan sang ngalan sang Dios kag kon ngaa ginkuha ini sang pila ka translation sang Biblia, tan-awa ang Apendise A4 sa Bag-ong Kalibutan nga Badbad sang Balaan nga Kasulatan.
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
