EHONGWA 04
Hapo Mukuru ouṋe?
Okuza kombutiro ovandu ve rikotamena koomukuru ovengi. Posi yokutja, Ombeibela i hungira ohunga na Mukuru umwe ngu ri “omunene pomukuru warwe ngamwa.” (2 Ekuruhungi 2:5) Eye ouṋe? Nu otjikeṋa tji tji tjita kutja ma rire omunene poomukuru varwe ovandu ku ve rikotamena? Mehongwa ndi, mo rihongo oviṋa Mukuru mbye vanga kutja u tjiwe ohunga na ye.
1. Ena ra Mukuru otjikwaye, nu matu yenene okutjiwa vi kutja eye u vanga kutja tu ri tjiwe?
MOmbeibela Mukuru u ritjiukisa omuini ku eṱe. Ombeibela i tja: “Jehova, ena roje oraaruhe.” (Epsalme 135:13, EEP) “Jehova” ena nda za kOtjiheberi ndi heya kutja “Eye ma yenenisa ondando ngamwa aihe ndje ripurire ko.” Jehova u vanga kutja tu tjiwe ena re. (Eksodus 3:15) Hapo matu tjiwa vi? MOmbeibela ena ra Mukuru ri munika povikando mbi ri kombanda 7 000. a Ena ndi Jehova ora ‘Muhona ngu ri Ndjambi erike, meyuru na kombanda yehi.’—Deuteronomium 4:39.
2. Ombeibela i tu raera tjike ohunga na Jehova?
Ombeibela i tja mokati koomukuru avehe ovandu ku ve rikotamena ko, Jehova ongu ri Mukuru watjiri erike. Omena raye? Mena rokutja Jehova ongu nousemba wokuhonapara, neye erike ongu ri “owOkombandambanda yehi arihe.” (Lesa Epsalme 83:18.) Eye ongu ri “Omunamasaaehe,” pu mape hee kutja eye u nomasa wokutjita otjiṋa ngamwa atjihe tji ma vanga okutjita. Eye “wa uta oviṋa avihe,” na yandja omuinyo ku avihe kombanda yehi. (Omavandururiro 4:8, 11) Jehova wa ri ko rukuru neye ma karerere nga aruhe.—Epsalme 90:2.
KONḒONONA OUKOTO
Konḓonona ombangu ndji ri pokati komana wa Mukuru wondjozikiro nena re rapeke. Okuzambo u tjiwe kutja omomuano uṋe nu ongwaye tja tjivisa ena re kove.
3. Mukuru u nomaisaneno omengi wondjozikiro, posi yokutja eye u nena rimwe uriri
Kutja u mune ombangu pokati kena romundu rondjozikiro nena re omuini, nyanda OKAVIDIO, nu okuzambo hungirira kepuriro ndi mari kongorere mba.
-
Pe nombangu yaye pokati kena rondjozikiro tjimuna “Muhona,” nena romundu omuini?
Ombeibela i tja ovandu ve rikotamena koomukuru novahona ovengi. Lesa Epsalme 136:1-3, nu okuzambo hungirira kepuriro ndi:
-
Ouṋe ngu ri ‘Ndjambi omunene tjinene poomukuru avehe’ na “Muhona ngu ri omunamasa tjinene povanauvara avehe”?
4. Jehova u vanga kutja u tjiwe nokuungurisa ena re
Hapo mo tjiwa vi kutja Jehova u vanga kutja u tjiwe ena re? Nyanda OKAVIDIO, nu okuzambo hungirira komapuriro ngu maye kongorere kehi mba.
-
Mo munu kutja Jehova u vanga kutja ena re ri tjiukwe? Omena raye?
Jehova u vanga kutja ovandu ve ungurise ena re. Lesa Oviungura 2:21, nu okuzambo hungirira komapuriro nga:
-
Ongwaye tje ri ohepero okuungurisa ena ra Mukuru, Jehova?
-
Hapo ove u kara noumune uṋe indu omundu tja zemburuka ena roye ne ri ungurisa?
-
Mo munu kutja Jehova u kara noumune uṋe indu ove tji mo ungurisa ena re?
5. Jehova u vanga kutja u rire epanga re
Omukazendu ngwa za kehi ndi Cambodia wena Soten wa tja okurihonga ohunga nena ra Mukuru kwe mu vatera “okukara nondjoroka tjinene.” Nyanda OKAVIDIO, nu okuzambo hungirira kepuriro ndi mari kongorere kehi mba.
-
Mokavidio, Soten wa ṱunwa vi indu tje rihonga ena ra Mukuru?
Ngunda au hi ya rira epanga romundu, ove rutenga mo sokutjiwa ena re. Lesa Jakobus 4:8, nu okuzambo hungirira komapuriro nga:
-
Jehova u ku ṋanga kutja u tjite vi?
-
Okutjiwa nokuungurisa ena ra Jehova maku ku vatere vi okutumbuka popezu na ye?
OVANDU TJIVA VE TJA: “Ku nOmuute umwe uriri, kainatja kutja u mu isana vi.”
-
Hapo ove u nongamburiro kutja Jehova ena ra Mukuru?
-
Hapo ove mo kahurura vi kutja Jehova u vanga kutja tu ungurise ena re?
OKUYARUKIRA PO OUSUPI
Jehova ondi ri ena ra Mukuru umwe watjiri. Eye u vanga kutja tu tjiwe nokuungurisa ena ndo kokutja tu tumbuke popezu na ye.
Okurizemburukisa
-
Hapo Jehova wa panguka vi koomukuru varwe ovandu ku ve rikotamena?
-
Omena raye tji tu sokuungurisa ena ra Mukuru?
-
Otjikeṋa tji tji raisa kutja Jehova u vanga kutja u tumbuke popezu na ye?
RIHONGA OVINGI
Konḓonona omiano vitano mbi mavi raisa kutja Mukuru okeri tjiri.
Omena raye tji matu sokukambura kutja Mukuru okari aruhe?
Rihonga kutja omena raye tji twa sokuungurisa ena ra Mukuru, nandarire kutja katu nokutjiwa kutja ena ndo aari isanewa vi.
Hapo ohepero okutjiwa kutja Mukuru tu mu isana vi? Tara kutja omena raye tji matu tja eye u nena rimwe uriri.
a Tji mo vanga ondjivisiro yokomurungu ohunga nomaheero wena ra Mukuru nokutja ongwaye ozOmbeibela tjiva tji za isa mo ena ndo, lesa okambo nga “Okambo Kokukonḓonona Embo raMukuru” pomukuma 1-5, ku ke ri ko jw.org.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
