ƐLĀ Ō NWU ƆMƐ 04
Ɔnyɛ Nɛ Ɔwɔico Wɛ A?
Ŋmiifi nɛ alɛɛcɛ humayi lā oyeeyi ipu ɛcɛ nyā, é gē gba aɔwɔ ɛyɛɛyɛyi ɛ̄gbā. Naana kpɔ a, Ubáyíbu kɛla lɛyikwu Ɔwɔ nōo “lɔfú fíyɛ́ ɔwɔ dóódu á.” (2 Úklɔ́ kú Aɔ́cɛ́ 2:5) Ɔnyɛ nɛ ó wɛ a? Ɔdi kē ya ɛɛ nɛ ó lɔfu fiyɛ ɛjɛɛji aɔwɔ ɔhá nɛ alɛɛcɛ gē gba ɛ̄gbā a? Ipu ɛlā ō nwu nyā, má ɔdā nɛ Ɔwɔico dɔka ku a jé lɛyikwu ɔ a.
1. Ɔdi wɛ iye ku Ɔwɔico a, ɛgɛnyá nɛ alɔ kē jé kpɔcii ka ó dɔka ku alɔ lɛ iye ku nu jé a?
Ipu Ubáyíbu Ɔwɔico da alɔ iye ku nu. Ó kahinii: “Ami nōo wɛ ami ā [Ujehofa].” (Jé Oōyɛbɛ̄ɛcɛ 3:14, ɛlā néē ta ahaajɛ a.) “Ujehófa” wɛ iye néē cɔwɔ ipu uce ku Uhibru nɛ ɛyi nu lɔfu wɛ kahinii: “Ami Nōo Wɛ Ami Ā.” Ujehofa dɔka ku alɔ jé iye ku nu. (Oōyɛbɛ̄ɛcɛ 3:15) Ɛgɛnyá nɛ alɔ lɔfu jé kpɔcii lɛ a? Ipu Ubáyíbu, iye ku nu bɛɛcɛ fiyɛ ɛga ula igwahaapa ce ofu igwo (7,000)! a Iye nōo le ka Ujehofa a wɛ iye ku ‘Ondu a nōo wɛ Ɔwɔico ku ɔkpanco mɛmla ɛcɛ a.’—Oblatūkíne 4:39.
2. Ɔdi nɛ Ubáyíbu da alɔ lɛyikwu Ujehofa a?
Ubáyíbu da alɔ ka ɛjɛɛji aɔwɔ nɛ alɛɛcɛ gē gba ɛ̄gbā a, Ujehofa foofunu wɛ Ɔwɔ ɔkwɛyi a. Ɔdiya a? Ó lɛ ɔdā alɛwa nōo ya. Ujehofa lɛ íkwu ku ɛjɛɛji odee a, anu foofunu kē wɛ “Óndú, nōo ī gbo odúúdú ɛcɛ kpɛ́mm á.” (Jé Aíjē Kú Ɛ̄gbā 83:18.) Anu “lɔfu fiyɛ́ dúú ā,” ɛnyā yɔ i mafu lɛ alɔ ka ó lɔfu ō ya ɔdā duuma nɛ ó dɔka ō ya. Anu “yá ɛjɛ̄ɛ̄jī odée á,” kwu ɔkpanco, ɛcɛ mla ɛjɛɛji aɔdā oyeeyi nōo yɔ ipu ɛcɛ a. (Ɔdā Nēé Mafú Lɛ Ujɔ́ni 4:8, 11) Anu foofunu i lɛ ō gbɔɔ ŋmaajɛ ŋ ma, ó kē gáā lɛ oŋmɛyi ŋ duu.—Aíjē Kú Ɛ̄gbā 90:2.
JÉ GƆBU
Nwu ɔdā nōo wɛ ɛyɛɛyɛyi ku icagba ku Ɔwɔico mla ɛnɛɛnɛ iye nɛ ó lé a. Alɔ klla géē nwu ɔdā nōo ya ɛɛ nɛ ó da alɔ iye ku nu a.
3. Ɔwɔico lɛ icagba alɛwa, amáŋ iye ku nu wɛ ekponu
O ya ɛɛ ku a má ɛyɛɛyɛyi ku icagba mla iye ku ɔcɛ abɔyinu a Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ɔdi wɛ ɛyɛɛyɛyi ku icagba bɛɛka “Ondu,” mla iye a?
Ubáyíbu ka ācɛ gē gba aɔwɔ mla ondu alɛwa ɛ̄gbā. Je Aíjē Kú Ɛ̄gbā 136:1-3, NW, cɛɛ ku aa kɔka lɛyikwu ɔka nyā:
-
Ɔnyɛ wɛ “Ɔwɔicō kú aɔ́wɔ” mla “Óndú kú aóndú” a?
4. Ujehofa dɔka ku a jé iye ku nu klla bi ɔ le yuklɔ
Ɔdi mafu ka Ujehofa dɔka ku a jé iye ku nu a? Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
A gbɛla ka Ujehofa dɔka ku ācɛ kéē jé iye nu? Ɔdiya?
Ujehofa dɔka ku ācɛ kéē bi iye ku nu le yuklɔ. Jé Ācɛ Uróm 10:13, NW, cɛɛ ku aa kɔka lɛyikwu aɔka nōo ba nyā:
-
Ɔdiya nōó cɛgbá ku alɔ bi iye ku Ɔwɔico nōo lé ka Ujehofa le yuklɔ a?
-
Abɔ ɔtu gē ya uwɔ lɛ ɔdaŋ ku ɔcɛ blakwu iye ku uwɔ klla bi ɔ le yuklɔ a?
-
Ɛgɛnyá nɛ a gbɛla ka ɔtu gē ya Ujehofa lɛ ɔdaŋ ku a bi iye ku nu le yuklɔ a?
5. Ujehofa dɔka ku a kwu piya ɔya ku nu
Ɔnyā éyi nōo ŋma u Cambodia nɛ iye nu lé ka u Soten a, ka ō wa i jé iye ku Ɔwɔico a wɛ ɔdā nōo cɛ lɛ anuɔ “gweeye fiyɛ duu ipu ɛcɛ nyā a” Lɛ UVIDIO nyā mafu, cɛɛ ku aa kɔka lɛyikwu ɔka nyā.
-
Ipu uvidio a, ɛgɛnyá nɛ ō jé iye ku Ɔwɔico lɛ abɔ kwu Soten iyē a?
Gbɔbu ɛɛ ku a jé piya oklobiya amāŋ ɔncɛnya ku ɔcɛ duuma, ɔdā aflɛyi nɛ a gē ya a wɛ ō lɛ iye ku ɔcɛ ɔɔma jé. Jé Ujɛ́mīsi 4:8a, cɛɛ ku aa kɔka lɛyikwu aɔka nōo ba nyā:
-
Ɔdi nɛ Ujehofa hi uwɔ igwú ku a gáā ya a?
-
Ɛgɛnyá nōo jé iye ku Ɔwɔico klla bi ɔ le yuklɔ géē ta uwɔ abɔ ku a tubla ɔ ajaajɛ a?
ĀCƐ ŌHĪ GĒ KA: “Ɔwɔico wɛ ekponu, a lɔfu hi Ɔwɔico iye duuma nōo he uwɔ ɔtu.”
-
A kpɔtuce ka Ujehofa wɛ iye ku Ɔwɔico a?
-
Ɛgɛnyá nɛ a géē je ɔ teyi peee ka Ɔwɔico dɔka ku alɔ bi iye ku nu le yuklɔ a?
ƆDI NƐ A NWU A?
Ujehofa wɛ iye ku Ɔwɔico ɔkwɛyi a. Ó dɔka ku alɔ lɛ iye ku nu jé klla bi ɔ le yuklɔ o ya ɛɛ ku alɔ tubla ɔ ajaajɛ.
Aɔka ō tu alɔ ɛlá kwu ɔdā nɛ alɔ nwu
-
Ɛgɛnyá nɛ Ujehofa wɛ ɛyɛɛyi gwu aɔwɔ ohile nɛ alɛɛcɛ gē gba ɛ̄gbā ta a?
-
Ɔdiya nɛ alɔ cika ō bi iye ku Ɔwɔico le yuklɔ a?
-
Ɔdi mafu ka Ujehofa dɔka ku a tubla ɔ ajaajɛ a?
JILA ƐLĀ NYĀ MÁ TŌŌTƆ̄Ɔ̄
Leyi yɛ ɛlá ō gbo ɛhɔ nōo mafu ka Ɔwɔico yɔ a.
Leyi má ɔdā nōo ya ɛɛ nɛ ō kpɔtuce ka Ɔwɔico i lɛ ō gbɔɔ ŋmaajɛ klla lɛ oŋmɛyi ŋ ma wɛ ɔdā okpaakpa a.
Nwu ɔdā nōo ya nɛ alɔ cika ō bi iye ku Ɔwɔico le yuklɔ, naana nɛ alɔ i jé ɛgɛ néē gē hi ɔ lɛ eko ku ikee a ŋ ma.
Iye nɛ alɔ gē hi Ɔwɔico a cɛgbá? Má ɔdā nōo ya nɛ alɔ ka ku Ɔwɔico lɛ iye ekponu a.
a O ya ɛɛ ku a jé odee lɛyikwu ɔdā nōo wɛ ɛyi ku iye ku Ɔwɔico tōōtɔ̄ɔ̄ mla ɔdā nōo ya ɛɛ nɛ ācɛ ōhī nōo cɔwɔ ku Ubáyíbu a je iye ku Ɔwɔico fu ŋma anu a, má u Appendix A4 ku New World Translation of the Holy Scriptures.
