ISI NKE 04
Ònye Bụ Chineke?
Ndị mmadụ na-efe ọtụtụ chi kemgbe ụwa. Ma, Baịbụl kwuru na e nwere Chi “karịrị chi ọ bụla ọzọ.” (2 Ihe E Mere 2:5) Ònye bụ Chi ahụ? Oleekwa otú o si kara chi ọzọ niile ndị mmadụ na-efe? N’isiokwu a, ị ga-amụta ihe Chi a chọrọ ka ị mara gbasara ya.
1. Gịnị bụ aha Chineke? Oleekwa otú anyị si mara na ọ chọrọ ka anyị mara aha ya?
Na Baịbụl, Chineke gwara anyị onye ọ bụ. Ọ sịrị: “Abụ m Jehova. Ọ bụ ya bụ aha m.” (Gụọ Aịzaya 42:5, 8.) “Jehova” bụ aha e si n’asụsụ Hibru nweta. Ọ ga-abụ na ọ pụtara “Ọ Na-eme Ka Ọ Bụrụ.” Jehova chọrọ ka anyị mara aha ya. (Ọpụpụ 3:15) Olee otú anyị si mara? O mere ka e dee aha ya ihe karịrị ugboro puku asaa na Baịbụl. a Jehova bụ aha onye bụ́ “ezi Chineke n’eluigwe nakwa n’ụwa.”—Diuterọnọmi 4:39.
2. Olee ihe Baịbụl gwara anyị gbasara Jehova?
Baịbụl gwara anyị na ọ bụ Jehova bụ naanị ezi Chineke n’ime chi niile ndị mmadụ na-efe. Maka gịnị? E nwere ọtụtụ ihe mere o ji kwuo otú ahụ. Jehova bụ Ọkaakaa. Ọ bụ naanị ya bụ “Onye Kacha Elu n’ụwa niile.” (Gụọ Abụ Ọma 83:18.) Ọ bụ “Onye Pụrụ Ime Ihe Niile” n’ihi na ọ ga-emeli ihe ọ bụla ọ chọrọ ime. Ọ bụ ya “kere ihe niile,” ma eluigwe ma ụwa ma ihe niile dị ndụ dị n’ụwa. (Mkpughe 4:8, 11) Ọ bụ naanị Jehova bụ onye na-enweghị mgbe ọ malitere. Ọ ga-adịgidekwa ruo mgbe ebighị ebi.—Abụ Ọma 90:2.
MỤTAKWUO IHE
Chọpụta ihe dị iche n’aha ndị a na-etu Chineke na aha ya pụrụ iche. Chọpụtakwa otú o si mee ka ị mata aha ya na ihe mere o ji mee ka ị mata ya.
3. E nwere ọtụtụ aha a na-etu Chineke, ma o nwere naanị otu aha
Unu chọọ ịmata ihe dị iche n’aha mmadụ na aha a na-etu ya, kpọnyenụ VIDIO a. Unu lechaa ya, unu eleba anya n’ajụjụ a:
-
Olee ihe dị iche n’ezigbo aha Chineke na aha a na-etu ya, dị ka “Onyenwe anyị?”
Baịbụl kwuru na e nwere ọtụtụ ndị nwenụ nakwa ọtụtụ chi ndị mmadụ na-efe ofufe. Gụọnụ Abụ Ọma 136:1-3. Unu gụchaa ya, unu eleba anya n’ajụjụ a:
-
Ònye bụ “Chi kacha chi niile” na “Onyenwenụ kacha ndị nwenụ niile”?
4. Jehova chọrọ ka ị mara aha ya, na-akpọkwa ya
Olee otú i si mara na Jehova chọrọ ka ị mara aha ya? Kpọnyenụ VIDIO a. Unu lechaa ya, unu eleba anya n’ajụjụ ndị a:
-
Ì chere na Jehova chọrọ ka ndị mmadụ mara aha ya? Gịnị mere i ji chee otú ahụ?
Jehova chọrọ ka ndị mmadụ na-akpọ aha ya. Gụọnụ Ndị Rom 10:13. Unu gụchaa ya, unu eleba anya n’ajụjụ ndị a:
-
Olee uru ịna-akpọ aha Chineke bụ́ Jehova bara?
-
Olee otú obi na-adị gị ma mmadụ cheta aha gị ma kpọọ gị ya?
-
Olee otú i chere obi ga-adị Jehova ma ị na-akpọ ya aha ya?
5. Jehova chọrọ ka ị bụrụ enyi ya
Otu nwaanyị onye Kambodia aha ya bụ Soten kwuru na e nweghị ihe na-eme ya obi ụtọ n’ụwa a ka aha Chineke ọ matara. Kpọnyenụ VIDIO a. Unu lechaa ya, unu eleba anya n’ajụjụ a:
-
Na vidio a, olee uru ịmata aha Chineke baara Soten?
Tupu gị na mmadụ abụrụ enyi, ị ga-ebu ụzọ mara aha ya. Gụọnụ Jems 4:8a. Unu gụchaa ya, unu eleba anya n’ajụjụ ndị a:
-
Gịnị ka Jehova gwara gị ka i mee?
-
Olee otú ịmara aha Chineke na ịna-akpọ ya nwere ike isi mee ka ị bịarukwuo ya nso?
ỤFỌDỤ NA-ASỊ na e nwere naanị otu Chineke, n’ihi ya, na e nweghị ihe o mere ịkpọ ya aha ọ bụla ị chọrọ ịkpọ ya.
-
Ì kwetara na aha Chineke bụ Jehova?
-
Olee otú ị ga-esi akọwara mmadụ na Chineke chọrọ ka anyị na-akpọ aha ya?
NCHỊKỌTA
Jehova bụ aha onye naanị ya bụ ezi Chineke. Ọ chọrọ ka anyị mara aha ahụ, chọọkwa ka anyị na-akpọ ya iji bịaruo ya nso.
Ajụjụ ndị e ji echeta ihe a mụrụ
-
Olee otú Jehova si dị iche na chi ndị ọzọ niile ndị mmadụ na-efe?
-
Gịnị mere anyị kwesịrị iji na-akpọ aha Chineke?
-
Olee otú i si mara na Jehova chọrọ ka ị bịaruo ya nso?
IHE Ị GA-ELEBAKWU ANYA
Lee ụzọ ihe ise na-enweghị mgbagha na-egosi na Chineke dị adị.
“Ò Nwere Onye Dị́ Adị Bụ́ Chineke?” (Isiokwu gbara n’Ịntanet)
Chọpụta ihe mere ị ga-eji kwere na Chineke enweghị mmalite.
Chọpụta ihe mere anyị kwesịrị iji na-akpọ aha Chineke, ọ bụrụgodị na anyị amaghị otú e si akpọ ya n’oge ochie.
È nwere ihe o mere ma anyị na-akpọ Chineke aha ọ bụla masịrị anyị? Chọpụta ihe mere anyị ga-eji kwuo na o nwere naanị otu aha.
a Ị chọọ ịmatakwu ihe aha Chineke pụtara nakwa ihe mere ụfọdụ ndị sụgharịrị Baịbụl ji wepụ ya na Baịbụl ha sụgharịrị, gụọ Ihe Ndị Ọzọ A Kọwara nke A4 na Baịbụl Nsọ nke Nsụgharị Ụwa Ọhụrụ.
Isiokwu A Nwekwara Ike Ịmasị Gị
AJỤJỤ NDỊ MMADỤ NA-AJỤKARỊ
Olee Otú Ndịàmà Jehova na Ndị Mmadụ Si Amụ Baịbụl?
Anyị na gị mụwa Baịbụl, i nwere ike iji nsụgharị Baịbụl ọ bụla na-amasị gị. I nwere ike ịkpọ ndị ezinụlọ unu niile ma ọ bụ ndị enyi gị ka ha soro na-amụ ya.
