ANG ỌJẸ́JẸ 04
Owo Ohe à tị́ Ri?
Mwiiji nyọlẹ ká angịnyị jam odehe, ị kaa gbịgba ha ihye alẹng bala anyang lụmẹ-lụmẹ. Ma, ịBayịbụụ ya ẹla u-uhye nya Ohe ọlẹ kọ “gụ [ihye] ịkịla wuu.” (2 Ego Ogbegbe 2:5) Owo ọ tị́ ri? Ịyẹ à tị́ du kọọwa à gụ ihye ịkịla ịlẹ ká angịnyị kaa gbịgba ha wuu? Ẹ-ẹpwụ nya ang ọjẹ́jẹ ọlẹ, à ka yẹ ang ọlẹ ká Ohe ọwẹ tịtọ á ka jẹ́ u-uhye nyamwụ.
1. Ẹnyị nya Ohe à tị́ ri ányị? Ịyẹ à tị́ mẹjẹ nyori ọ tịtọ kahị ka jẹ́ ẹnyị ọwa?
Ohe ya ịlọmwụ jehi ẹ-ẹpwụ nya ịBayịbụụ. O yẹkẹẹ: “Am à ri iJihova lẹ. Ẹnyị nyam à wẹ lẹ.” (Ayịsaya 42:5, 8, NW ) “IJihova” ri ọyẹda nya ẹnyị nya òja nya iHiburu ọlẹ ká iru nya angị jẹ́ ang ya nyori etu nyamwụ nyị ri “Ọngọ Du ká Ẹla Họ.” IJihova tịtọ kahị ka jẹ́ ẹnyị nyamwụ. (Ehe Ọkpụkpụ 3:15, NW ) Ahị tị́ họ ányị kahị jẹ́? Ẹnyị nyamwụ hyehe ị-ịBayịbụụ gụ ụka 7,000! a IJihova ri ẹnyị nya ọngọlẹ ká ọwa “ụbwọọmwụ à ri Ohe Oluhye u-uhye-ọgba bala odehe wuu.”—Ehile Ọmada 4:39.
2. Ẹlịyẹ ịBayịbụụ à tị́ ya u-uhye nya iJihova?
ỊBayịbụụ ya nyori, ẹ-ẹpwụ nya ihye ịlẹ ká angịnyị ehe kaa gbịgba ha wuu, iJihova nya-à ri Ohe nyịlẹhị kẹnẹ-kẹnẹ lẹ. Ịyẹ tị́ du? Ang lụmẹ-lụmẹ ji. IJihova à la ọngịrị gụgụ wuu lẹ, ọwa ụbwọọmwụ kẹnẹ-kẹnẹ à “ri Agụgụ u-uhye nya odehe wuu lẹ.” (Eje Ọnyịịla 83:18, NW ) ỊBayịbụụ wụrwọọ nya “Agụgụ,” chajị ọ la ọngịrị nyọka họ ang myị́ ang ọlẹ kọ chụ nyọka họ. Ọ “họ ang myị́ ang wuu”—epwoohe bala odehe bala ang ịhịhị ịlẹpwụ nyamwụ wuu. (Ọwụrụụ-wụrụ 4:8, 11) IJihova kẹnẹ-kẹnẹ à la ọmwụ ọdada ka lẹ, ọ tị ka juwa gboyi myị́ oyi ịnyịnyị.—Eje Ọnyịịla 90:2.
JẸ́ GỤ ỌỌWA
Jẹ́ ang gụ ọọwa u-uhye nya ọdatị nya ẹnyị ịlẹ kị kaa chị́ Ohe chị́ bala ẹnyị nyamwụ ọlam. À ka myịmyị-ị̀ jẹ́ ang odudu kọ ya ẹnyị nyamwụ jeng.
3. Ịị chị́ Ohe ẹnyị lụmẹ-lụmẹ, ọ tị la ẹnyị ọlam ookpokpo ọhẹ
Nyọka yẹ ọdatị nya ẹnyị ọlẹ kị kaa chị́ ọngịnyị bala ẹnyị nyamwụ ọlam, yẹ IFIM ọwẹ, kanụ ya ẹla u-uhye nya ịtọ ẹla ọlẹ.
-
Ịyẹ à tị́ ri ọdatị nya ẹnyị ọ-chị́ ọngịnyị chị́ lala “Ayịbaba,” bala ẹnyị nyamwụ ọlam?
ỊBayịbụụ ya nyori angịnyị nyị kaa gbịgba ha ihye bala ayịbaba lụmẹ-lụmẹ. Wa Eje Ọnyịịla 136:1-3, kanụ ya ẹla u-uhye nya ịtọ ẹla ọlẹ:
-
Owo à tị́ ri “Ohe Oluhye ọ-gụ ijiga wuu” bala “Ayịbaba nya angị ri ayịbaba wuu”?
4. IJihova tịtọ á ka jẹ́ ẹnyị nyamwụ bala ọ-kpa wụrwọọ
Ịyẹ à tị́ mẹjẹ nyori iJihova tịtọ á ka jẹ́ ẹnyị nyamwụ? Yẹ IFIM ọwẹ, kanụ ya ẹla u-uhye nya ịtọ ẹla ọlẹ.
-
Ịyẹ tị́ du ká me irya nyori iJihova tịtọ ká angịnyị ka jẹ́ ẹnyị nyamwụ?
IJihova tịtọ ká angịnyị ka wụrụ ẹnyị nyamwụ. Wa Ala iRom 10:13, kanụ ya ẹla u-uhye nya ịtọ ẹla ịlẹ:
-
Ịyẹ tị́ du kọ baba nyọka wụrụ ẹnyị nya Ohe, kọ ri iJihova?
-
Ányị ọ tị́ kaa lang ụka ká ọngịnyị á kpịtịya nya ẹnyị nyang bala ọ-kpa wụrụng?
-
Ányị a tị́ me irya kọ kaa la iJihova ụka kahị wụrụ ẹnyị nyamwụ?
5. IJihova tịtọ ká ka tụ́ jwoo chwẹẹ
Ọnyang ọhẹ bwu Cambodia ọlẹ ká ẹnyị nyamwụ ri Soten ya nyori ọ-jẹ́ ẹnyị nya Ohe nyị ya ọkẹkẹnị ọlẹ kọ la ẹnẹnẹhẹ lẹka họwa. Yẹ IFIM ọwẹ, kanụ ya ẹla u-uhye nya ịtọ ẹla ọlẹ.
-
Jaabwọ ká yẹ ẹ-ẹpwụ nya ifim ọwẹ, ẹlịyẹ ẹnyị nya Ohe ọjẹ́jẹ à tị́ họ ẹ-ẹga nya Soten?
Ene á ka ri oligu nya ọngịnyị, à kaa jẹ́ ẹnyị nyamwụ. Wa iJemsi 4:8a, kanụ ya ẹla u-uhye nya ịtọ ẹla ịlẹ:
-
Ịyẹ iJihova à tị́ wụrụng nyọka họ?
-
Ányị ọ-jẹ́ ẹnyị nya Ohe bala ọ-kpa wụrwọọ à tị́ ka tụng jwoo chwẹẹ?
ANGỊHYẸ KAA YẸKẸẸ: “Ohe ookpokpo à jị lẹ. Lẹ ọ́ baba nyọka wụrwọọ ẹnyị ọhẹ pyiipyii ka.”
-
À jẹ́ myị̀myị̀ nyori iJihova à ri ẹnyị nya Ohe lẹ?
-
Ányị a tị́ ka bwu wụlẹ ju ọngịnyị nyori Ohe tịtọ kahị ka wụrụ ẹnyị nyamwụ?
ẸLỊYẸ A TỊ́ JẸ́?
IJihova à ri ẹnyị nya Ohe nyịlẹhị lẹ. Ọ tịtọ kahị ka jẹ́ ẹnyị ọwẹ bala ọ-kpa wụrwọọ chajị kahị ka tụ́ jwoo chwẹẹ.
Ẹlịyẹ A Tị́ Yụbwọ Chị
-
Ịyẹ tị́ du ká iJihova datị hi ihye ịkịla ịlẹ ká angịnyị kaa gbịgba ha wuu?
-
Ịyẹ tị́ du kahị ka wụrụ enyi nya Ohe?
-
Ịyẹ à tị́ mẹjẹ nyori iJihova tịtọ ká ka tụ́ jwoo chwẹẹ?
JẸ́ ANG ỊLẸ DỌỌ U-UHYE
Kụ ẹhị yẹ ang ịrụ ịlẹ kị du kahị jẹ́ myị̀myị̀ nyori Ohe ji ịnyịlẹhị.
“Ohe Ji?” (Ụpwụ ọla intanẹtị)
Ịyẹ tị́ du kọ pwoku nyọka myị nyori Ohe ji bwu edede-edede?
“Owo à Tị́ Họ Ohe?” (Ẹpwang ọ-Kụ Gbeji nya ahyẹẹnụ 1 nya Ọya Ọhaneku, 2014)
Jẹ́ ang odudu kahị ka wụrụ ẹnyị nya Ohe, kori kahị jẹ́ jaabwọ kị kaa wụrwọọ lụka onyogo ka wẹwẹ.
“Owo IJihova à Tị́ Ri?” (Ụpwụ ọla intanẹtị)
Ẹnyị ọlẹ kahị wụrụ Ohe baba abwẹhẹ? Yẹ ang odudu kahị ka jẹ́-ẹ ya nyori ẹnyị ookpokpo Ohe nya-à la lẹ.
“Ẹnyị Ịmanyị Ohe à Tị́ La?” (Ụpwụ ọla intanẹtị)
a Nyọka jẹ́ ang gụ ọọwa u-uhye nya etu nya ẹnyị nya Ohe bala ang odudu ká angị yẹ ịBayịbụụ da ịhyẹ gbọọ, ka Appendix A4 ịị New World Translation of the Holy Scriptures.
