UKỌCHẸ 04
Ẹnẹ Ch’Ọjọ Ochochi?
Akwẹgba k’amonẹ chanẹ edodo anẹ ilẹ-i, ma rẹ am’ọjọ ojoji ojoji. Ama, Baibul muda che ka ñwu wa kaki i n’Ọjọ ka ki “ch’inaina t’amọjọ du le.” (2 Iko Iko Ẹwñ 2:5) Ẹñwu jẹñwu Ọjọ-i ch’inaina t’amọjọ du le ta? Efu ukọchẹ-i, ẹ na kọchẹ am’ẹñwu k’Ọjọ ochochi-i atene k’ẹ ma lugbo-wñ.
1. Ẹñwu ch’odu Ọjọ, abile k’a ma kaki Ọjọ atene k’a m’odu-wñ lẹ?
Efu Baibul, Ọjọ ka ñwu wa ẹñwu ki ch’odu-wñ. I kakini: “Omi che Jihofa, ab’odu-mi kọ dẹ.” (Gba Aizaya 42:5, 8.) “Jihofa” ch’odu ki kw’alichi Hibru. Inabali kwugbo amẹnuma ki gwili odu lẹ du tejugede kaki ofe-wñ che “Ajẹñwu Ki Wa Che.” Jihofa atene k’a m’odu-wñ. (Akwodufu 3:15) Abile k’a ma kaki Ọjọ atene k’a m’odu-wñ lẹ? Ugbo k’odu Ọjọ dẹ efu Baibul t’ichamu-nyọgwọkọ mebie (7,000) le! a Ẹnẹ ki n’odu lẹ, Jihofa, “ch’Ọjọ efojale atẹ-i, kpai anẹ-ilẹ oganẹ-i”—Ọlọda Eduwa Onukeji 4:39.
2. Ẹñwu Baibul ka ñwu wa lugbo Jihofa?
Baibul kakini efu am’ọjọ du k’amonẹ arẹ, Jihofa kate ch’Ọjọ ochochi. Ẹñwu chi? Ejodudu, Jihofa chẹ n’ọda ki nana tule, owñ kate “ch’Ọmachala ki n’oda anẹ-ilẹ du.” (Gba Eli Ekọ D’Ọjọ 83:18.) Ẹkeji, owñ che “Odobaọgagu”, e-lẹ du ña kaki i n’ukpahiu ki adu chẹñwu du ki atene che. Ẹkẹta, owñ “ny’amẹwñ du”—amẹ̄nwu ọgbọ ilẹ-i du kpai iñmi du ki d’anẹ ilẹ-i. (Ọla Ebitẹ 4:8, 11) Ẹkẹlẹ, Jihofa kate dọmọ iko duu, i la adeju ogbegbelẹ.—Eli Ekọ D’Ọjọ 90:2.
N’UMA NYỌGBA
Kọchẹ manyu lugbo ojoji ki d’agbade odu ojima Ọjọ kpai odu-wñ gẹgẹdẹ. Ubilẹ, kọchẹ ọna k’Ọjọ d’odu-wñ tejugede ñwẹ kpai ẹtẹ ki chi ki ch’abalẹ.
3. Odu ojima Ọjọ che wewe, ama odu-wñ gẹgẹdẹ ch’oka
K’ẹ neke m’ojoji ki d’agbade odu ojima onẹ kpai odu-wñ gẹgẹdẹ, G’IFIDIO-i, ubilẹ mẹ ch’oluka oji ene-i.
-
Ẹñwu ch’ojoji ki d’agbade odu ojima dabu “Ondu,” kpai odu gẹgẹdẹ?
Baibul kakini amonẹ ar’arẹ am’ọjọ manyu am’ondu wewe. Gba Eli Ekọ D’Ọjọ 136:1-3, ch’oluka oji ene-i:
-
Ẹnẹ che “Ọjo e-amọjọ” kpai “Ondu e-amodu”?
4. Jihofa atene k’ẹ m’odu-wñ, k’ẹ la du chekwu
Ẹñwu jẹñwu ẹ ma kaki Jihofa atene k’ẹ m’odu-wñ? G’IFIDIO-i, ubilẹ mẹ ch’oluka oji am’ene-i.
-
Ẹnwu chi k’ẹ neju kaki Jihofa atene k’a m’odu-wñ?
Jihofa atene k’amonẹ ki d’odu-wñ chekwu. Gba Abo Rom 10:13, mẹ choluka oji am’ene-i:
-
Abile ki chẹñwu ogbogaga ka d’odu Ọjọ, Jihofa, chekwu?
-
Abu ẹdọ wẹ adẹ ichẹñwu k’onẹ rewa odu-wẹ, ki la d’ẹ kp’odu wẹ?
-
Abu ẹ neju kaki ẹdọ Jihofa adẹ ichẹñwu k’ẹ d’odu-wñ chekwu?
5. Jihofa atene k’ẹ ch’onukwu-wñ
Onobulẹ ka ki d’ojanẹ Kambodia k’odu-wñ kọ Sotẹn kakini “ẹgba ku m’odu Ọjọ, iko lẹ ẹdọ mi bọ tule.” G’IFIDIO-i, ubilẹ mẹ ch’oluka oji ene-i.
-
Kwef ifidio-i, abu ẹdọ Sotẹn dẹ ẹgba ki m’odu Ọjọ?
Tak’ẹ ch’onukwu onẹ, odu-wñ chẹñwu ejodudu k’ẹ tene ma. Gba Jemis 4:8a, ubilẹ mẹ ch’oluka oji am’ene-i:
-
Ẹñwu Jihofa atene k’ẹ che?
-
Ichẹñwu k’ẹ m’odu Ọjọ, k’ẹ la adu chekwu, abu e-lẹ ajẹñwu ẹ tẹmẹru Ọjọ le?
ABO KA KAKINI:“Ọjọ ch’okate iche, odu duu ki d’uwẹ ẹdọ owñ ẹ neke dọ.”
-
Uwẹ che jẹ kaki Jihofa ch’odu Ọjọ iche?
-
Abu ẹ neke kanẹreju ñwu amonẹ kaki Ọjọ atene k’a d’odu-wñ chekwu?
ẸY’ỌLA UKỌ-I
Jihofa ch’odu Ọjọ ochochi. I la atene k’a m’odu-wñ lẹ, k’a la du chekwu todu k’a neke ch’onukwu-wñ.
Ẹñwu ẹ kọchẹ?
-
Abu Jihofa ch’ojoji ñwu am’ọjọ omunẹ k’amonẹ arẹ?
-
Ẹñwu chi ki nyọ ka d’odu Ọjọ chekwu?
-
Ẹñwu du nā kaki Jihofa atene k’a ch’onukwu-wñ?
KỌCHẸ MANYU
Dejugo am’ẹñwu mẹlu ki ajẹñwu wa ma kaki Ọjọ dọmọ.
Ẹñwu chi ki chẹ nyọ ka kẹdọno kaki Ọjọ tete dọmọ?
Kọchẹ ẹñwu ki chi ki nyọ ka d’odu Ọjọ chekwu dagba ka ma m’alu ku ma adọ jali igbele igbele n.
A neke d’Ọjọ odu duu ki nyọ ñwu wa? G’ẹñwu ki jẹñwu wa kẹdọno kaki odu Ọjọ gẹgẹdẹ ch’okate.
a Ichẹñwu k’ẹ tene kọchẹ manyu lugbo ofe odu Ọjọ kpai ẹñwu ki jẹñwu am’arichida ichẹka d’odu Ọjọ kwefu Baibul ku ma r’ichi-wñ da, go, Appendix A4 efu New World Translation of the Holy Scriptures.
