TOLUMỌYE 04
Te Ụbọ Kị Ọkpọnanaowei A O?
Kịmị ọwọụama paa sẹ, biin oruama kị karị timi bei ifie laa dẹ. Mọabikpọ, Bible gbaa bara mị kẹnị Ọkpọnanaowei kị “dụba asẹ dẹịn emi.” (2 Chronicles 2:5) Bịsẹ ụbọ mị tụba ka? Bá tetuu kị duonị omịnị kị dụba asẹ dẹịn emi a o? Bei tolumọyọ mị, Ọkpọnanaowei wo emi bara gbaa ị́ pịrị mịnị.
1. Teeki Ọkpọnanaowei ẹrẹ a o, omịnị wo ẹrẹ nimi ụ mọ dọụ emi a o?
Bible bolou mị, Ọkpọnanaowei wo emi bara gbaa wó pịrị wẹrị emi. Omịnị gbaa mị: “Ịmịnị Jehovah. Anị kị ine ẹrẹ.” (Isaiah 42:5, 8 goo.) “Jehovah” ẹrẹ mị Hebrew bẹẹlị kị duo waị gẹẹ wẹrị emi, ẹrẹ tuumị “Wo Gbaa Bara kị Paa Mịnị.” Jehovah omịnị wo ẹrẹ nimi kị dọụ emi. (Exodus 3:15) Wó tebara kị mịẹ timi bịsẹ bara nimi ma? Bible bolou bọọ bei ẹrẹ gẹẹ wẹrị emi yọmọ 7,000 dẹịn emi! a “Agọnọ mọ kiri mọ gesii Ọkpọnanaowei” ẹrẹ mị, Jehovah.—Deuteronomy 4:39.
2. Jehovah gbelemọ yọmị Bible teeki gbaa ma o?
Bible gbaa bara mị, kịmị-otu karị mịnị yebosẹ Jehovah bẹtịbị kị gesii Ọkpọnanaowei. Tetuu a? Biin tuuama k’emi. Jehovah kị daa kụrọmọsẹ nana wẹrị emi, má “kiriogbosẹ omịnị kị seri dẹịn emi.” (Psalm 83:18 goo.) Omịnị kị “kụrọmọsẹ nanaowei,” tuumị omịnị kụrọ nana wẹrị o mịẹ dọụ dẹ yesẹ mịẹ mịnị. Omịnị “kị yemọsẹ tẹmẹ mị”—kiriogbo bọọ inyenrin mịnị yemọ má zịnị yemọsẹ. (Revelation 4:8, 11) Jehovah kịmị tọbọụ bara fa, Omịnị ifiemọsẹ inyenrin mịnị, ma inyenrin timi bẹseri bẹseri kị laa mịnị.—Psalm 90:2.
EBIBARA TUUDỌỤ
Jehovah nana wẹrị emi kulebomọ ma wo yelaa ẹrẹ mọ bẹbẹ paa emi bara tuudọụ. Omịnị wo ẹrẹ gbaa ị́ pịrị bara mọ má tuu mọ dọụ erị.
3. Ọkpọnanaowei biin kuleama kị nana wẹrị emi, anịa omịnị kẹnị ẹrẹ kị emi
Kịmị tọbọụ kụlemọ má ụbọ ẹrẹ mọ teeki tịịn agbẹị dẹịn emi a o? tuudọụ erị, VIDIO farị dá, kirianga bọọ emi bịịbibimọ kẹrị ẹrẹtei.
-
Kule, gbaamaba “Nanaowei,” má ẹrẹ mọ kẹnị ye a o? Tuugbaa.
Bible gbaa bara mị kịmị-otu kuleama akị yeama tịịn wẹrị karị mịnị. Psalm 136:1-3 goo dá, mị biibịbị kẹrị ẹrẹtei:
-
Te “Ọkpọnanaowei” má “Nanaowei” kị dụba dẹịn emi a o?
4. Jehovah ị́mịnị wo ẹrẹ nimi má tịịn kị dọụ emi
Teeki Jehovah ị́mịnị wo ẹrẹ nimi dọụ emi bara mịẹdịa ma o? VIDIO Farị dá, kirianga bọọ emi biibịbịmọ kẹrị ẹrẹtei.
-
Jehovah kịmị-otu wo ẹrẹ nimi dọụ emi a? Tetuu a?
Jehovah kịmị-otu wo ẹrẹ tịịn kị dọụ emi. Romans 10:13 goo dá, mị biibịbịmọ kẹrị ẹrẹtei:
-
Jehovah ẹrẹ tịịn mị tebara ka kị yelaa emi a o?
-
Kịmị iné ẹrẹ ukie wẹrị akị ị́ tịịn daba, tebara ka kị ị́ gbele mịnị a o?
-
Ị́mịnị Jehovah ẹrẹ tịịn daba, tebara ka kị ụ gbele mịnị bara kị ị́ mọ tọn ma o?
5. Jehovah ị́mịnị ụ mọ mọ́ naịn timi kị dọụ emi
Soten, Cambodia ere gbaa bara mị amịnị Ọkpọnanaowei ẹrẹ nimi yọmị “a mịẹ bolouịmbẹlẹ dẹịn mị. VIDIO fari dá, kirianga bọọ emi biibịbịmọ kẹrị ẹrẹtei.
-
Vidio bolou mị, Ọkpọnanaowei ẹrẹ nimi yọmị tebara ka kị Soten gbele ma o?
Ị́mịnị kịmị ẹrẹ nimi dẹkị, kịmị mọ ẹyẹẹ mịẹ mịnị. James 4:8a goo dá, mị biibịbịmọ kẹrị ẹrẹtei:
-
Ị́mịnị teeki mịẹ kị Jehovah mọ gbaa mịnị a o?
-
Ọkpọnanaowei ẹrẹ nimi bá akị fịrị wẹnị mịnị yọmị, tebara ka kị baratụa ị́ pịrị ụ mọ mọ́ naịn mịnị a o?
ZỤA KỊMỊAMA GBAA MỊNỊ: “Kẹnị Ọkpọnanaowei k’emi, anị duonị akị ụ tịịn dẹ ẹrẹsẹ kịrị emi.”
-
Jehovah kị Ọkpọnanaowei ẹrẹ bara ị́ kpọ pei wẹrị emi a o?
-
Ọkpọnanaowei ị́mịnị wo ẹrẹ tịịn dọụ emi a o? Tuu gbaa.
KỊLỌỌBARA
Gesii Ọkpọnanaowei ẹrẹ mị Jehovah. Ẹrẹ mị wó mịẹ ụ mọ mọ́ naịn mịnị, Anị duonị omịnị ẹrẹ nimi bá tịịn kị ụ mọ dọụ emi.
Waị diitụa
-
Jehovah tebara ka kị zịnị orubomọ bẹbẹ paa emi a o?
-
Tetuu kị duonị omịnị Ọkpọnanaowei ẹrẹ tịịn agbẹị emi a o?
-
Teeki Jehovah omịnị ụ mọ mọ́ naịn dọụ emi bara mịẹdịa ma o?
DIITỤA
Ọkpọnanaowei inyenrin mịnị bara mịẹdịa wẹrị emi sọnran tuuama sọnị dii.
Ọkpọnanaowei ifiemọsẹ inyenrin emi bara nimi yọbị kịrị emi bara dọụ ẹri.
Hebrew bọọ tịịn timi bara wó mọ nimigha kpọ, Ọkpọnanaowei ẹrẹ tiin mịnị yọmị yelaa emi bara dọụ ẹrị.
Ọkpọnanaowei ẹrẹ tịịn dẹ bara sẹ fa dẹ a? Omịnị kẹnị ẹrẹ kị nana wẹrị emi bara dọụ ẹrị.
a Ọkpọnanaowei ẹrẹ tuu mọ má zụa Bible-ama ẹrẹ seri sin wẹrị emi tuu mọ, akị New World Translation of the Holy Scriptures, Appendix A4 bọọ dọu ẹrị.
