ILUẸMHIN 04
Họ Bhọ Hi Osẹnobulua?
Rẹ na bhi otọ ha vade, ọle ẹbho mọn da ga osẹ kẹkẹ. Ọkpakinọn, Baibo taman mhan ghe, Osẹnobulua ribhọ nọn ke okhun gbera osẹ nekẹle rebhe. (2 Chronicles 2:5) Họla hi ọne Osẹnobulua nan? Be re ọle khua okhun gbera osẹ nekẹle rebhe nin ẹbho ga? Bhi ọne iluẹmhin nan, uwẹ dẹ luẹ ebi Osẹnobulua guanọ nin uwẹ lẹn rẹji ọle.
1. Be hi elin nọnsi Osẹnobulua? Be imhan rẹ lẹn yẹ ghe ọle guanọ nin mhan lẹn elin ọlẹn?
Bhi ẹkẹ iBaibo, Osẹnobulua da tobọle taman mhan yọle: “Imẹn hi Jehova. Ọnin hi elin nọnsẹmhẹn.” (Tie Isaiah 42:5, 8.) Urolo iHebrew a ka rẹ gbẹn ọne elin nan. Ene guanọ otọ emhin fẹghe yọle ghe “Ọnọn Re Emhin Sunu,” ọle ọne elin mundia nan. Jehova guanọ nin mhan lẹn elin nọnsọle. (Exodus 3:15) Be imhan rẹ lẹn ọnan yẹ? Ọ gbera igba 7,000 nin ọne elin zegbere bhi ẹkẹ iBaibo! a Jehova hi elin ọsi Osẹnobulua ọsi ẹmhọanta. Ọle hi ọnọn ke okhun nẹ bhi otọ bi okhun.—Deuteronomy 4:39.
2. Be iBaibo taman mhan rẹji Jehova?
Baibo ji mhan lẹn ghe, bhi ẹwẹ osẹ rebhe nin ẹbho ga, Jehova ọkpa Osẹ ọsi ẹmhọanta. Bezẹle nin Baibo da ta iriọ? Emhin ne bunbun zẹle nin Baibo da ta iriọ. Jehova khua okhun gbera emhin rebhe bhi otọ bi okhun. Ọle ọkpa hi “Ọnọn Ke Okhun Nẹ bhi ọne otọ agbọn nan rebhe.” (Tie Psalm 83:18.) Ọle hi “Ọnọn Mhọn Ahu Nẹ.” Ọnan rẹman ghe, ọle mhọn ahu nin ọle rẹ lu emhin nọn ki rẹ khin nọn ghọn ọlẹn. Ọle hi ọnọn “man emhin rebhe” ne ribhi otọ bi okhun. (Revelation 4:8, 11) Sẹyẹ, ọle ọkpa hi ọnọn nyẹnlẹn bhi ẹdẹdẹmhẹndẹ rẹ sẹbhi ẹdẹdẹmhẹndẹ.—Psalm 90:2.
MANMAN LẸN OTỌLE NỌNSẸN
Luẹ ikẹkẹ nọn ribhi elin nọnsi Osẹnobulua bi elin-ovan kẹkẹ nan tie ọle le. Yẹ luẹ ebezẹle nin Osẹnobulua da guanọ nin uwẹ lẹn elin nọnsọle, bi ebi ọle rẹ rẹkpa uwẹ rẹ lẹn ọlẹn yẹ.
3. Osẹnobulua mhọn elin-ovan ne bunbun, sokpan, elin ọkpa ọle mhọn
Nin uwẹ rẹ lẹn ikẹkẹ nọn ribhi elin ọsi ọria bi elin-ovan nan mun hẹ ọle, ghe ọne IVIDIO, bha ha zilo nyan ọne inọnta nan:
-
Be hi ikikẹ nọn ribhi elin-ovan bọsi “Ebeanlẹn,” bi elin ọsaje nan hẹ ọria le?
Baibo yọle ghe osẹ kẹkẹ bi ebeanlẹn kẹkẹ, ọle ẹbho ga. Tie Psalm 136:1-3, bha ha zilo nyan ọne inọnta nan:
-
Họla hi “Osẹ nọn nẹ osẹ rebhe” bi “Ebeanlẹn nọn nẹ ebeanlẹn rebhe”?
4. Jehova guanọ nin uwẹ lẹn elin nọnsọle
Be rẹman uwẹ ghe Jehova guanọ nin uwẹ lẹn elin nọnsọle? Ghe ọne IVIDIO, bha ha zilo nyan ene inọnta nan:
-
Uwẹ riale ghe Jehova guanọ nin mhan lẹn elin nọnsọle? Bezẹle nin uwẹ da ta iriọ?
Jehova guanọ nin ẹbho ha noo elin nọnsọle. Tie Romans 10:13, bha ha zilo nyan ene inọnta nan:
-
Bezẹle nọn da khẹke nin mhan ha noo elin nọnsi Jehova?
-
Be ọ dia uwẹ yẹ bhi egbe sade ọria lẹn elin nọnsẹ yẹ ha noo ọle?
-
Be uwẹ riale ọ dẹ dia iJehova bhi egbe yẹ, sade uwẹ noo elin nọnsọle?
5. Jehova guanọ nin uwẹ ha yi ọmọẹ ọle
Okhuo ọkpa natiọle Soten, nọn na bhi agbaẹbho ọsi Cambodia vae da yọle ghe, elin nọnsi Osẹnobulua nin ọle dọ lẹn, ọle rẹkpa ọle rẹ miẹn eghọnghọn nọn khua bhi iẹnlẹn. Ghe ọne IVIDIO, bha ha zilo nyan ọne inọnta nan:
-
Beji a rẹman bhi ọne ividio, be elin nọnsi Osẹnobulua nin Soten dọ lẹn rẹ rẹso ọle yẹ?
Ahamiẹn uwẹ guanọ nin uwẹ deba ọria ha lu ọmọẹ, elin nọnsọle hi emhin ọhẹnhẹn nin uwẹ ka lẹn. Tie James 4:8a, bha ha zilo nyan ene inọnta nan:
-
Be iJehova guanọ nin uwẹ lu?
-
Ahamiẹn uwẹ lẹn elin nọnsi Jehova yẹ ha noo ọle, be ọ ha rẹ rẹkpa uwẹ rẹ sikẹ ọle yẹ?
ẸBHO ESO SABỌ YỌLE: “Osẹnobulua ọkpa, ọle ribhọ. Ebi mhan ki rẹ tie ọle le, ọ dẹ wanniẹn mhan.”
-
Uwẹ be rẹọbhọ ghe Jehova hi elin nọnsi Osẹnobulua?
-
Be uwẹ ha taman ọria, nin uwẹ rẹ rẹman ọlẹn ghe Osẹnobulua guanọ nin mhan ha noo elin nọnsọle?
EBI MHAN LUẸLE
Jehova hi elin ọsi Osẹnobulua ọsi ẹmhọanta. Ọle guanọ nin mhan lẹn ọne elin yẹ ha noo ọle, beji mhan ha da sabọ manman sikẹ ọle.
Uwẹ Be Yẹ Yere?
-
Be re iJehova dikẹ bhi osẹ nekẹle nin ẹbho ga?
-
Bezẹle nọn da khẹke nin mhan ha noo elin nọnsi Osẹnobulua?
-
Be rẹman ghe Jehova guanọ nin uwẹ ha yi ọmọẹ ọle?
FẸ ENE EMHIN NAN GHE
Fẹ emhin isẹn ne rẹman ghe Osẹnobulua gene ribhọ.
Fẹ ebezẹle nọn da yi emhin ẹwanlẹn nin mhan rẹ rẹọbhọ ghe ọria soso bha man Osẹnobulua.
Fẹ ebezẹle nọn da khẹke nin mhan ha noo elin nọnsi Osẹnobulua, arẹmiẹn ghe a bha lẹn ebi ẹbho rẹ ha tie ọne elin yẹ bhi ẹghe ẹdẹlẹ.
Ọ be rẹtẹ Osẹnobulua ebi mhan tie ọle le? Fẹghe ebezẹle nin mhan ha da rẹọbhọ ghe elin ọkpa sẹsẹ ọle mhọnlẹn.
a Nin uwẹ rẹ manman lẹn ebi elin nọnsi Osẹnobulua mundia nan, bi ebezẹle nọn ida ribhi Baibo eso, fẹ Appendix A4 ghe bhi Baibo natiọle New World Translation of the Holy Scriptures.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
