UWUHRẸ 04
Ono Họ Ọghẹnẹ?
U kri akpọ gaga no nọ ahwo-akpọ a be rọ gọ oghẹrẹ eghẹnẹ sa-sa. Rekọ Ebaibol na ọ ta nọ u wo Ọghẹnẹ jọ nọ “ọ rro vi eghẹnẹ efa kpobi.” (2 Iruẹru-Ivie 2:5) Ono họ Ọghẹnẹ yena? Kọ eme u ru rie rro vi eghẹnẹ efa kpobi nọ ahwo a be gọ na? Evaọ uwuhrẹ nana, who ti wuhrẹ oghẹrẹ nọ Ọghẹnẹ nana ọ rọ gwọlọ nọ whọ riẹ ọyomariẹ.
1. Didi odẹ Ọghẹnẹ, kọ ẹvẹ ma rọ riẹ nọ ọ gwọlọ nọ ma riẹ odẹ na?
Ọghẹnẹ ọ jọ Ebaibol na dhesẹ omariẹ kẹ omai. Ọ ta nọ: “Mẹ họ Jihova. Odẹ mẹ oye.” (Se Aizaya 42:5, 8.) “Jihova” yọ oghẹrẹ nọ a fa odẹ Hibru jọ nọ o sae jọnọ otofa riẹ o rrọ “O re Ru Zihe Ro.” Jihova ọ gwọlọ nọ ma riẹ odẹ riẹ. (Ọnyano 3:15) Ẹvẹ ma rọ riẹ? O fi odẹ riẹ Jihova họ Ebaibol na bu vi isia idu ihrẹ (7,000). a Ọnọ ọ rrọ “Ọghẹnẹ uzẹme na evaọ obọ idhiwu gbe evaọ otọakpọ na” họ ọnọ o wo odẹ na Jihova.—Iziewariẹ 4:39.
2. Eme Ebaibol na ọ vuẹ omai kpahe Jihova?
Ebaibol na ọ ta nọ evaọ usu eghẹnẹ kpobi nọ ahwo-akpọ a be gọ na, Jihova ọvo họ Ọghẹnẹ uzẹme na. Fikieme o rọ rrọ ere? U wo ẹjiroro sa-sa nọ o rọ rrọ ere. Jihova họ ọnọ o wo udu-esuo nọ o mai kpehru, yọ ọye ọvo họ “Ọnọ Ọ Mai Kpehru vi otọakpọ na kpobi.” (Se Olezi 83:18.) Ọye họ “Erumeru” na, onọ u dhesẹ nọ o wo ogaga nọ ọ sai ro ru oware kpobi nọ ọ gwọlọ ru. Ọye “ọ ma eware kpobi,” koyehọ, ehrugbakpọ na gbe eware kpobi nọ i wo uzuazọ evaọ otọakpọ na. (Eviavia 4:8, 11) Jihova ọvo họ ọnọ o wo emuhọ họ, yọ ọ te jọ bẹdẹ bẹdẹ.—Olezi 90:2.
GBE WUHRẸ EWARE EFA
Wuhrẹ kpahe ohẹriẹ nọ o rrọ edẹ-ova Ọghẹnẹ gbe odẹ-oma riẹ nọ ọye ọvo o wo na. Je wuhrẹ kpahe oghẹrẹ nọ o ro dhesẹ odẹ riẹ kẹ owhẹ gbe ẹjiroro nọ o ro ru ere.
3. Ọghẹnẹ o wo edẹ-ova buobu, rekọ odẹ-oma ọvo o wo
Re whọ ruẹ ohẹriẹ nọ o rrọ odẹ-ova ohwo gbe odẹ-oma riẹ, kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Ohẹriẹ vẹ o rrọ odẹ-ova, wọhọ “Olori,” avọ odẹ-oma?
Ebaibol na ọ ta nọ ahwo a be gọ eghẹnẹ gbe ilori buobu. Se Olezi 136:1-3, kẹsena wha vẹ ta ẹme kpahe onọ nana:
-
Ono họ “Ọghẹnẹ eghẹnẹ na” gbe “Olori ilori na”?
4. Jihova ọ gwọlọ nọ whọ riẹ odẹ riẹ jẹ hai sei
Eme o dhesẹ nọ Jihova ọ gwọlọ nọ whọ riẹ odẹ riẹ? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.
-
Kọ who roro nọ Jihova ọ gwọlọ nọ a riẹ odẹ riẹ? Fikieme whọ rọ ta ere?
Jihova ọ gwọlọ nọ ahwo a se odẹ riẹ. Se Ahwo Rom 10:13, kẹsena wha vẹ ta ẹme kpahe enọ nana:
-
Ẹvẹ who roro nọ u wuzou te re a se odẹ Ọghẹnẹ nọ o rrọ Jihova?
-
Ẹvẹ o rẹ jọ owhẹ oma nọ ohwo ọ tẹ kareghẹhọ odẹ ra jẹ rehọ iẹe se owhẹ?
-
Ẹvẹ who roro nọ o rẹ jọ Jihova oma nọ who te bi se odẹ riẹ?
5. Jihova ọ gwọlọ nọ who si kẹle iẹe ziezi
Evaọ okenọ aye jọ nọ ọ rrọ ohwo Cambodia nọ a re se Soten o wuhrẹ odẹ Ọghẹnẹ ọ ta nọ, oye họ “oware nọ o mai woma evaọ uzuazọ ohwo.” Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
-
Evaọ ividio na, ẹvẹ odẹ Ọghẹnẹ nọ Soten o wuhrẹ u duobọtei?
Whọ tẹ gwọlọ mu usu kugbe ohwo, whọ rẹ daoma riẹ odẹ riẹ. Se Jemis 4:8a, kẹsena wha vẹ ta ẹme kpahe enọ nana:
-
Eme Jihova ọ be ta nọ who ru evaọ etenẹ na?
-
Whọ tẹ riẹ odẹ Ọghẹnẹ je bi sei, ẹvẹ o sai ro fiobọhọ kẹ owhẹ si kẹle iẹe ziezi?
AHWO JỌ A RẸ TA NỌ: “Ọghẹnẹ ọvuọvo ọ riẹ, fikiere odẹ kpobi nọ who se riẹ u muẹme he.”
-
Kọ whọ rọwo nọ Jihova họ odẹ Ọghẹnẹ?
-
Ẹvẹ whọ rọ riẹ nọ Ọghẹnẹ ọ gwọlọ nọ ma se odẹ riẹ?
EME WHO WUHRẸ NO?
Jihova họ odẹ Ọghẹnẹ uzẹme ọvo na. Ọ gwọlọ nọ ma riẹ odẹ na je sei re ma sai si kẹle iẹe.
Ọkiẹkpemu
-
Ẹvẹ Jihova o ro wo ohẹriẹ no eghẹnẹ efa kpobi nọ ahwo a be gọ na?
-
Fikieme u ro fo re ma se odẹ Ọghẹnẹ?
-
Eme o dhesẹ nọ Jihova ọ gwọlọ nọ who si kẹle iẹe?
KIẸ KPAHE EFA
Wuhrẹ ẹjiroro isoi nọ u ro mu omai ẹro nọ Ọghẹnẹ ọ rrọ.
Wuhrẹ oware nọ ma sae rọ rọwo nọ Ọghẹnẹ o wo emuhọ họ.
Wuhrẹ oware nọ u ro fo re ma se odẹ Ọghẹnẹ, o tẹ make rọnọ ma nwane riẹ epanọ a je sei evaọ oke anwae dẹẹ hẹ.
Kọ odẹ nọ ma bi se Ọghẹnẹ u muẹme? Rri oware nọ ma rọ ta nọ odẹ-oma ọvo Ọghẹnẹ o wo.
a Re whọ gbẹ riẹ eware efa kpahe otofa odẹ Ọghẹnẹ gbe oware nọ efefafa jọ a ro si ei no Ebaibol rai no, rri Ẹme-Ofiba A4 evaọ Efafa Akpọ Ọkpokpọ ọrọ Ikereakere Efuafo Na.
Enana E Sae jẹ Were Owhẹ
ENỌ NỌ AHWO A RẸ NỌ KẸSE KẸSE
Oghẹrẹ Vẹ Isẹri Jihova A re ro Wuhrẹ Ebaibol Kugbe Ahwo?
Isẹri Jihova a gwọlọ nọ a re wuhrẹ Ebaibol na kugbe owhẹ ọvọvẹ. Yọ nọ a te bi wuhrẹ kugbe owhẹ, whẹ sai se oghẹrẹ Ebaibol kpobi. Whọ sai zizie uviuwou ra soso hayo egbẹnyusu ra re a kuomagbe owhẹ.
