ĨSOMO YA 04
Ngai Nũũ?
Kuma tene vyũ andũ meethĩĩtwe maithaitha ngai nũme na ngai nga syĩ kĩvathũkanyʼo. Ĩndĩ Mbivilia nĩwetete kana kwĩ Ngai ũmwe ũla nĩwe “mũnene kwĩ ngai syonthe.” (2 Mavinda 2:5) Ngai ũsu nĩ wĩva? Na nĩ kyaũ kĩtumaa ethĩwa e mũnene kwĩ ngai syonthe ila andũ mathaithaa? Ĩsomonĩ yĩĩ, nũkwĩmanyĩsya maũndũ ala Ngai ũsu wendaa ũmanye ĩũlũ wake.
1. Ngai etawa ata, na nĩ kyaũ kĩtũĩkĩĩthasya kana nĩwendaa tũmanye ĩsyĩtwa yake?
Ngai nũtũtavĩtye ĩsyĩtwa yake Mbivilianĩ. Aĩtye: “Ninyie Yeova, nĩyo syĩtwa yakwa.” (Soma Isaia 42:5, 8.) Ĩsyĩtwa “Yeova” yĩalyũlĩtwe kuma ĩsyĩtwanĩ yĩngĩ ya Kĩevelania yĩla ĩtonya kwĩthĩwa yonanasya “Nũtwʼĩkĩthasya.” Yeova nĩwendaa tũmanye ĩsyĩtwa yake. (Kuma 3:15) Twĩsĩ ũu ata? Nĩwaandĩkĩthisye ĩsyĩtwa yake Mbivilianĩ mavinda mbee wa 7,000! a Ĩsyĩtwa Yeova nĩ ya “Ngai ũla wa wʼo weka,” ĩtunĩ na kũũ nthĩ.—Yoana 17:3.
2. Mbivilia ĩtũtavĩtye maũndũ meva ĩũlũ wa Yeova?
Mbivilia yaĩtye kana katĩ wa ngai syonthe ila ithaithawa nĩ andũ, Yeova nĩwe Ngai ũla wa wʼo. Nĩkĩ tũkwasya ũu? Ve itumi syĩana ũna. Yeova nĩwe wĩ na ũkũmũ ũla mũnene vyũ, na nowe e weka “Wĩ Ĩũlũ wa Onthe ĩũlũ wa nthĩ yonthe.” (Soma Savuli 83:18.) Nĩwe “Mwene Vinya Wʼonthe,” na ũu nĩ kwonanyʼa kana e na ũtonyi wa kwĩka kyonthe kĩla watwʼa kwĩka. Nĩwe ‘woombie syĩndũ syonthe’ ĩtunĩ na kũũ nthĩ. (Ũvuanyʼo 4:8, 11) O na ĩngĩ, kĩvathũkanyʼo na syũmbe syonthe, Yeova nĩ wa kuma tene na tene, na endeea kwĩthĩwa vo tene na tene.—Savuli 90:2.
ĨMANYĨSYE MŨNANGO
Ĩmanyĩsye kĩvathũkanyʼo kĩla kĩ vo katĩ wa masyĩtwa ma Ngai ma ũnene na ĩsyĩtwa yake ya mwanya. Na ĩndĩ ũyona maũndũ ala wĩkĩte nĩ kana aũmanyĩthye ĩsyĩtwa yake, na nĩkĩ ũkwenda ũyĩmanye.
3. O na kau Ngai e ĩsyĩtwa yĩmwe ya mwanya, e masyĩtwa maingĩ ma ũnene
Nĩ kana wone kĩvathũkanyʼo katĩ wa ĩsyĩtwa ya mũndũ ya ũnene na ĩsyĩtwa yake mwene, ĩloelei VITIO, na ĩndĩ mũineenea ĩkũlyo yĩĩ yĩatĩĩe:
-
Ve kĩvathũkanyʼo kyaũ katĩ wa ĩsyĩtwa ya ũnene ta “Mwĩaĩi,” na ĩsyĩtwa ya mũndũ mwene?
Mbivilia yaĩtye kana andũ nĩmathaithaa ngai mbingĩ syĩ kĩvathũkanyʼo na eaĩi. Somai Savuli 136:1-3, na ĩndĩ mũineenea ĩkũlyo yĩĩ:
-
“Ngai wa i ngai” na “Mwĩaĩi wa eaĩi” nũũ?
4. Yeova nĩwendaa ũmanye ĩsyĩtwa yake na ũiyĩtũmĩa
Nĩ kyaũ kyonanasya kana Yeova nĩwendaa ũmanye ĩsyĩtwa yake? Ĩloelei VITIO, na ĩndĩ mũineenea makũlyo aa:
-
We nũkwona Yeova ta wendaa ĩsyĩtwa yake yĩmanyĩke? Na nĩkĩ wasũngĩa ũu?
Yeova nĩwendaa andũ matũmĩe ĩsyĩtwa yake. Somai Alomi 10:13, na ĩndĩ mũineenea makũlyo aa:
-
Nĩkĩ nĩ ũndũ wa vata kũtũmĩa ĩsyĩtwa ya Ngai, Yeova?
-
We wĩwʼaa ata yĩla mũndũ walilikana ĩsyĩtwa yaku na aiyĩtũmĩa?
-
We wĩona Yeova ta wĩwʼaa ata watũmĩa ĩsyĩtwa yake?
5. Yeova nĩwendaa ũtwʼĩke mũnyanya wake
Mũndũ mũka ũmwe kuma Cambodia wĩtawa Soten aisye kana kwĩmanyĩsya ĩũlũ wa ĩsyĩtwa ya Ngai nĩkwatumie ethĩwa na ũtanu mwingĩ mũno. Ĩloelei VITIO, na ĩndĩ mũineenea ĩkũlyo yĩĩ:
-
O tondũ twoona vitionĩ, Soten atethekie ata emanyĩsya ĩũlũ wa ĩsyĩtwa ya Ngai?
Nĩ kana ũtume ndũũ na mũndũ, wambaa kũmanya ĩsyĩtwa yake. Somai Yakovo 4:8a, na ĩndĩ mũineenea makũlyo aa:
-
Yeova aũthoketye wĩke ata?
-
Kũmanya na kũtũmĩa ĩsyĩtwa ya Ngai kũtonya kũũtetheesya ata ũmũthengee mũnango?
ANDŨ AMWE MAASYA: “Kwĩ Ngai o ũmwe, na kwoou o na ũkamwĩta ata vai thĩna.”
-
We nũkũĩkĩĩa kana Yeova nĩyo ĩsyĩtwa ya Ngai?
-
Ũtonya kũelesya ata kana Ngai nĩwendaa tũtũmĩe ĩsyĩtwa yake?
KĨLA TWEEMANYĨSYA
Yeova nĩyo ĩsyĩtwa ya Ngai ũla wa wʼo. Endaa tũmanye na tũitũmĩa ĩsyĩtwa yake nĩ kana tũmũthengeee.
Makũlyo ma Kũsyokeleela
-
Yeova e kĩvathũkanyʼo ata na ngai ila ingĩ andũ mathaithaa?
-
Nĩkĩ twaĩle kũtũmĩa ĩsyĩtwa ya Ngai?
-
Nĩ kyaũ kĩkwonanyʼa kana Yeova nĩwendaa ũmũthengeee?
MAŨNDŨ ANGĨ MA KWĨMANYĨSYA
Sisya maũndũ atano mekũtũĩkĩĩthya kana kwĩ Ngai.
Soma wone nĩkĩ nĩ ũndũ wosanĩte na kĩlĩko kũĩkĩĩa kana Ngai ethĩĩtwe e kwʼo mavinda onthe.
“Nũũ Ũla Woombie Ngai?” (Mũsyaĩĩsya, Ĩtukũ 1, Mwei wa 8, 2014)
Soma wone nĩkĩ twaĩle kũtũmĩa ĩsyĩtwa ya Ngai o na ethĩwa tũyĩsĩ ũndũ yatamũkawa tene.
Ve thĩna tũketa Ngai ĩsyĩtwa o na yĩva? Sisya wone nĩkĩ tũtonya kwasya e ĩsyĩtwa o yĩmwe.
a Nĩ kana ũkwate ũvoo mwingangĩ ĩũlũ wa kĩla ĩsyĩtwa ya Ngai yonanasya, na nĩkĩ yĩvetetwe Mbivilianĩ mbingĩ, sisya Nyongeza A4 nthĩnĩ wa Biblia Takatifu—Tafsiri ya Ulimwengu Mpya.
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
