THUTO 04
Ndzimu Ndi Yani?
Ku dwa ntolo mu ku chila kwe nthu, bathu ba ka namata midzimu ne midzingwana minjinji. Ne kwa ka jalo, Baibili i no leba ne kwe Ndzimu u ngompela u “nkulu kupinda midzimu yose.” (2 Shingikalo 2:5) Ndi upi iwoyo? Ngono ini chi no thama kuti ibe iye nkulu ku pinda midzimu yose i no namatiwa ne bathu? Mu thuto iyeyi, nowo zwidiya kuti Ndzimu iwoyo u no shaka kuti u zibeni ne kukwe.
1. Zina le Ndzimu ndi yani, ngono ti nga ziba chini kuti u no shaka kuti ti li zibe?
Mu Baibili, Ndzimu u no ti budza kuti ndiye yani. A kati: “Ndimi Yahwe [Jehova], ndilo zina langu ileli.” (Bala Izaya 42:5, 8.) “Jehova” i shandulilo ye zina le Chihebera li no dwa kuti “U no thama kuti ku shingikale.” Jehova u no shaka kuti ti zibe zina lile. (Ekezodo 3:15) Ti nga ziba chini kuti dumbu kwa ka jalo? Mu Baibili, zina lile lo wangwa ku pinda ka 7,000! a Zina Jehova ndi le “Ndzimu pezhugwi kudzimu na pasi mu shango.”—Ditironomi 4:39.
2. Baibili i no tini ne kwa Jehova?
Baibili i kati mu midzimu yose i no namatiwa ne bathu, Jehova ndiye koga Ndzimu we malebeswa. Ne kutini? Ku na mabaka a ka siyasiyana. Jehova ndiye nlauli nkulu, ndiye koga u “pezhugwi zhugwi kwe shango yose.” (Bala Pisalema 83:18.) Baibili i no ndana iti “Masimbawose,” ne kuti u na masimba e ku thama chingwe ne chingwe cha a no shaka ku chi thama. Wa ka “bumba zwithu zose”—ku no dwa kuti wa ka bumba lubumbo ne chingwe ne chingwe chi no chila mu shango. (Zumbunulo 4:8, 11) Jehova ndiye koga wa ka gala ali yapo, ngono u nowo dwilila ali yapo cha chose.—Pisalema 90:2.
ZWIDIYE KWA KA NGINILILA
Shakisisa ku sa fanana kwe mitupo ye Ndzimu ne zina lile la a no dangwa nalo ali yega koga. Kakale zwidiye se kwa a ka ti zibisa zina lile, ku shanganyila ne mabaka a ichecho.
3. Ndzimu u na mitupo minjinji, ngono zina lile li ngompela koga
Ku bona ku sa fanana kwe mitupo ye nthu ne zina lile, zana VIDIYO, mu be mu lebesana ne kwe buzo i no tobela.
-
Ku na ku sa fanana kupi pakati kwe ntupo, u no nga “Tetshi,” ne zina?
Baibili i kati bathu ba no namata midzimu minjinji ne boshe kene botetshi banjinji. Bala Pisalema 136:1-3, mu be mu lebesana ne kwe buzo i no tobela:
-
“Ndzimu we midzimu” ne “She wa boshe” ndi yani?
4. Jehova u no shaka kuti u zibe zina lile ne ku ndana nalo
Ini chi no lakidza kuti Jehova u no shaka kuti u zibe zina lile? Zana VIDIYO, mu be mu lebesana ne kwe buzo dzi no tobela.
-
A no kumbula kuti Jehova u no shaka kuti zina lile li zibgwe? Ne ku tini?
Jehova u no shaka kuti bathu ba ndane ne zina lile. Bala Juwele 2:32, mu be mu lebesana ne kwe buzo dzi no tobela:
-
Ini ili chithu chikulu kuti ti dane Ndzimu ne zina lile, Jehova?
-
U no zwiwa chini ha nngwe e alakana zina lilo e be e ku dana nalo?
-
No kumbula kuti Jehova u no zwiwa chini ha u ndana ne zina lile?
5. Jehova u no shaka kuti u be nkhwinya uwe
Nkadzi nngwe u no dwa ku Cambodia u no dangwa Soten wa kati ku zwidiya zina le Ndzimu kwa ka mbatsha ku shathila “mazwiwo a no pinda wose mu shango.” Zana VIDIYO, mu be mu lebesana ne kwe buzo i no tobela.
-
Mu vidiyo iyeyi, ku zwidiya zina le Ndzimu kwa ka ama Soten chini?
Kuti u be nkhwinya ne nngwe, kanjinji u no tangisa ne ku ziba zina lile. Bala Jakuba 4:8a, mu be mu lebesana ne kwe buzo dzi no tobela:
-
Jehova u no ku koka kuti u thameni?
-
Ku ziba zina le Ndzimu ne ku ndana nalo ku nga ku batsha chini kuti u zwiwe u li pejo naye?
BATHU BANGWE BA KATI: “Ndzimu u ngompela koga, a ku to ti chingwe kuti no ndana u tini.”
-
A no duma kuti Jehova i zina le Ndzimu?
-
U nga chenesela nngwe chini kuti Ndzimu u no shaka kuti ti ndane ne zina lile?
CHA WA ZWIDIYA
Jehova i zina le Ndzimu u yega we malebeswa. U no shaka kuti ti zibe zina lile ne ku ndana nalo kuti ti khone kube bakhwinya babe.
U Nga Tini?
-
Jehova ha a to fanana chini ne midzimu ingwe i no namatiwa ne bathu?
-
Ini ta ka fanila dana Ndzimu ne zina lile?
-
Ini chi no lakidza kuti Jehova u no shaka kuti u be nkhwinya uwe?
SHAKISISA
Shakisisa ne kwe mabaka ali 5 a no suka moyo e kuti dumbu Ndzimu uyapo.
Bona kuti ini ku hwika kuti ti dume kuti Ndzimu wa ka gala ali yapo.
“Ndiyani wa ka bumba Ndzimu?” (Thungamakole, August 1, 2014)
Zwidiye kuti ini ta ka fanila ku dana Ndzimu ne zina lile, nenguba ti si nga zibe kuti dumbu la ka be li dangwa chini ntolo.
A ko ti chingwe kuti to dana Ndzimu ti tini? Bona kuti ini ti nga ti u na zina li ngompela koga.
a Ku ziba kwa ka paphidzika kuti zina le Ndzimu lo dwani ne kuti ini shandulilo dzingwe dze Baibili dza ka li dusa, bona Appendix A4 mu New World Translation of the Holy Scriptures.
Kakale u Nga Shathila ku Bona
BUZO DZI NO BUZWIWA KANJINJI
Course ye ku Zwidiya Baibili i no Piwa ne Bafakazi ba Jehova Ndi Ipi?
U shingisa ndongoloso ye mahala ye ku zwidiya i no piwa ne Bafakazi ba Jehova, u nga shingisa Baibili ingwe ne ingwe. Sungunuka ku laletsa be nsha uwo kene bakhwinya babo.
