LISHOMO 04
Nnungu ni Nyani?
Kwaumwiu tangu kala, vanu vankulipudya kwa vannungu voe. Kanji, Ibibiliya inkuvalanga kenga Nnungu jumo bai ni “nkumene kuvapunda vannungu vanji.” (2 Maimyo 2:5) Nae nyani? Mwa shani nae ni nkumene kuvapunda vannungu vanji valipudya vanu? Mu lishomo ali, tunalipundisha kenga Nnungu alota wako ummanye.
1. Nnungu Lina lyake nyani, na wetu tulota kuulula dashi kummanya nae?
Mu Ibibiliya, Nnungu ankulivalanga. Nae atedoni: “Nangu Yeova. Ali ni lina lyangu.” (Shomya Ishaiya 42:5, 8.) Lina Yeova lipindikuligwe mu shibalaniya na mana ake “Nae ni anatadya kutandedya shalivikidile”. Yeova ankulota wetu tumanye lina lyake. (Kuma 3:15) Tulota kumanya dashi? Nae anditadya lina lyake lyandikigwe mu Ibibiliya myanda 7.000! a Nnungu au “Umu” ni mena la ishima, vankuulula kunshema munu woewoe wavalipudya. Kanji lina Yeova ni lyake tu bai “Nnungu wiu wa kuwa na pai.”—Kumbukumbu 4:39.
2. Ibibiliya itumanyia nyamani kwaupande umwe Yeova?
Ibibiliya ivalanga kenga pakati pa vannungu uti valipudya vanu, Yeova gweka ni Nnungu wiu tu bai. Mwaa nyamani? Dipali dishabaa dyoe. Yeova ankuvanavo madalaka lapashanya namene, na nae gweka yake “ni Wapashanya Namene Mushilambo Uti.” (Shomya Dimu 83:18.) Nae ni “Wadimongo-Uti,” ashi manaake nae ankuvanavo dimongo dyakutandela shinu shoeshoe shalota nae. Nae “andyumba vinu uti”—shilambo na shingumi uti shivele mwanavo. (Maono 4:8, 11) Kuvilingananga na munu woewoe, Yeova andipagwa na andapagwa ngwengwe.—Dimu 90:2.
LAMBELA KUMANYA VYOE
Lalyanga kuvilingananga kupagwite pakati pa mena la ishima na lina limo lya Nnungu. Badae lipundishe mwashi na mwaa shani andikumanyia wako lina lyake.
3. Nnungu ankuvanavo mena loe la ishima, kanji ankuvanavo lina limo tu bai
Pakulota ulole kuvilingananga kupagwite pakati pa mena la ishima na lina lyake, lola VIDEO, na badae mwambangile mwaa shakudya sha mwina.
-
Nyamani shivilinganenge pakati pa lina lya ishima, kenga “Umu”?
Ibibiliya inkuvalanga kenga vanu vankulipudya kwa vannungu na vaumu voe. Shomya Dimu 136:1-3, na badae mwambangile mwaa shakudya sha mwina:
-
“Nnungu wa vannungu” nyani na “Umu wa vaumu” nyani?
4. Yeova ankulota wako umanyena utumile lina lyake
Nyamani shilodya kenga Yeova ankulota wako umanye lina lyake? VIDEO, na badae mwambangile mwaa vyakudya vya mwina.
-
Wako uwona kenga Yeova ankulota lina lyake limanyikane? Mwaa nyamani?
Yeova ankulota vanu vamanye lina lyake. Shomya Valoma 10:13, na badae mwambangile mwaa vyakudya vya mwina:
-
Mwaa nyamani ni shinu shikumene kutumila lina limwe Yeova?
-
Wako uligwa dashi munu akakumbukila na kutumila lina lyako?
-
Wako wona kenga Yeova aligwa dashi pautumila lina lyake?
5. Yeova alota ummandikenamene nae
Nkongwe wa ku Camboja wa lina Soten anditangola kenga kulipundisha lina limwe Nnungu kundimpwashela nae “kuligwa shana mushilambo.” Lola VIDEO, na badae tunambangila mwaa shakudya shaatika.
-
Mu video, Soten ambukishigwe dashi kwa kulipundisha Ibibiliya?
Ukanava kuva mbodi wa munu woewoe, shitandi ulambela kumanya lina lyake. Shomya Tiyagu 4:8a, na mwambangile mwaa vyakudya vya mwina:
-
Yeova akulalike pakulota utende nyamani?
-
Kumanya na kutumila lina limwe Nnungu kukupwasheladashi kuligwa kenga unimmandika namene nae?
VANU VANJI VANKUSHIDONI: “Apali Nnungu wiu jumo bai, kanji anatutanana shinupatunshema nae.”
-
Wako unkukulupila kenga Nnungu lina lyake ni Yeova?
-
Ulota kwigwinia dashi kenga Nnungu ankulota wetu tutumile lina lyake?
KWAUNGWIPI
Yeova ni lina lya Nnungu wiu jumo bai. Nae ankulota wetu tumanye na tutumile lina lyake pakulota tummandike.
Tukumbukilange
-
Yeova ankuvilingananga dashi na vannungu vanji valipudya vanu?
-
Mwaa shani ni shambone kutumila lina lya Nnungu?
-
Nyamani shilodya kenga Yeova ankulota wako ummandike nae?
LIPUNDISHE
Lalyanga dishabaa mwanu ditutenda kukubali kenga Nnungu apali.
Tanana mwaa shani kukulupila kenga Nnungu apali ngwengwe ni shinu shakuvanavo mana.
“Ni Nani Aliyemuumba Mungu?” (Mnara wa Mlinzi, Agosti 1, 2014)
Lipundishe mwaa shani ituvaikidile tutumila lina limwe Nnungu, ata tukanamanya mwashi mwavashishamela kala.
Da tunkuulula kunshema Nnungu kwa inamuna yoeyoe? Lola mwaa shani tunkuulula kutangola kenga ave na lina lyake.
a pakulota upate vyakwanjadyeka vinji mana ake lina lya Nnungu na mwaa shani vanu vanji vandyumya lina alyo mu Ibibiliya pavashipindikula, lola Apêndice A4 mu Tradução do Novo Mundo das Escrituras Sagradas.
