មេរៀនទី០៤
តើព្រះពិតជានរណា?
តាំងពីសម័យបុរាណមក មនុស្សបានគោរពប្រណិប័តន៍ព្រះផ្សេងៗជាច្រើន។ ប៉ុន្តែ គម្ពីរបានប្រាប់ថាមានព្រះមួយដែល«ខ្ពង់ខ្ពស់ជាងព្រះណាទាំងអស់»។ (ប្រវត្តិហេតុទី២ ២:៥) តើព្រះនោះជានរណា? តើអ្វីធ្វើឲ្យលោកខ្ពង់ខ្ពស់ជាងព្រះឯទៀតទាំងអស់ដែលមនុស្សគោរពប្រណិប័តន៍? ក្នុងមេរៀននេះ សូមរៀនអំពីអ្វីដែលព្រះដ៏ខ្ពង់ខ្ពស់នោះ ចង់ឲ្យអ្នកដឹងអំពីលោក។
១. តើព្រះពិតមានឈ្មោះអ្វី? ហើយតើយើងអាចប្រាកដយ៉ាងណាថាលោកចង់ឲ្យយើងស្គាល់ឈ្មោះរបស់លោក?
នៅក្នុងគម្ពីរ ព្រះណែនាំខ្លួនលោកឲ្យយើងស្គាល់ ដោយមានប្រសាសន៍ថា៖ «ខ្ញុំជាយេហូវ៉ា នេះហើយជានាមរបស់ខ្ញុំ»។ (សូមអាន អេសាយ ៤២:៥, ៨) «យេហូវ៉ា»ជានាមឬឈ្មោះដែលបានត្រូវបកប្រែជាភាសាហេប្រឺ តាមមើលទៅមានន័យថា«លោកធ្វើឲ្យក្លាយជា»ឬ«លោកធ្វើឲ្យកើតមក»។ ព្រះយេហូវ៉ាចង់ឲ្យយើងស្គាល់ឈ្មោះរបស់លោក។ (ដំណើរចាកចេញ ៣:១៥) ហេតុអ្វីយើងដឹង? ដោយសារនៅក្នុងគម្ពីរមានឈ្មោះរបស់លោកជាង៧.០០០ដង! a យេហូវ៉ាជាឈ្មោះរបស់«ព្រះពិត»នៃសកលលោកទាំងមូល។—ការបំភ្លឺច្បាប់ ៤:៣៩
២. តើគម្ពីរប្រាប់អ្វីខ្លះអំពីព្រះយេហូវ៉ា?
គម្ពីរប្រាប់ថាក្នុងចំណោមព្រះទាំងអស់ដែលមនុស្សគោរពប្រណិប័តន៍ មានតែព្រះយេហូវ៉ាប៉ុណ្ណោះដែលជាព្រះពិត។ ហេតុអ្វី? ដោយសារមានមូលហេតុមួយចំនួន។ ព្រះយេហូវ៉ាមានអំណាចខ្លាំងក្រៃលែង ហើយមានតែលោកប៉ុណ្ណោះដែល«ខ្ពង់ខ្ពស់បំផុតលើផែនដីទាំងមូល»។ (សូមអាន ចម្រៀងសរសើរព្រះ ៨៣:១៨) លោកមាន«ឫទ្ធានុភាពខ្លាំងក្លាបំផុត» មានន័យថាលោកមានសមត្ថភាពធ្វើអ្វីក៏ដោយដែលលោកចង់ធ្វើ។ លោកបាន«បង្កើតអ្វីៗទាំងអស់» ពោលគឺលោកបានបង្កើតសកលលោកនិងជីវិតទាំងអស់នៅផែនដី។ (ការបើកបង្ហាញ ៤:៨, ១១) ព្រះយេហូវ៉ាខុសពីព្រះឯទៀតទាំងអស់ លោកគ្មានទីចាប់ផ្ដើម ហើយលោករស់ជារៀងរហូត។—ចម្រៀងសរសើរព្រះ ៩០:២
បង្កើនចំណេះ
សូមពិចារណាអំពីភាពខុសគ្នារវាងឈ្មោះពិសេសរបស់ព្រះនិងងាររបស់លោក។ យើងក៏នឹងរៀនដែរអំពីរបៀបនិងមូលហេតុដែលលោកប្រាប់ឈ្មោះរបស់លោកឲ្យយើងស្គាល់។
៣. ព្រះមានងារជាច្រើន តែមានឈ្មោះតែមួយ
ដើម្បីមើលភាពខុសគ្នារវាងងារនិងឈ្មោះ សូមលេងវីដេអូ រួចពិភាក្សាសំណួរនេះ៖
-
សូមអ្នកពន្យល់អំពីភាពខុសគ្នារវាងឈ្មោះរបស់ព្រះនិងងាររបស់លោក។
គម្ពីរប្រាប់ថា មនុស្សគោរពប្រណិប័តន៍ព្រះនិងម្ចាស់ជាច្រើន។ សូមអាន ចម្រៀងសរសើរព្រះ ១៣៦:១-៣ រួចពិភាក្សាសំណួរនេះ៖
-
តើនរណាជា«ព្រះលើអស់ទាំងព្រះ»និង«ម្ចាស់លើអស់ទាំងម្ចាស់»?
៤. ព្រះយេហូវ៉ាចង់ឲ្យយើងស្គាល់និងប្រើឈ្មោះរបស់លោក
តើអ្វីបញ្ជាក់ថាព្រះយេហូវ៉ាចង់ឲ្យអ្នកស្គាល់ឈ្មោះរបស់លោក? លេងវីដេអូ រួចពិភាក្សាសំណួរនេះ៖
-
តើអ្នកគិតថាព្រះយេហូវ៉ាចង់ឲ្យមនុស្សស្គាល់ឈ្មោះរបស់លោកឬទេ? ហេតុអ្វី?
ព្រះយេហូវ៉ាចង់ឲ្យមនុស្សប្រើឈ្មោះរបស់លោក។ សូមអាន រ៉ូម ១០:១៣ រួចពិភាក្សាសំណួរដូចតទៅ៖
-
ហេតុអ្វីជាការសំខាន់ឲ្យយើងប្រើឈ្មោះព្រះយេហូវ៉ា?
-
ពេលនរណាម្នាក់ចាំឈ្មោះនិងហៅឈ្មោះរបស់អ្នក តើអ្នកមានអារម្មណ៍យ៉ាងណា?
-
ពេលអ្នកប្រើឈ្មោះព្រះយេហូវ៉ា តើអ្នកគិតថាលោកមានអារម្មណ៍យ៉ាងណា?
៥. ព្រះយេហូវ៉ាចង់ឲ្យអ្នកធ្វើជាមិត្តរបស់លោក
ស្ត្រីម្នាក់ឈ្មោះសូថេន ដែលមកពីប្រទេសកម្ពុជាបាននិយាយថា ពេលគាត់រៀនអំពីឈ្មោះរបស់ព្រះ ធ្វើឲ្យគាត់«មានអារម្មណ៍កក់ក្ដៅក្នុងចិត្តណាស់»។ លេងវីដេអូ រួចពិភាក្សាសំណួរនេះ៖
-
ក្នុងវីដេអូ តើសូថេនមានអារម្មណ៍យ៉ាងណាពេលរៀនអំពីឈ្មោះរបស់ព្រះ?
មុនពេលអ្នកទៅជាមិត្តភក្ដិរបស់នរណាម្នាក់ ធម្មតាអ្នកស្គាល់ឈ្មោះរបស់គាត់សិន។ សូមអាន យ៉ាកុប ៤:៨ក រួចពិភាក្សាសំណួរដូចតទៅ៖
-
តើព្រះយេហូវ៉ាអញ្ជើញអ្នកឲ្យធ្វើអ្វី?
-
ហេតុអ្វីការស្គាល់និងប្រើឈ្មោះរបស់ព្រះជួយអ្នកឲ្យមានអារម្មណ៍ជិតស្និទ្ធនឹងលោក?
មនុស្សខ្លះនិយាយថា៖ «ការហៅព្រះថាម៉េច គឺមិនសំខាន់ទេ»។
-
ចុះអ្នកវិញគិតយ៉ាងណា? តើអ្នកជឿថាយេហូវ៉ាជាឈ្មោះរបស់ព្រះឬទេ?
-
តើអ្នកនឹងពន្យល់យ៉ាងដូចម្ដេចថាព្រះចង់ឲ្យយើងប្រើឈ្មោះរបស់លោក?
សេចក្ដីសង្ខេប
យេហូវ៉ាជាឈ្មោះរបស់ព្រះពិតតែមួយ។ លោកចង់ឲ្យយើងស្គាល់ ហើយប្រើឈ្មោះរបស់លោក ដើម្បីយើងអាចទៅជាមិត្តរបស់លោក។
រៀនសាឡើងវិញ
-
តើព្រះយេហូវ៉ាខុសគ្នាយ៉ាងណាពីព្រះឯទៀតទាំងអស់ដែលមនុស្សគោរពប្រណិប័តន៍?
-
ហេតុអ្វីយើងគួរប្រើឈ្មោះរបស់ព្រះ?
-
តើអ្វីបញ្ជាក់ថាព្រះយេហូវ៉ាចង់ឲ្យអ្នកទៅជាមិត្តរបស់លោក?
ស្វែងយល់ថែមទៀត
សូមពិចារណាមូលហេតុប្រាំយ៉ាងដែលយើងអាចជឿជាក់ថាពិតជាមានព្រះមែន។
ហេតុអ្វីជាការសមហេតុសមផលឲ្យយើងជឿថាមានព្រះយេហូវ៉ានៅគ្រប់សម័យកាល?
«តើអ្នកណាបង្កើតព្រះ?» (ទស្សនាវដ្ដីប៉មយាម ថ្ងៃទី១ ខែសីហា ឆ្នាំ២០១៤)
សូមរៀនអំពីមូលហេតុដែលយើងគួរប្រើឈ្មោះរបស់ព្រះ ទោះជាយើងមិនដឹងប្រាកដរបៀបហៅឈ្មោះរបស់លោកតាមភាសាដើមក៏ដោយ។
តើការហៅឈ្មោះរបស់ព្រះសំខាន់ឬទេ? សូមមើលមូលហេតុដែលយើងដឹងថាលោកមានឈ្មោះតែមួយប៉ុណ្ណោះ។
a ដើម្បីបានព័ត៌មានថែមទៀតអំពីអត្ថន័យឈ្មោះរបស់ព្រះ និងមូលហេតុដែលសេចក្ដីបកប្រែគម្ពីរខ្លះបានដកឈ្មោះរបស់ព្រះចេញ សូមមើលសេចក្ដីពន្យល់បន្ថែម ផ្នែកក៤ ក្នុងគម្ពីរបរិសុទ្ធសេចក្ដីបកប្រែពិភពលោកថ្មី។
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើការរៀនគម្ពីរជាមួយសាក្សីព្រះយេហូវ៉ាគឺយ៉ាងណា?
ការរៀនគម្ពីរជាមួយសាក្សីព្រះយេហូវ៉ាគឺឥតគិតថ្លៃ។ លោកអ្នកអាចប្រើសេចក្ដីបកប្រែណាក៏បាន។ លោកអ្នកអាចអញ្ជើញមិត្តភក្ដិ ឬក្រុមគ្រួសារឲ្យចូលរួមរៀនជាមួយគ្នា។
