MWE LUTLUT 04
Suc God Pwacye?
Muhtwacwacack in pacl meet ah nwe ke pacl inge, mwet uh alu nuh sin god pucspucs. Tuhsruhktuh, Bible uh ahkkahlwemye lah oasr sie God suc “fuhlwact liki god nuhkewa sahyac.” (2 Chronicle 2:5) Suc el uh? Ac meac oruh elan fuhlwact liki god nuhkewa sahyac mwet uh alu nuh se? Ke mwe lutlut se inge, kom ac fah lotwelah lah meac God se inge luhngse kom in etuh kacl.
1. Suc inen God, ac meac ahkkahlwemye lah el luhngse kuht in etuh inel?
God el ahkkahlwemyacl sifacna nuh sesr in Bible. El fahk: ‘Nga Jeova. Pa inge Ek.’ (Riti Isaiah 42:5, 8, BMK.) Ine se inge “Jeova” pa sie lweng ke kahs Hebrew ma oacna in kalmackihn “El Kuh In Oruh Kuhtwena Ma In Sikyak.” Jeova el luhngse kuht in etuh inel. (Exodus 3:15) Kuht etuh fuhkah? Mweyen, el mokle mwet in suhmuhslah inel in Bible pacl 7,000 kuhtuh! a Oasr wal pucspucs luhn God oacna “pahpah lucng” kuh “leum.” Tuhsruhktuh, oasr ine sefanna lal. Ine se inge Jeova ma luhn “God lun kuhsrao ac facluh.”—Deuteronomy 4:39.
2. Meac Bible uh fahkwack kacl Jeova?
Bible uh fahk lah inmahsrlon god nuhkewa ma mwet uh alu nuh se, Jeova pa God pwacye sefanna. Efuh? Oasr srihpac pucspucs. Oasr kuh fuhlwactlacna luhn Jeova, ac el muhkwena pa “Fuhlwactlacna fin facluh nohfohn.” (Riti Psalm 83:18, BMK.) Bible uh pahnglol “Fuhlwactlacna,” mweyen oasr kuh lal in oruh kuhtwena ma el sulaclah in oruh. El “oraclah ma nuhkewa” inkuhsrao ac ma moul nuhkewa fin facluh. (Fwackyuk 4:8, 11) Tiac oacna kuhtwena god sahyac, Jeova el nuhna oasr oemeet me, ac nuh tok ma pahtpaht.—Psalm 90:2.
AHKYOHKYE LUTLUT LOM
Lutlut ahkwoyac ke ma tiac oacna sie ke wal pucspucs luhn God ac ine sefanna lal. Oacyacpac, kom ac fah lotwelah lah el ahkkahlwemye fuhkah inel nuh sum ac efuh.
3. Oasr wal pucspucs luhn God, tuhsruhktuh oasr ine sefanna lal
Tuh in kahlwem lah meac tiac oacna sie ke wal luhn sie mwet ac ke inel, liye VIDEO se. Tohkohyang, sramsramkihn kihsen siyuck se inge.
-
Meac se tiac oacna sie ke wal, oacna “Leum,” ac ke ine se?
Bible uh ahkkahlwemye lah mwet uh alu nuh sin god ac leum pucspucs. Riti Psalm 136:1-3. Tohkohyang, sramsramkihn kihsen siyuck se inge:
-
Suc “God luhn god uh” ac “Leum luhn leum uh”?
4. Jeova el luhngse kom in etuh ac orekmakihn inel
Meac ahkkahlwemye lah Jeova el luhngse kom in etuh inel? Liye VIDEO se, ac tohkohyang, sramsramkihn kihsen siyuck inge.
-
Kom nuhnkuh muh Jeova el luhngse inel in etweyuck sin mwet uh? Efuh?
Jeova el luhngse mwet uh in orekmakihn inel. In Rome 10:13, NW, Bible uh fahk: “Tuh elos nuhkewa suc pahngon nuhke En Jeova elos fah moul.” Tohkohyang, sramsramkihn kihsen siyuck inge:
-
Efuh kuh arlacna yohk srihpac kuht in orekmakihn inen Jeova?
-
Meac kom puhla fin sie mwet el esamack inem ac pahngon kom ke inem?
-
Meac kom nuhnkuh muh Jeova el puhla ke kom orekmakihn inel?
5. Jeova el luhngse kom in mwet kawuck lal
Sie muhtwacn fin acn Cambodia pahngpahng Soten el fahk lah el arlacna engan ke pacl se el etwaclah inen God. Liye VIDEO se, ac tohkohyang, sramsramkihn kihsen siyuck se inge.
-
Ke pacl se ma Soten el etwaclah inen God, ma inge kahsrel fuhkah?
Meet liki kom kuh in eklac kawuck luhn sie mwet, kom enenuh in etuh inel. Riti James 4:8a. Tohkohyang, sramsramkihn kihsen siyuck inge:
-
Meac Jeova el luhngse kom in oruh?
-
Efuh kom kuh in fototoyang nuh sin God kom fin etuh ac orekmakihn inel?
KUHTUH MWET UH FAHK: “Oasr God sefanna, wacngihn ma kac kuht fin orekmakihn na kain in wal pucspucs in pahnglol.”
-
Yac kom luhlahlfongi na pwacye lah inen God pa Jeova?
-
Kom ac ahkuhtweyac fuhkah lah God el luhngse kuht in orekmakihn inel?
MA KUHT LOTWELAH
Jeova pa inen God pwacye sefanna. El luhngse kuht in etuh ac orekmakihn inel tuh kuht kuh in eklac kawuck lal uh.
Kalweni
-
Meac oruh Jeova elan siena liki god pucspucs sahyac ma mwet uh alu nuh se?
-
Efuh kuh kuht enenuh in orekmakihn inen God?
-
Meac ahkkahlwemye lah Jeova el luhngse kom in eklac kawuck lal?
LIYE PAC MA INGE
Lutlutkihn srihpac lihmekohsr ma ahkpwacyeye lah oasr God.
Lutlutkihn lah efuh kuh fal in luhlahlfongiyuck lah God el oasr ac moul pacl nuhkewa?
Lotwelah lah efuh kuht enenuh in orekmakihn inen God, finne kuht tiacna etuh na pwacye lah fuhkah fahkyen inel in pacl meet ah.
Yac yohk srihpac lah kuht ac pahngon God fuhkah? Liye lah efuh kuht kuh in fahk lah oasr ine sefanna lal.
a Ke kuhtuh pac mwe ahkuhtweyac ke kalmeyacn inen God ac efuh kuh kuhtuh lweng luhn Bible itucklac ma inge, liye Appendix A4 ke New World Translation of the Holy Scriptures.
