LUFUNJISHO 04
Nanchi Lesa wa Kine ye Ñanyi?
Pa myaka yonse yaikala bantu pano pa ntanda bapopwela balesa ba bubela bavula bingi. Pano bino, Baibolo witubuula’mba kujitu Lesa umo yenka “mukatampe kukila balesa bonse.” (2 Byambo bya Moba 2:5) Nanchi uno Lesa ye wepi? Kabiji wakila byepi balesa bonse bapopwela bantu? Mu uno mutwe, musakufunda pa uno Lesa byo abena kukeba’mba mumuyuke.
1. Nanchi Lesa ñanyi jizhina, kabiji twayuka byepi amba ukeba atweba kuyuka jizhina janji?
Mu Baibolo, Lesa mwine witubuula jizhina janji. Witongola mwine amba: “Amiwa yami Yehoba. Jino jo jizhina jami.” (Tangai Isaya 42:5, 8.) “Yehoba” ke jizhina jo batuntulula mu Kihebelu jilumbulula’mba “Wikela monse mo Akebela.” Yehoba ukeba’mba tuyuke jizhina janji. (Kulupuka 3:15) Twayuka byepi amba byo byo abena kukeba? Twayuka kino, mambo mu Baibolo jizhina janji jitanwamo bimye kukila pa 7,000! a Yehoba jo jizhina ja “Lesa wa kine mwiulu ne pano pa ntanda.”—Mpitulukilo ya mu Mizhilo 4:39.
2. Baibolo witubuulapo’mba ka pe Yehoba?
Baibolo waamba’mba pa balesa bonse bapopwela bantu, Yehoba ye Lesa wa kine umotu. Mambo ka o twaambila bino? Kuji bishinka byavula bingi byalengela twambe’mba Yehoba ye yenkatu wa kine. Mambo Yehoba uji na bulume bukatampe kabiji aye bunketu ye “Mwine Wakila pano pa ntanda ponse.” (Tangai Salamo 83:18.) Aye ye “wa Bulume Bonse” kulumbulula’mba uji na bulume bwa kuba kintu kyonse kyo akeba. Ye ‘walengele bintu byonse’ bya mwiulu ne bya pano pa ntanda. (Lumwekesho 4:8, 11) Yehoba ye yenkatu waikala myaka ne myaka kabiji ye wa myaka ne myaka.—Salamo 90:2..
FUNJILAIPO BIKWABO
Kebai bishinka mwapusena jizhina mushingi ja kuba’mba Lesa ne jizhina janji mwine. Kabiji yukai ene mambo o emubuujila jizhina janji ne jishinda mo aubila bino.
3. Lesa bamutelela mwavula bingi, bino ujitu na jizhina jimo
Nanchi kyawama kwingijisha jizhina jine ja muntu nyi, inyi kwingijisha ja mushingi? Pa kuba’mba muyuke mukumbu, Tambai VIDYO, ne kwisamba buno bwipuzho.
-
Ñanyi lupusano luji pa jizhina ja mushingi ja kuba’mba “Nkambo” ne jizhina jine?
Baibolo waamba’mba bantu bapopwela balesa bavula bingi ne bankambo bavula. Tangai Salamo 136:1-3, ne kwisamba buno bwipuzho:
-
Nanchi “Lesa wakila balesa bonse” ne “Nkambo wa bankambo” ye ñanyi?
4. Yehoba ukeba’mba mumuyuke ne kwingijishanga jizhina janji
Ñanyi bishinka bimwesha’mba Yehoba ukeba anweba kuyuka jizhina janji? Tambai VIDYO, ne kwisamba ano mepuzho.
-
Mambo ka Yehoba o akebela bantu kuyuka jizhina janji?
Yehoba ukeba bantu kwingijishanga jizhina janji. Tangai Loma 10:13, ne kwisamba ano mepuzho:
-
Mambo ka o kyawamina kwingijisha jizhina ja Lesa ja kuba’mba Yehoba?
-
Mumvwa byepi ku muchima inge muntu wavuluka jizhina jenu kabiji pa kwimwita wimutongola pa jizhina?
-
Mwalanguluka’mba Yehoba umvwa byepi ku muchima inge mwaingijisha jizhina janji?
5. Yehoba ukeba’mba mwikale mulunda nanji
Ba Soten bekala mu kyalo kya Cambodia baambile’mba “kuyuka jizhina ja Lesa wa kine kwibalengejile kwikala bingi na lusekelo mu bwikalo bwabo.” Tambai VIDYO, ne kwisamba buno bwipuzho.
-
Mu vidyo ye mwatamba, kuyuka jizhina ja Lesa kwakwashishe byepi ba Soten?
Pa kuba’mba mwikale mulunda na muntu, patanshi mwafwainwa kuyuka jizhina janji. Tangai Yakoba 4:8a, ne kwisamba ano mepuzho:
-
Ñanyi kintu Yehoba kyo abena kwimwambila kuba?
-
Kuyuka ne kwingijishanga jizhina ja Lesa kukemukwasha byepi kufwenya kwipi ne aye?
BANTU BAMO BAMBA’MBA: “Kujitu Lesa umo, ko kuba’mba jizhina jonse jo nafwainwa kwingijisha kumutelelamo kijitu bulongo.”
-
Nanchi mwaswa kuba’mba Yehoba jo jizhina ja Lesa nyi?
-
Mwafwainwa kulumbulwila byepi muntu kuba’mba Lesa ukeba atweba kwingijishanga jizhina janji?
ÑANYI BISHINKA BYO MWAFUNDA?
Yehoba jo jizhinatu ja Lesa wa kine. Ukeba atweba kumuyuka ne kwingijishanga jizhina janji pa kuba’mba twikale balunda nanji.
Mepuzho a kupitulukamo
-
Yehoba wapusanako byepi na balesa bonse bapopwela bantu?
-
Mambo ka o twafwainwa kwingijishanga jizhina ja Lesa?
-
Ñanyi bishinka bimwesha’mba Yehoba ukeba anweba kwikala mulunda nanji?
KEBAI BISHINKA BIKWABO
Tangai bino bishinka bitanu bimwesha’mba Lesa ko aji.
Mambo ka o kyayilamo kuswa’mba Lesa ko aji?
Yukai ene mambo o twafwainwa kwingijishanga jizhina ja Lesa nangwa kya kuba kechi twayuka bulongo byo bejitongolanga kala ne.
Nanchi kijitu bulongo kwingijisha mazhina ajitu onse pa kutongola Lesa nyi? Monai ene mambo o twambila’mba Lesa ujitu na jizhina jimo.
a Inge mukeba kuyukilapo byavula pa bilumbulula jizhina ja Lesa ne ene mambo mu ma Baibolo amo kyo bafumishamo jino jizhina, monai Bya kulumbulula A4 mu Baibolo wa Binembelo bya Ntanda Ipya.
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
