SUƐI LEBOLII 04
Nɛɛ Cho yɛ Mɛlɛka?
Chɔŋ o sindɔɔ niŋ, waŋchieeya sooluu niŋ mɛlɛkaa bɔɔbɔɔ. Kɛ Baabuiyo soo a Mɛlɛka “cho o bɛndu mbo hiau mɛlɛkaa cheleŋ nda kpou” wo okɔɔ. (Koloniko Diiŋ Ndɔɔ 2:5) Mɛlɛka kuɛɛ cho yɛ koŋ? Yɛɛ tosa yɛ mbo wa o bɛndu mbo hiau mɛlɛkaa cheleŋnda kpou? O suɛi lebolle hei bɛŋgu, a cho sina mɛɛ Mɛlɛka naŋ cho hoo suɛi a ndu okɔɔ wo yeema num ma sina ndu yɛ.
1. Vɛɛ Mɛlɛka nɔ yɛ diolaŋ, nduyɛ yɛɛ chɔm yɛ maa o yeema miŋ sina laŋ?
Mɛlɛka chɔm naa diola ndɔlaŋ o Baabuiyo niŋ. O dimi aa: “Ya cho Chɛhowa ni. Diola nilaŋ la cho laŋ ni.” (Nuawɔ Aisaya 42:5, 8, NWT.) O Hibuluiye niŋ nda soli Chɛhowalaŋ ni ma hivi o sɔɔŋ maŋgalaŋ cheleŋ niŋ. Nduyɛ nyɛ la sim ndo cho ni, “O Nɔla Mbo Tosa Mi Nyɛ O Yeema Wo Yɔŋnuŋ.” Chɛhowa yeema miŋ sina diola ndɔlaŋ. (Ɛsɔdɔɔ 3:15) Vɛɛ naŋ looku yɛ keŋ sina? Diola ndɔlaŋ la cho o Baabuiyo niŋ hiouwɔɔ bɛmbɔɔ 7,000! a “Mɛlɛka tonyaa” o choo choo niŋ a o lɛŋndeŋ choo ndupilɛ kpe nɔ diolaŋ ni aa Chɛhowa.—Chɔŋ 17:3.
2. Yɛɛ Baabuiyo dimullɛ naa a Chɛhowa okɔɔ?
Baabuiyo dimi maa o mɛlɛkaa waŋnda sooluu wa tɛɛŋ kpou, Chɛhowa ndupilɛ kpe cho Mɛlɛka tonyaa ni. Le yɛɛ? Sabulaŋ la cho tau. Chɛhowa nɔ kpaayaa mbo hiau wana o wana, kanifuule ndu cho “Mɛlɛka hiou kpou wo” ni. (Nuawɔ Sam 83:18.) Baabuiyo veelu ndu pɛŋ aa, “Mɛlɛka Kpaaya Kpou Kpou Wo.” Hei sim ni maa nyɛ o nyɛ o yeema pɛ, o nɔla mbo tosa. Ndu toosiaa nyɔɔŋ kpou o choo choo niŋ a o lɛŋndeŋ choo ni. (Sɔɔŋ Chɔɔmaŋndoŋ 4:8, 11) Chɛhowa ndupilɛ kpe nɔ kandɔŋ a lamɛɛlu le ni. Le fɛɛŋ a fɛɛŋ o cho wa.—Sam 90:2.
CHƆƆLU YAASIAA
Kindiŋ ma sina teŋgeŋndo nɛila yɛ yɛla nda veelu Mɛlɛkalaŋ tɛɛŋ, a diola ndɔla kpeekpei laŋ. Okoŋ, a cho sina mɛɛ o chɔm num diola ndɔlaŋ yɛ, a le sabu o chɔm num laŋ ndo.
3. Mɛlɛka nɔ nɛila yɛ yɛla naŋ veelu ndu laŋ, kɛ diolaŋ la pilɛ kpe o nɔ ni
Le teŋgeŋndo sinaa nɛila yɛ yɛla nda veelu waŋndo laŋ tɛɛŋ a diola ndɔla kpeekpeilaŋ, tofa VIDUEIYO hoo, okoŋ mi la suukaŋ o nyunaa hoo choo:
-
Teŋgeŋ yɛɛ cho yɛ “Masanɔɔ” laŋ tɛɛŋ a diolaŋ?
Baabuiyo dimi maa mi waŋnda piɛi mɛlɛkaa a masaa bɔɔbɔɔ. Nuawɔ Sam 136:1-3, okoŋ mi la suukaŋ o nyunaa hoo choo:
-
Nɛɛ cho yɛ ‘Mɛlɛka hiou mɛlɛkaa kpou wo’ a ‘Masa hiou masaa kpou wo’?
4. Chɛhowa yeema num ma sina diola ndɔlaŋ nduyɛ ma soliŋ ndaŋ kpeku
Yɛɛ chɔm yɛ maa Chɛhowa yeema num ma sina diola ndɔlaŋ? Handu VIDUEIYO, okoŋ mi la suukaŋ o nyunalaŋ ndaŋ choo:
-
A yiyaŋ pa maa Chɛhowa yeema mi waŋnda sina diola ndɔlaŋ? Le yɛɛ ŋ yiyaŋ yɛ lende?
Chɛhowa yeema mi waŋnda soliŋ diola ndɔlaŋ kpeku. Nuawɔ Luomaŋnda 10:13, okoŋ mi la suukaŋ o nyunalaŋ ndaŋ choo:
-
Le yɛɛ i cho yɛ suɛi sɔvɛ le diola Mɛlɛkalaŋ soliŋndo kpeku?
-
Vɛɛ kɔllo wa yɛ num te wana ŋ chɔm diola numndaŋ ndo loonuŋ pɛ laŋ, nduyɛ mbo wa num ndaŋ veeloo?
-
O yiyaŋ numndo niŋ, vɛɛ kɔllo wa yɛ Chɛhowa te a wa pɛ diola ndɔlaŋ soliŋndo kpeku?
5. Chɛhowa yeema num ma wa chaaŋ ndɔ
Mɛɛ chua waa o lɛŋnde Kamboodiaaleŋ niŋ diolaŋ Sotɛŋ sina a diola Mɛlɛkalaŋ okɔɔ, mbo dimi maa kani bɛɛ o sinaŋndɔ nyaale o “sɔla le diolaŋ ndaŋ sinaa wo le.” Handu VIDUEIYO, okoŋ mi la suukaŋ o nyunaa hoo choo:
-
O vidueiyo niŋ, vɛɛ kɔllo wa yɛ Sotɛŋ mɛɛ o pɛɛku a diola Mɛlɛkalaŋ okɔɔ?
Mɛɛ ma sina fɛŋ diola waŋndo malaŋ ŋ simnuŋ chaaŋ ndɔ. Nuawɔ Chemisi 4:8a, okoŋ mi la suukaŋ o nyunalaŋ ndaŋ choo:
-
Yɛɛ Chɛhowa yeema yɛ num ma tosa?
-
Te a sina pɛ diola Mɛlɛkalaŋ nduyɛ ma wa laŋ soliŋndo kpeku, vɛɛ keŋ i mala yɛ num ma simnuŋ chaaŋ ndɔ?
TE WAŊNDO DIMI PƐ AA: “Mɛlɛka ndupilɛ kpe cho ni, lelaŋ o nɔ diola cheleŋ te.”
-
A laalaŋ pa maa diola Mɛlɛkalaŋ la cho Chɛhowa ni?
-
Vɛɛ ŋ tɛɛsiallɛ waŋndo maa Mɛlɛka yeema naa miŋ soliŋ diola ndɔlaŋ kpeku?
SƆƆŊ KULLOŊ
Mɛlɛka tonyaa nɔ diolaŋ ni aa Chɛhowa. O yeema naa miŋ sina diola ndɔlaŋ, nduyɛ miŋ soliŋ ndaŋ kpeku le ndu sɔɔŋguuwo ikɛi kpɛɛluŋ.
Nyunala miiŋgaa choo laŋ
-
Yɛɛ tosa yɛ mi Chɛhowa wa teŋgeŋ a mɛlɛkaa cheleŋ waŋnda sooluu wa?
-
Le yɛɛ naŋ nɔ yɛ miŋ soliŋ diola Mɛlɛkalaŋ kpeku?
-
Yɛɛ chɔm yɛ maa Chɛhowa yeema num ma sɔɔŋguu ndu ikɛi kpɛɛluŋ?
CHƆƆLU SƆƆŊ PUM TOFA
Tofawɔ sɔɔŋ ŋ ŋuɛɛnu ŋ chɔm maa Mɛlɛka cho woŋ.
“Baa Mɛlɛka Cho Pa?” (Kɔ o tɛɛŋgei choo)
Tofawɔ vɛlɛ nyɛ tosa miŋ laalaŋ maa Mɛlɛka nɔ kandɔŋ a lamɛɛlu le wo.
Pɛɛku ma sina le sabu naŋ nɔ miŋ soliŋ diola Mɛlɛkalaŋ kpeku wo, o yɔŋ bɛɛ miŋ sina mɛɛ kpeekpei ndaa veelu laŋ sindɛ yɛ le.
“Nɛɛnɛ Cho yɛ Chɛhowa?”(Kɔ o tɛɛŋgei choo)
Baa mi wana veelu bɛɛ diola Mɛlɛkalaŋ te o ve isɔɔ le? Tofawɔ ma che le sabu naŋ dimi maa diolaŋ la pilɛ kpe o nɔ ni wo.
“Vɛɛnɛ Kpɛ Mɛlɛka Nɔ yɛ Diolaŋ?” (Kɔ o tɛɛŋgei choo)
a Le chɔɔloo sinaa nyɛ diola Mɛlɛkalaŋ la sim ndo, a le sabu wanaa hiviaa apum faŋa laŋ o Baabuilaŋ niŋndo, tofa Yau Mala Naa le Diom Mɛlɛkaa Pɛɛkoo Wo, peeleŋ 1-5.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
