DILONGI 04
Nzambi kele nani?
Banda bantu bandaka kuzinga, bakesambilaka banzambi mingi. Kasi, Biblia kena kutubila Nzambi mosi yina ‘kele nene kuluta banzambi nionso yankaka.’ (2 Bansangu 2:5) Nzambi yango nde nani? Mpe yinki kena kusala ti yandi vuanda nene kuluta banzambi nionso yankaka yina bantu kesambilaka? Na dilongi yayi, sosa kulonguka mutindu Nzambi yango mekukimonisa na nge.
1. Nkumbu ya Nzambi kele nani, mpe yinki mutindu beto lenda ndima ti yandi zola beto zaba yau?
Na Biblia, Nzambi mekukimonisa yandi mosi na beto. Yandi metuba: ‘Munu kele Yehova. Yau nde nkumbu na munu.’ (Tanga Yezaya 42:5, 8.) ‘Yehova’ mbangudulu ya nkumbu mosi ya Ebreo yina zola monisa “Yandi kekumaka.” Yehova zola beto zaba nkumbu na yandi. (Kubasika 3:15) Yinki mutindu beto lenda ndimina yau? Nkumbu na yandi kele na Biblia mbala kana 7000! a Nkumbu Yehova kele ya ‘Nzambi ya kedika na dizulu mpe na ntoto.’—Kulonga 4:39.
2. Yinki Biblia metuba na yina metadila nkumbu ya Nzambi?
Biblia metuba ti kati na banzambi nionso yina bantu kesambilaka, Yehova kele Nzambi mosi kaka ya kedika. Samu na yinki? Yakele na bamfunu mingi. Yehova kele na kimfumu yina muntu mosi ve lenda vuanda na yau, mpe yandi kaka kele ‘Muntu yina Meluta Zulu na ntoto ya mvimba.’ (Tanga Nkunga 83:18.) Yandi kele ‘Nkua-Ngolo-Nionso,’ yina memonisa yandi kele na kilendo ya kusala nionso yina yandi zola kusala. Yandi ‘salaka bima nionso’—luyalanganu mpe bima nionso yina kele na luzingu awa na ntoto. (Kusonga 4:8, 11) Na lusuasanu na banzambi yankaka, Yehova kaka kezingaka banda mvula na mvula, mpe yandi kezinga mvula na mvula.—Nkunga 90:2.
KOTA NA MPINDA
Tadila lusuasanu kele kati na batitre ya Nzambi mpe nkumbu na yandi. Na manima longuka mutindu mpe samu na yinki yandi monisaka nge nkumbu na yandi.
3. Nzambi kele na batitre mingi, kasi yandi kele na nkumbu mosi kaka
Samu na kumona lusuasanu yina kele kati na titre ya muntu mpe nkumbu na yandi, tula VIDEO mpe na manima tadila kiuvu yayi melanda.
-
Yinki lusuasanu kele kati na titre, na kifuani ‘Mfumu,’ mpe nkumbu?
Biblia kendimaka ti bantu mingi kesambilaka banzambi mingi mpe bamfumu. Tanga Nkunga 136:1-3, mpe na manima tadila kiuvu yayi:
-
Nani kele “Nzambi ya banzambi” mpe “Mfumu ya bamfumu”?
4. Yehova zola nge zaba mpe nge sadila nkumbu na yandi
Yinki kena kumonisa ti Yehova zola nge zaba nkumbu na yandi? Tula VIDEO, mpe na manima tadila biuvu yayi melanda.
-
Nge mekanisa ti Yehova zola bantu zaba nkumbu na yandi? Samu na yinki?
Yehova zola bantu sadila nkumbu na yandi. Tanga Baroma 10:13, mpe na manima tadila biuvu yayi melanda:
-
Yinki mfunu kele na kusadila nkumbu ya Nzambi, Yehova?
-
Yinki mutindu nge kekukimonaka kana muntu mosi mezaba nkumbu na nge mpe yandi kena kubokila nge na yau?
-
Yinki mutindu Yehova kekukimonaka ntangu nge kena kusadila nkumbu na yandi?
5. Yehova zola nge pusana penepene na yandi
Mama mosi na buala ya Cambodge na nkumbu ya Soten tubaka ti kulonguka nkumbu ya Nzambi sadisaka yandi yandi sepela “kuzinga na ntoto.” Tula VIDEO, mpe na manima tadila kiuvu yayi melanda.
-
Na video yayi, yinki mutindu kulonguka nkumbu ya Nzambi simbaka ntima ya Soten?
Tekila nge kuma nkundi ya muntu mosi, nge kevuandaka na kifu ya kulonguka nkumbu na yandi. Tanga Yakobo 4:8a, mpe na manima tadila biuvu yayi:
-
Yinki Yehova kena kulomba nge nge sala?
-
Yinki mutindu kuzaba mpe kusadila nkumbu ya Nzambi kesadisa nge nge kukimona penepene na yandi?
BANTU YANKAKA METUBA: “Nzambi kele kaka mosi, kasi konso mutindu ya kubokidila yandi kele kuandi na diambu ve.”
-
Nge mendima ti nkumbu ya Nzambi kele Yehova?
-
Yinki mutindu nge lenda sasila na bantu ti Nzambi zola beto sadila nkumbu na yandi?
BUNKUFI
Yehova kele nkumbu ya Nzambi kaka mosi ya kedika. Yandi zola beto zaba mpe beto sadila nkumbu yango, na kusalaka mutindu yina beto lenda pusana penepene na yandi.
Mvutukulu
-
Yinki lusuasanu kele kati na Yehova mpe banzambi nionso yankaka yina bantu kesambilaka?
-
Samu na yinki beto fueti sadila nkumbu ya Nzambi?
-
Yinki kena kumonisa ti Yehova zola nge pusana penepene na yandi?
SOSA
Tadila bamfunu tanu yina memonisa ti Nzambi kele.
Samu na yinki yakele mbote kundima ti Nzambi kezingaka banda mvula na mvula?
Longuka samu na yinki beto fueti sadila nkumbu ya Nzambi, atako beto zaba ve yinki mutindu bavuandaka bokila yau na ntangu ya ntama.
Beto fueti bokila Nzambi konso mutindu beto zola? Tala samu na yinki beto lenda tuba ti yandi kele na nkumbu kaka mosi.
a Samu na kuzaba mambu mingi na yina metadila yina nkumbu ya Nzambi zola monisa mpe samu na yinki bambangudulu yankaka katulaka yau na Bablia, tala Bangindu ya Ngika A4 (Appendice) na Biblia Mbalula ya Nsi-Ntoto ya Mpa.
