LITEYA 04
Nzambe ya solo azali nani?
Banda kala, bato basambelaka banzambe mingi, ata mpe banzambe-basi. Kasi, Biblia elobi ete ezali na Nzambe moko oyo “azali monene koleka banzambe mosusu nyonso.” (2 Ntango 2:5) Nzambe yango nde nani? Mpo na nini azali monene koleka banzambe mosusu nyonso oyo bato basambelaka? Na lisolo oyo, okoyeba makambo oyo Nzambe ya solo alingi oyeba mpo na ye.
1. Nkombo ya Nzambe nani, mpe nini emonisi ete alingi tóyeba yango?
Nzambe ayebisi biso nkombo na ye na Biblia. Alobi: “Ngai Yehova. Yango nde nkombo na ngai.” (Tángá Yisaya 42:5, 8.) Nkombo “Yehova” euti na liloba ya Ebre oyo mbala mosusu elimboli “Akómisaka.” Yehova alingi ete tóyeba nkombo na ye. (Kobima 3:15) Ndenge nini toyebi yango? Biblia etángi nkombo yango mbala koleka 7 000! a Yehova ezali nkombo ya Nzambe kaka moko ya solo “kuna na likoló mpe awa na mabele.”—Kolimbola Mibeko 4:39.
2. Biblia elobi nini mpo na Yehova?
Biblia elobi ete na banzambe nyonso oyo bato basambelaka, Yehova nde azali Nzambe ya solo. Mpo na nini? Mpo na bantina mingi. Yehova azali na bokonzi likoló ya nyonso, mpe kaka ye nde azali “Oyo-Aleki-Likoló na mabele mobimba.” (Tángá Nzembo 83:18.) Biblia elobi ete azali “Mozwi-ya-Nguya-Nyonso,” mpo azali na nguya ya kosala nyonso oyo alingi. Asalá ‘biloko nyonso’, ezala na likoló mpe awa na mabele. (Emoniseli 4:8, 11) Yehova akeseni na bato nyonso, mpo ye azalaki, azali mpe akozala libela na libela.—Nzembo 90:2.
KƆTÁ NA MOZINDO
Luká koyeba bokeseni oyo ezali kati na batitre ya Nzambe mpe nkombo na ye. Luká koyeba mpe ndenge oyo Nzambe alakisi yo nkombo na ye mpe mpo na nini asali yango.
3. Nzambe azali na batitre mingi, kasi kaka na nkombo moko
Mpo na koyeba bokeseni oyo ezali kati na titre ya moto mpe nkombo na ye, talá VIDEO, mpe na nsima yanolá na motuna oyo elandi.
-
Bokeseni nini ezali kati na titre lokola “Nkolo,” mpe nkombo?
Biblia elobi ete bato basambelaka banzambe mpe bankolo mingi. Tángá Nzembo 136:1-3, mpe na nsima yanolá na motuna oyo:
-
Nani nde “Nzambe ya banzambe” mpe “Nkolo ya bankolo”?
4. Yehova alingi oyeba nkombo na ye mpe obenga ye na nkombo yango
Ndenge nini oyebi ete Yehova alingi obenga ye na nkombo na ye? Talá VIDEO, mpe na nsima yanolá na mituna oyo elandi.
-
Okanisi nini: Yehova alingi ete nkombo na ye eyebana? Mpo na nini?
Yehova alingi ete bato bábengaka ye na nkombo na ye. Tángá Baroma 10:13, mpe na nsima yanolá na mituna oyo:
-
Mpo na nini ezali na ntina kobenga Nzambe na nkombo na ye, Yehova?
-
Oyokaka ndenge nini soki moto moko abengi yo na nkombo na yo?
-
Okanisi nini: Yehova akoyoka ndenge nini soki obengi ye na nkombo na ye?
5. Yehova alingi ete okóma moninga na ye
Mwasi moko na nkombo Soten oyo autá na Cambodge alobaki ete koyeba nkombo ya Nzambe epesaki ye “esengo oyo ayoká naino te.” Talá VIDEO, mpe na nsima yanolá na motuna oyo elandi.
-
Na video yango, Soten asalaki nini ntango ayebaki nkombo ya Nzambe?
Mpo na kokóma moninga ya moto moko, olukaka liboso koyeba nkombo na ye. Tángá Yakobo 4:8a, mpe na nsima yanolá na mituna oyo:
-
Yehova asɛngi yo osala nini?
-
Ndenge nini koyeba nkombo ya Nzambe mpe kobenga ye na nkombo yango ekoki kosalisa yo okóma moninga na ye?
SOKI MOTO ALOBI NA YO: “Nzambe azali kaka moko, ezali na ntina te kobenga ye na nkombo na ye.”
-
Ondimi ete Yehova ezali nkombo ya Nzambe?
-
Ndenge nini okoki kosalisa moto ayeba ete Nzambe alingi tóbenga ye na nkombo na ye?
NA MOKUSE
Yehova ezali nkombo ya Nzambe kaka moko ya solo. Alingi ete tóyeba yango mpe tóbenga ye na nkombo yango mpo tókóma baninga na ye.
Bozongeli
-
Mpo na nini Yehova akeseni na banzambe mosusu nyonso oyo bato basambelaka?
-
Mpo na nini tosengeli kobenga Nzambe na nkombo na ye?
-
Nini emonisi ete Yehova alingi okóma moninga na ye?
MAKANISI MOSUSU
Talá makambo mitano oyo emonisi mpenza ete Nzambe azali.
Talá ntina oyo ebongi kondima ete Nzambe azali.
Talá ntina oyo tosengeli kobenga Nzambe na nkombo na ye, ata soki toyebi malamu te ndenge ezalaki kobengama na ebandeli.
Ezali na ntina tóbenga mpenza Nzambe na nkombo na ye? Talá ntina oyo tokoki koloba ete Nzambe azali kaka na nkombo moko.
“Nzambe azalaka na bankombo boni?” (Lisolo oyo ezali na Internet)
a Mpo na koyeba makambo mosusu etali ndimbola ya nkombo ya Nzambe mpe ntina oyo na Babiblia mosusu balongolá nkombo yango, talá Eteni 1 na Mwa buku mpo na koyekola Liloba ya Nzambe.
Talá mpe...
MITUNA OYO BATO BATUNAKA MINGI
Koyekola Biblia elimboli nini?
Na lisalisi ya boyekoli ya Biblia ya ofele oyo Batatoli ya Yehova bayekolaka bato, okoki kosalela libongoli ya Biblia oyo olingi. Koyoka nsɔni te mpo na kobengisa bato nyonso ya libota na yo to baninga na yo mpo básangana na boyekoli na yo.
