ບົດທີ 04
ໃຜແມ່ນພະເຈົ້າ?
ຕັ້ງແຕ່ອະດີດມະນຸດຂາບໄຫວ້ບູຊາຫຼືນະມັດສະການເທບພະເຈົ້າຫຼາຍອົງ. ແຕ່ຄຳພີໄບເບິນເວົ້າເຖິງພະເຈົ້າອົງໜຶ່ງທີ່ “ຍິ່ງໃຫຍ່ກວ່າພະອື່ນໆທັງໝົດ.” (2 ຂ່າວຄາວ 2:5, ລ.ມ.) ໃຜແມ່ນພະເຈົ້າອົງນັ້ນ? ແລະເປັນຫຍັງເພິ່ນຈຶ່ງຍິ່ງໃຫຍ່ກວ່າພະອື່ນໆທັງໝົດທີ່ຜູ້ຄົນນະມັດສະການ? ໃນບົດນີ້ເຈົ້າຈະໄດ້ຮູ້ຈັກເພິ່ນຫຼາຍຂຶ້ນ.
1. ພະເຈົ້າຊື່ຫຍັງ ແລະເຮົາໝັ້ນໃຈໄດ້ແນວໃດວ່າເພິ່ນຢາກໃຫ້ເຮົາຮູ້ຈັກຊື່ນັ້ນ?
ໃນຄຳພີໄບເບິນພະເຈົ້າບອກເຮົາໃຫ້ຮູ້ຈັກຊື່ຂອງເພິ່ນ. ເພິ່ນເວົ້າວ່າ: “ເຮົາແມ່ນເຢໂຫວາ. ນີ້ເປັນຊື່ຂອງເຮົາ.” (ອ່ານເອຊາອີ 42:5, 8, ລ.ມ.) “ເຢໂຫວາ” ແມ່ນຊື່ທີ່ແປມາຈາກພາສາເຮັບເຣີເຊິ່ງໝາຍເຖິງ “ເພິ່ນເຮັດໃຫ້ເປັນ.” ພະເຢໂຫວາຢາກໃຫ້ເຮົາຮູ້ຈັກຊື່ຂອງເພິ່ນ. (ອົບພະຍົບ 3:15) ເຮົາຈະແນ່ໃຈໄດ້ແນວໃດວ່າພະເຈົ້າຢາກໃຫ້ເຮົາຮູ້ຈັກຊື່ຂອງເພິ່ນ? ໃນຄຳພີໄບເບິນມີຊື່ຂອງເພິ່ນຫຼາຍກວ່າ 7.000 ເທື່ອ! a ເຢໂຫວາເປັນຊື່ຂອງ “ພະເຈົ້າທ່ຽງແທ້ ພະອົງເປັນພະເຈົ້າທັງໃນສະຫວັນແລະເທິງໂລກ.”—ພະບັນຍັດ 4:39, ລ.ມ.
2. ຄຳພີໄບເບິນບອກໃຫ້ເຮົາຮູ້ຫຍັງກ່ຽວກັບພະເຢໂຫວາ?
ຄຳພີໄບເບິນເວົ້າວ່າໃນບັນດາພະເຈົ້າທີ່ມະນຸດນະມັດສະການ ພະເຢໂຫວາຜູ້ດຽວເທົ່ານັ້ນທີ່ເປັນພະເຈົ້າທ່ຽງແທ້. ເປັນຫຍັງຈຶ່ງເວົ້າແນວນັ້ນ? ມີຫຼາຍເຫດຜົນ. ພະເຢໂຫວາມີອຳນາດປົກຄອງສູງສຸດແລະເພິ່ນຜູ້ດຽວທີ່ເປັນ “ພະເຈົ້າອົງສູງສຸດແຕ່ອົງດຽວທີ່ປົກຄອງທົ່ວທັງໂລກ.” (ອ່ານຄຳເພງ 83:18, ລ.ມ.) ເພິ່ນມີ “ລິດເດດສູງສຸດ” ເຊິ່ງໝາຍຄວາມວ່າເພິ່ນມີພະລັງທີ່ຈະເຮັດຫຍັງກໍໄດ້ທີ່ເພິ່ນຕ້ອງການ. ເພິ່ນ “ສ້າງທຸກສິ່ງ” ໃນເອກະພົບແລະທຸກສິ່ງເທິງໂລກ. (ພະນິມິດ 4:8, 11) ມີແຕ່ພະເຢໂຫວາຜູ້ດຽວເທົ່ານັ້ນທີ່ມີຊີວິດຢູ່ຕະຫຼອດມາຕັ້ງແຕ່ອະດີດ ແລະເພິ່ນຈະມີຊີວິດຢູ່ຕະຫຼອດໄປ.—ຄຳເພງ 90:2
ຮຽນຮູ້ຫຼາຍຂຶ້ນ
ມາເບິ່ງວ່າຕຳແໜ່ງຂອງພະເຈົ້າແລະຊື່ຂອງເພິ່ນແຕກຕ່າງກັນແນວໃດ. ແລ້ວເບິ່ງວ່າເພິ່ນບອກເຈົ້າໃຫ້ຮູ້ຈັກຊື່ຂອງເພິ່ນແນວໃດແລະເປັນຫຍັງເພິ່ນຈຶ່ງເຮັດແບບນັ້ນ.
3. ພະເຈົ້າມີຫຼາຍຕຳແໜ່ງ ແຕ່ມີຊື່ດຽວ
ເພື່ອຈະເຫັນຄວາມແຕກຕ່າງລະຫວ່າງຕຳແໜ່ງກັບຊື່ ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຕຳແໜ່ງເຊັ່ນ “ພະອົງເຈົ້າ” ກັບຊື່ຕ່າງກັນແນວໃດ?
ຄຳພີໄບເບິນບອກວ່າມີເທບພະເຈົ້າແລະພະຫຼາຍອົງທີ່ຜູ້ຄົນນະມັດສະການ. ອ່ານຄຳເພງ 136:1-3, ລ.ມ. ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃຜແມ່ນ “ພະເຈົ້າຜູ້ຍິ່ງໃຫຍ່ເໜືອພະທັງໝົດ” ແລະ “ຜູ້ເປັນນາຍເໜືອເຈົ້ານາຍທັງຫຼາຍ”?
4. ພະເຢໂຫວາຢາກໃຫ້ເຈົ້າຮູ້ຈັກແລະເອີ້ນຊື່ຂອງເພິ່ນ
ອັນໃດເຮັດໃຫ້ເຫັນວ່າພະເຢໂຫວາຢາກໃຫ້ເຈົ້າຮູ້ຈັກຊື່ຂອງເພິ່ນ? ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຈົ້າຄິດວ່າພະເຢໂຫວາຢາກໃຫ້ທຸກຄົນຮູ້ຈັກຊື່ຂອງເພິ່ນບໍ? ເປັນຫຍັງຈຶ່ງຄິດແນວນັ້ນ?
ພະເຢໂຫວາຢາກໃຫ້ທຸກຄົນໃຊ້ຊື່ຂອງເພິ່ນ. ອ່ານໂຣມ 10:13 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ສຳຄັນແນວໃດທີ່ຈະເອີ້ນພະເຈົ້າດ້ວຍຊື່ເຢໂຫວາ?
-
ເຈົ້າຮູ້ສຶກແນວໃດເມື່ອບາງຄົນຈື່ຊື່ຂອງເຈົ້າໄດ້ແລະເອີ້ນຊື່ນັ້ນ?
-
ເຈົ້າຄິດວ່າພະເຢໂຫວາຮູ້ສຶກແນວໃດເມື່ອເຈົ້າເອີ້ນຊື່ຂອງເພິ່ນ?
5. ພະເຢໂຫວາຢາກໃຫ້ເຈົ້າສະໜິດກັບເພິ່ນຫຼາຍຂຶ້ນ
ຜູ້ຍິງຄົນກຳປູເຈຍຄົນໜຶ່ງຊື່ໂຊແທນດີໃຈຫຼາຍທີ່ໄດ້ຮູ້ຈັກຊື່ຂອງພະເຈົ້າ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນວິດີໂອ ຊີວິດຂອງໂຊແທນເປັນແນວໃດຫຼັງຈາກທີ່ໄດ້ຮູ້ຈັກຊື່ຂອງພະເຈົ້າ?
ກ່ອນທີ່ເຈົ້າຈະເປັນໝູ່ກັບບາງຄົນ ປົກກະຕິແລ້ວເຈົ້າຕ້ອງຮູ້ຈັກຊື່ຂອງລາວກ່ອນ. ອ່ານຢາໂກໂບ 4:8 ສ່ວນ ກ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ພະເຢໂຫວາເຊີນເຈົ້າໃຫ້ເຮັດຫຍັງ?
-
ການຮູ້ຈັກແລະເອີ້ນຊື່ຂອງພະເຈົ້າຈະຊ່ວຍເຈົ້າໃຫ້ສະໜິດກັບເພິ່ນຫຼາຍຂຶ້ນໄດ້ແນວໃດ?
ບາງຄົນເວົ້າວ່າ: “ເອີ້ນແຕ່ພະເຈົ້າກໍພໍ ບໍ່ຕ້ອງເອີ້ນຊື່ເພິ່ນດອກ.”
-
ເຈົ້າເຊື່ອບໍວ່າເຢໂຫວາແມ່ນຊື່ຂອງພະເຈົ້າ?
-
ເຈົ້າຈະອະທິບາຍແນວໃດວ່າພະເຈົ້າຢາກໃຫ້ເຮົາເອີ້ນຊື່ຂອງເພິ່ນ?
ສະຫຼຸບ
ເຢໂຫວາແມ່ນຊື່ຂອງພະເຈົ້າທ່ຽງແທ້ພຽງອົງດຽວ. ເພິ່ນຢາກໃຫ້ເຮົາຮູ້ຈັກແລະເອີ້ນຊື່ນັ້ນເພື່ອຈະສະໜິດກັບເພິ່ນຫຼາຍຂຶ້ນ.
ຄຳຖາມທົບທວນ
-
ພະເຢໂຫວາແຕກຕ່າງຈາກພະອື່ນໆທັງໝົດທີ່ຜູ້ຄົນນະມັດສະການແນວໃດ?
-
ເປັນຫຍັງເຮົາຄວນເອີ້ນຊື່ຂອງພະເຈົ້າ?
-
ອັນໃດເຮັດໃຫ້ເຫັນວ່າພະເຢໂຫວາຢາກໃຫ້ເຈົ້າສະໜິດກັບເພິ່ນ?
ເບິ່ງເພີ່ມເຕີມ
ມາເບິ່ງຫ້າເຫດຜົນທີ່ພິສູດວ່າພະເຈົ້າມີຢູ່ແທ້.
ເປັນຫຍັງເຮົາຈຶ່ງເຊື່ອໄດ້ວ່າພະເຈົ້າມີຊີວິດຢູ່ຕະຫຼອດມາແລະເພິ່ນຈະຢູ່ຕະຫຼອດໄປ.
ມາເບິ່ງວ່າເປັນຫຍັງເຮົາຄວນເອີ້ນຊື່ຂອງພະເຈົ້າ ເຖິງວ່າເຮົາບໍ່ແນ່ໃຈວ່າຄົນສະໄໝກ່ອນອອກສຽງຊື່ນັ້ນແນວໃດ.
ສຳຄັນບໍທີ່ເຮົາຈະເອີ້ນຊື່ຂອງພະເຈົ້າ? ມາເບິ່ງເຫດຜົນທີ່ເຮົາເວົ້າໄດ້ວ່າເພິ່ນມີແຕ່ຊື່ດຽວ.
a ສຳລັບຂໍ້ມູນເພີ່ມເຕີມເລື່ອງຄວາມໜາຍຂອງຊື່ພະເຈົ້າແລະເຫດຜົນທີ່ຄຳພີໄບເບິນບາງສະບັບລຶບຊື່ຂອງເພິ່ນອອກ ໃຫ້ເບິ່ງຢູ່ ພາກຜະໜວກ ກ4 ຂອງພະຄຳພີສະບັບແປໂລກໃໝ່. (ພາສາໄທ)
ເລື່ອງທີ່ເຈົ້າອາດຈະມັກ
ຄຳຖາມທີ່ພົບເລື້ອຍໆ
ເລື່ອງທີ່ໜ້າຮູ້ກ່ຽວກັບການຮຽນຄຳພີໄບເບິນກັບພະຍານພະເຢໂຫວາ
ເມື່ອຮຽນຄຳພີໄບເບິນກັບພະຍານພະເຢໂຫວາ ເຈົ້າຢາກໃຊ້ຄຳພີໄບເບິນສະບັບໃດກໍໄດ້. ເຈົ້າຢາກຊວນຄອບຄົວຫຼືໝູ່ມາຮຽນນຳກໍໄດ້.
