TUTO 04
Mulimu ki Mañi?
Kuzwa feela kwa makalelo, batu fa lifasi sebalapezi milimu yemiñata-ñata. Kono Bibele ibulela kuli kunani feela Mulimu alimuñwi “yomutuna kufita milimu yemiñwi kaufela.” (2 Makolonika 2:5) Ki mañi ona yo? Mi ki lika mañi zetahisa kuli abe yomutuna kufita milimu kaufela yebalapela batu? Mwa tuto ye, lukanyakisisa zabata Mulimu yo kuli muzibe ka za hae.
1. Libizo la Mulimu ki lifi, mi luziba cwañi kuli ubata kuli lulizibe?
Mwa Bibele, Mulimu ulutaluseza libizo lahae. Ulubulelela kuli: “Ki na Jehova. Ki lona libizo laka.” (Mubale Isaya 42:5, 8.) Mwa Siheberu, kubonahala kuli libizo la “Jehova” litalusa “Utahisa Kuba Teñi.” Jehova ubata kuli luzibe libizo lahae. (Exoda 3:15) Luziba cwañi cwalo? Mwa Bibele, libizo la Jehova lifumaneha hafitelela 7,000! a Libizo la Jehova ki la “Mulimu wa niti mwa mahalimu kwahalimu ni fafasi mwa lifasi.”—Deuteronoma 4:39.
2. Bibele ilubulelelañi ka za Jehova?
Bibele ibulela kuli kwa milimu kaufela yebalapela batu, Jehova ki yena feela Mulimu anosi wa niti. Ki kabakalañi? Kunani mabaka amañata. Jehova ki yena feela yanani maata amatuna mi ki yena anosi “Yapahami ka Kufitisisa fahalimwaa lifasi kaufela.” (Mubale Samu 83:18.) Mulimu ki “Yamaata Kaufela,” ili kutalusa kuli unani maata a kueza nto ifi kamba ifi yabata kueza. Ki yena ‘yabupile lika kaufela’ ili kutalusa lika kaufela ze mwa mahalimu hamohocwalo ni lika kaufela zepila ze mwa lifasi. (Sinulo 4:8, 11) Ka kushutana ni nto ifi kamba ifi yepila, Jehova ubile teñi kamita, mi ukazwelapili kuba teñi kuya kuile.—Samu 90:2.
MUBATISISE
Munyakisise shutano yemwahalaa malumbatina a Mulimu ni libizo lahae leliipitezi. Hape mubatisise mo Mulimu azibahalelize libizo lahae ku mina ni libaka haezize cwalo.
3. Mulimu unani malumbatina amañata, kono unani feela libizo lililiñwi
Kuli muzibe shutano yemwahalaa lilumbatina ni libizo lahae, mubuhe VIDIO, mi kihona mukanyakisisa puzo yelatelela.
-
Ki ifi shutano yemwahalaa lilumbatina inge cwalo la, “mulena,” ni libizo?
Bibele ibonisa kuli batu balapela milimu yemiñata ni malena. Mubale Samu 136:1-3, mi kihona mukanyakisisa puzo yelatelela:
-
Ki mañi “Mulimu wa milimu” ni “Mulena wa malena”?
4. Jehova ubata kuli muzibe libizo lahae ni kuitusisa lona
Muziba cwañi kuli Jehova ubata kuli muzibe libizo lahae? Mubuhe VIDIO, mi kihona mukanyakisisa lipuzo zelatelela.
-
Ki kabakalañi hamunahana kuli Jehova ubata kuli batu bazibe libizo lahae?
Jehova ubata kuli batu baitusise libizo lahae. Mubale Maroma 10:13, mi kihona mukanyakisisa lipuzo zelatelela:
-
Ki kabakalañi haluswanela kuitusisa libizo la Mulimu, lona la Jehova?
-
Muikutwanga cwañi mutu yomuñwi hahupula libizo lamina ni kuitusisa lona?
-
Mubona cwañi, Jehova uikutwanga cwañi hamuitusisa libizo lahae?
5. Jehova ubata kuli mube mulikanaa hae
Musali yomuñwi wa kwa Cambodia wa libizo la Soten, naabulezi kuli kuziba libizo la Mulimu ni kukala kuitusisa lona nekumutusize kuba ni tabo mwa bupilo. Mubuhe VIDIO, mi kihona mukanyakisisa puzo yelatelela.
-
Ka kuya ka momubonezi mwa vidio, kuziba libizo la Mulimu nekutusize cwañi bo Soten?
Musikaba kale mulikanaa mutu yomuñwi, mukalanga kuziba libizo lahae pili. Mubale Jakobo 4:8a, mi kihona mukanyakisisa lipuzo zelatelela:
-
Jehova umimema kuli muezeñi?
-
Kuziba libizo la Mulimu ni kuitusisa lona kukona kumitusa cwañi kuba mulikanaa hae?
BABAÑWI BABULELANGA KULI: “Kunani feela Mulimu alimuñwi, kacwalo wakonwa kubizwa ka libizo lifi kamba lifi.”
-
Kana mwalumela kuli Jehova ki lona libizo la Mulimu?
-
Mukona kutaluseza cwañi mutu yomuñwi libaka Mulimu habata kuli luitusise libizo lahae?
LITABA KA BUKUSWANI
Jehova ki lona libizo la Mulimu anosi wa niti. Ubata kuli luzibe libizo leo ni kuitusisa lona ilikuli lube balikani bahae.
Mulundulule
-
Jehova ushutana cwañi ni milimu yemiñwi yebalapela batu?
-
Ki kabakalañi haluswanela kuitusisa libizo la Mulimu?
-
Ki lika mañi zebonisa kuli Jehova ubata kuli mube mulikanaa hae?
MUBONE LITABA ZEÑWI
Munyakisise mabaka a 5 abonisa libaka halukona kukolwa kuli Mulimu uteñi luli.
Munyakisise libaka kulumela taba ya kuli Mulimu ubile teñi kamita hakuswanela.
“Ki Mañi Yabupile Mulimu?” (Tawala ya Mulibeleli, August 1, 2014)
Mulemuhe libaka haluswanela kuitusisa libizo la Mulimu nihaike kuli haluzibi hande mone libizezwanga libizo leo mwa puo ya kwa makalelo.
Kana lwaswanela kuisa pilu kwa taba ya libizo la Mulimu? Hamubone libaka halukona kubulela kuli unani feela libizo lililiñwi.
a Kuli muzibe litaba zeñata ka za taluso ya libizo la Mulimu ni libaka libizo leo halizwisizwe mwa litoloko zeñwi za Bibele, mubone Litaba Zeekelizwe A4 ze mwa Bibele ya Toloko ya Lifasi Lelinca.
Hape Mwendi Mwakona Kutabela Litaba Ze
LIPUZO ZEBUZIWANGA HAÑATA
Tuto ya Bibele Yebazamaisanga Lipaki za Jehova ki Nto Mañi?
Hamunze muituta Bibele ni Lipaki za Jehova, mwakona kuitusisa toloko ya Bibele ifi kamba ifi yemutabela. Mulukuluhile kumema lubasi lwamina kaufela kamba mulikani wamina ufi kamba ufi kuli afumanehe kwa tuto yamina.
