MPANTTA 04
Nluku eekhweeli tipani?
Ikhumelo yompiyeru apinaatamu, atthu anawaaswalela anluku enci oohikhweeli. Masi Ibiiblya inaamuuluma Nluku mmoca “khanle muulupale waavikana anluku akhwaawe otheene.” (2 Ikoronika 2:5) Nlukuni yooyo? Ni nlattuni Ibiiblya ineeraaya wiira uyo khanle Nluku muulupale waavikana anluku akhwaawe otheene? Uyo Nlukuuyo nopheela wiira nyuuva muncuwele. Iyo phi itthu inhaleehu woopela mwaha nhina ula mpanttoola.
1. Nluku ncina nawe tipani? Ni isiyani inthoonyera wiira uyo nopheela wiira hiivano nicuwele ncina nawe?
Mbiiblyani, Nluku nawiihimyaca ncina nawe. Uyo neera: “Mi ki Yehova. Nna phi ncina naka.” (Nsome Isaiya 42:5, 8.) Anamasoma enci aneera wiira “Yehova” ncina neeluuka iheperewu. Nno ncinanno maanaaya wiira “Uyo nawiirannyeeha ile impheelaawe upanka.” Yehova nopheela wiira hiivano nicuwele ncina nawe. (Nkwaha 3:15) Nlattuni ninlamuliyeehu ukupaleela iyo itthwiiyo? Uyo horuma wantikhiya ncina nawe mbiiblyani ikwaha coopwahaka 7.000! a “Nluku eekhweeli wiirimu, uculu, ni watthayani, vathi” phinomphwanela wiihaniya Yehova.—Deuteronomiyu 4:39.
2. Ibiiblya ineera wiira Yehova khanle tipani?
Atthu anawaaswalela anluku enci oovirikana, masi Ibiiblya ineera wiira Yehova paasi phiri Nluku eekhweeli. Nlattuni waneeraaya commo? Nlattu wo citthu cinci. Khaavo rina ukhulupale unvikana Yehova. Phimaana, uyo paasi phikhanle “Nkhulupale otuninya yotheene.” (Nsome Isaalimu 83:18.) Ibiiblya immwiihana uyo “Nakuru Cotheene” kontha haana ikuru yoopanka khula itthu impheelaawe. Uyo ‘humpa citthu cotheene’—irimu, ituninya ni citthu cotheene cimphwanyannya va watthayani va. (Apokalipise 4:8, 11) Yehova paahi phihumpiye; uyo haavo nenne no khalayi ni naahala ukhala mpaka.—Isaalimu 90:2.
MUNCERERE WIITTHUCA WINYU
Mwiitthuce mananna cinvirikanaaya ncina na Nluku nihinlikananiya ni mananna menci neehaniyaawe. Ciicammo moone mananna uyo cuucuwelihilyaaweni ncina nawe ni nlattuni pankilyaawe commo.
3. Nluku haana mananna menci owiihaniya, masi rina ncina nimoca paasi
Niireke inanna ntthu cineehaneliyaawe wiira attitthimihiye ni cineehaneliyaawe ncina nawe, unaavirikana? Wiira ncuwele waakhuliya waya, moone IVIDIYU, ni mwamalihaka woona, moopele mwaha nna nikohonna:
-
Manannani cinvirikanaaya ncina ni inanna yo wiihaneliya ntthu wiira attitthimihiye, toko “Pwiiya”?
Ibiiblya ineera wiira atthu anawaaswalela anluku enci ni mapwiiya enci. Nsome Isaalimu 136:1-3, ni mwamalihaka usoma, moopele mwaha nna nikohonna:
-
Tipani khanle “Nluku aanluku otheene” ni “Pwiiya o mapwiiya otheene”?
4. Yehova nopheela wiira nyuuva ncuwele ncina nawe ni nvarele nteko
Isiyani inthoonyera wiira Yehova nopheela wiira nyuuva ncuwele ncina nawe? Moone IVIDIYU, ni mwamalihaka woona, moopele mwaha nna nikohonna:
-
Woonela winyu, kontha isiyani Yehova nopheelaawe wiira atthu acuwele ncina nawe?
Yehova nopheela wiira atthu aromoleke ncina nawe. Nsome Arooma 10:13, ni mwamalihaka usoma, moopele mwaha ala makohwaala:
-
Kontha isiyani ikhanlyaaya itthu yuulupale uromola ncina na Nluku, Yehova?
-
Nyuuva nneecoona cani mwamoonaka ntthu oopuwelaka ncina ninyu?
-
Woonela winyu, Yehova nokhala cani mwaromolaka ncina nawe?
5. Yehova nopheela wiira nyuuva mmwaattamele
Moone ihantisi yaathiyana amoca olapo yo Camboja aneehaniya Soten. Ayo aneera wiira ucuwela ncina na Nluku ni ucuwela maanaaya isiyani nno ncinanno, ikhanle itthu ‘itepile waatteeliha nrima muukumini waya.’ Moone IVIDIYU, ni mwamalihaka woona, moopele mwaha nna nikohonna:
-
Makhalelo aathiyana aneehaniya Soten, arukunuwile cani ucuwela waya ncina na mwaneene Nluku?
Khawankhitirya ukhala mpatthani antthu, woohipaca toko ucuwela ncina nawe. Nsome Tiyaku 4:8a, ni mwamalihaka usoma, moopele mwaha ala makohwaala:
-
Yehova noolattulani nyuuva upanka isiyani?
-
Ucuwela ncina na Nluku ni uromola nno ncinanno, unhala wuukaviherani cani umpatthanana?
ATTHU AKIINA ANEERA: “Nluku ri mmoca paasi. Phimaana, pooti umwiihana inannani, khinakhala itthu.”
-
Nyuuva nnaakupaleela wiira Nluku ncina nawe Yehova?
-
Nluku nopheela wiira atthu aromole ncina nawe. Nyuuva mwaahala untaphulela cani ntthu iyo itthwiiyo?
UTHIKILELA
Yehova phi ncina na Nluku eekhweeli. Uyo nopheela wiira hiiva nimpatthanane. Phimaana, unaareera ucuwela ncina nawe ni uromola nno ncinanno.
Wuupuwela
-
Kontha isiyani Yehova khanlyaawe oovirikana ni anluku akhwaawe otheene?
-
Kontha isiyani ikhanlyaaya itthu yuulupale uromola ncina na Nluku?
-
Isiyani inthoonyera wiira Yehova nopheela wiira nyuuva mumpatthanane cinene?
MWAPHEELAKA UCUWELA CITTHU CIKIINA
Moone citthu 5 cinthoonyera wiira Nluku haavo.
Moone nlattuni ninlamuliyeehu ukupaleela wiira Nluku khumpiye ni uyo haavo ikhumelo yo khalayi.
Mwiitthuce nlattuni ikhanlyaaya itthu yuulupale uromola ncina na Nluku, hataa ukhalaka wiira khanincuwela mananna caaromoliyaaya khalayi.
Uromola ncina na Yehova uhaana ifayita? Moone nlattuni ninlamuliyeehu ukupaleela wiira Nluku rina ncina nimoca paahi.
“Nluku rina macina makavi?” (Mwaha umphwanyannya nsayitini jw.org)
a Mwapheela ucuwela ncina na Nluku maanaaya isiyani ni kontha isiyani anamataphulela wakumihilyaaya nno ncinanno mbiiblyani, nwehe Apêndice A4 nhina Ibiiblya Tradução do Novo Mundo da Bíblia Sagrada.
