CILONGESA 04
Njambi Iya?
Tunde ku ntsenkulu, vantu ve ku lemesa vanjambi va ku liseza-seza va vamala na va vampuevo. Vunoni Mbimbiliya ya tumbula umo Njambi ua “hiana vanjambi vose.” (2 Mizimbu 2:5) Njambi uaco iya? Kaha vika via mu lingisa ku hiana vakuavo vose? Mu cilongesa cino, tantekeyenu vati Njambi uaco ua lisolola kuli yenu.
1. Njambi lizina lieni iya, kaha vusunga vuka tuli navuo ngecize ua tonda tu litantekeye?
Njambi ua pangesa Mbimbiliya mu ku lisolola kuli yetu. Ngueni: “Ange nji Yehova, likelio lizina liange.” (Tandenu Isaya 42:5, 8.) “Yehova” lia pua lizi lia ciHevelu, lia lomboloka “Ue ku Lingisa Viuma vi Lipuisemo.” Yehova ua tonda tu tantekeye lizina lieni. (Ezundu 3:15) Vati tua tantekeyamo? Muomu ua soneka lizina lieni mu Mbimbiliya vintsimbu vi tuvakana 7.000! a Lizina Yehova lia pua lia “Njambi muilu na hano ha mavu.”—Ndeutelonomi 4:39.
2. Vika ya muesa Mbimbiliya ku tuala hali Yehova?
Mbimbiliya ya muesa ngecize ha kati ka vanjambi vose va ve ku lemesa vantu, Yehova ikeye lika ua pua Njambi ua vusunga. Omo lia vika? Ku li viuma via vingi via lingisa ngoco. Cimo cavio, Yehova ikeye mukua vukama ku hiana vose kaha ikeye lika “Mukua ku Hiana viose hose ha mavu.” (Tandenu Visamo 83:18.) Cikuavo naua, ikeye “Mukua Ngolo yose,” eci ca lomboloka ngecize ua kala na ngolo ya ku linga viose ovio via tonda. Kaha ikeye ua “tangele viuma viose,” melu na mavu na viuma viose vili na muono. (Ku-Solola 4:8, 11) Kaha kasi cikuavo naua, Yehova ikeye lika ua kalako ntsimbu yose, kaha a ka kalako ku ntsimbu yose.—Visamo 90:2.
TANTEKEYENU VIKUAVO
Hilulenu ku litepa ca kala ha vinkumbu via Njambi na lizina lieni mpundu. Mu nima yaco, tantekeyenu mu njila ika kaha omo lia vika ua solola lizina lieni kuli yenu.
3. Njambi ua kala na vinkumbu via vingi, vunoni lizina lieni limo lika
Linga mu mone ku litepa ca kala ha nkumbu na lizina lieni mpundu, Talenu VIDEO, kaha mu nima yaco, simutuilenu ha cihula ci na hatako.
-
Ku litepa cika ca kala ha nkumbu ngeci mua “Sukulu” na lizina mpundu?
Mbimbiliya ya muesa ngecize vantu ve ku lemesa vanjambi na vasukulu va vengi. Tandenu Visamo 136:1-3, kaha mu nima yaco simutuilenu hali eci cihula:
-
Iya “Njambi ua vanjambi” na “Sukulu ya vasukulu”?
4. Yehova a tonda mu mu tantekeye na ku pangesa lizina lieni
Vika via muesa ngecize Yehova ua tonda mu tantekeye lizina lieni? Talenu VIDEO, na ku simutuila ha vihula vi na hatako.
-
Mu ku mona cenu, vuno Yehova ua tonda tu tantekeye lizina lieni ni? Nga mukemuo, omo lia vika?
Yehova ua tonda vantu va tantekeye lizi lieni. Tandenu Loma 10:13, kaha simutuilenu ha vihula evi:
-
Seho ika ya kala ha ku pangesa lizina lia Njambi, Yehova?
-
Vati mue ku livua nga muntu a vuluka lizina lienu na ku mi sanalio?
-
Mu ku mona cenu, vati ue ku livua Yehova ku mutima mu mue ku tumbula lizina lieni?
5. Yehova a tonda mu likuate neni vusamba
Umo mpuevo ua ku Camboja ua lizina Soten ua handekele ngueni, ku tantekeya lizina lia Njambi ca mu kuasa ku ivua ndzolela ize “ka vuile mu muono ueni uose.” Talenu VIDEO, kaha simutuilenu ha cihula ci na hatako.
-
Mu video, vati ku tantekeya lizina lia Njambi ca kuatele ku muono ua Soten?
Muntu nga a tonda ku likuata vusamba na mukuavo, cimo ca viuma via katete ce ku linga, ku tantekeya lizina lieni. Tandenu Tiango 4:8a, kaha mu nima yaco simutuilenu ha vihula evi:
-
Yehova ua mi lania mu linge vika?
-
Vati ku tantekeya lizina lia Njambi kaha na ku lipangesa ci hasa ku mi kuasa ku likuata neni vusamba?
VAMO VE KU HANDEKA NGUAVO: “Njambi umo lika, ngeci mukemuo muose-omuo mu tu mu sana kasi ikeye vene tuli na ku tumbula.”
-
Nenu mua tava ngecize Yehova likelio vene lizina lia Njambi ni?
-
Vati mu hasa ku lomboluela ku muntu ngecize Njambi ua tonda tu pangese lizina lieni?
VI MU NA LILONGESA
Yehova, lia pua lizina lia Njambi umo lika ua vusunga. Kaha ua tonda tu tantekeye lizina liaco na ku lipangesa linga tu hase ku likuata neni vusamba.
Mpupulule
-
Vati Yehova ua litepa na vanjambi veka vose va ve ku lemesa vantu?
-
Omo lia vika tua pande ku pangesa lizina lia Njambi?
-
Vika via muesa ngecize Yehova ua tonda mu likuate neni vusamba?
KONKENUHO
Hilulenu ha vukaleho vutanu vua tu hana vusunga ngecize Njambi kua kala.
Hilulenu omo lia vika ku tava ngecize Njambi ka kele na vuputukilo ni vumanusuilo, ka ca puile ku sevuka.
Tantekeyenu omo lia vika tua pande ku pangesa lizina lia Njambi ambe nga ka tu tantekeya mpundu vati va kele na ku litumbula ku laza.
Vuno Njambi ua haka seho ku cifua ci tue ku mu tumbuilamo ni? Talenu omo lia vika tu hasa ku handeka nguetu Njambi ua kala na lizina limo lika.
a Nga mu tonda ku tantekeya vikuavo ku tuala ha viuma vi lia lomboloka lizina lia Njambi kaha nomo lia vika vamo vakua ku langulula Mbimbiliya va litundisamo, talenu ha mafo 195-197 mu livulu Vika Mpundu vi i Longesa Mbimbiliya?
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
