OSHILESHWA 04
Kalunga oye lye?
Okuza konalenale, aantu oya kala haya longele iikalunga noku yi galikana. Oyindji yomuyo omathano gaalumentu nogaakiintu. Ihe Ombiimbeli oya popya Kalunga gumwe awike ngoka “omunene e vule ookalunga ayehe yalwe.” (2 Ondjalulo 2:5) Mbela Kalunga ngoka oye lye? Oshike she mu ningitha a kale omunene e vule ookalunga ayehe yalwe mboka aantu haya longele? Moshileshwa shika, oto ki ilonga shoka Kalunga ngoka a hala wu tseye kombinga ye.
1. Edhina lyaKalunga olye, notu shi shi ngiini kutya okwa hala tu li tseye?
Kalunga okwe tu lombwela edhina lye mOmbiimbeli. Ombiimbeli otayi ti: “Jehova Ofule; edhina lye Jehova.” (Lesha Eksodus 15:3, OB-1954.) Edhina ndyoka “Jehova” olyOshihebeli neityo lyalyo otali vulu okuuviwa ko kutya “Oha ningitha.” Jehova okwa hala tu tseye edhina lye. (Eksodus 3:15) Otu shi shi ngiini kutya okwa hala tu li tseye? Oshoka sho Ombiimbeli ya nyolwa petameko edhina lye olya holoka mo lwiikando yi vulithe 7 000. a Edhina Jehova olyo edhina lyaKalunga kashili, “Kalunga komegulu nokombanda yevi.” — Deuteronomium 4:39.
2. Ombiimbeli otayi tu lombwele shike kombinga yaJehova?
Ombiimbeli otayi ti kutya mokati kookalunga ayehe mboka aantu haya longele, Jehova oye awike Kalunga kashili. Omolwashike mbela? Opu na omatompelo ogendji. Jehova oku na oonkondo dha shiga ko noye awike “Omupangeliawike kombanda yevi alihe.” (Lesha Episalomi 83:18.) Oye “Omunankondoadhihe,” sha hala okutya, oku na oonkondo dhokuninga kehe shoka a hogolola okuninga. Oye a “shiti iinima ayihe” megulu nokombanda yevi. (Ehololo 4:8, 11) Oye awike a kala ko nalenale nota kala ko aluhe sigo aluhe. — Episalomi 90:2.
ILONGA OSHINDJI
Ilonga oshindji kombinga yeyooloko pokati komadhinasimaneko gaKalunga nedhina lye ndyoka li ikalekelwa. Oto ka mona wo nkene e ku hololela edhina lye nosho wo kutya omolwashike e shi ku ningila.
3. Kalunga oku na omadhinasimaneko ogendji, ihe oku na owala edhina limwe
Opo wu mone eyooloko pokati kedhinasimaneko lyomuntu nedhina lye, dhana OKAVIDIO, e tamu kundathana epulo tali landula.
-
Eyooloko lini li li pokati kedhina nosho wo edhinasimaneko, ngaashi Omuwa?
Ombiimbeli oye shi popya kutya aantu ohaya longele ookalunga nosho wo aawa oyendji. Lesha Episalomi 136:1-3, e tamu kundathana epulo tali landula:
-
Olye “Kalunga ngoka e vule ookalunga ayehe” nosho wo “omukwaniilwa gwaakwaniilwa”?
4. Jehova okwa hala wu tseye edhina lye nowu li longithe
Oshike tashi ulike kutya Jehova okwa hala wu tseye edhina lye? dhana OKAVIDIO, e tamu kundathana omapulo taga landula.
-
Mbela sho to dhiladhila, Jehova okwa hala aantu ya tseye edhina lye? Omolwashike to tile ngawo?
Jehova okwa hala aantu yi ithane edhina lye. Lesha Aaroma 10:13, e tamu kundathana omapulo taga landula:
-
Omolwashike sha simana okulongitha edhina lyaKalunga, Jehova?
-
Oho kala wu uvite ngiini uuna omuntu a dhimbulukwa edhina lyoye e ta kala he li ithana?
-
Sho to dhiladhila, Jehova oha kala u uvite ngiini uuna to tumbula edhina lye?
5. Jehova okwa hala wu hedhe popepi naye
Omukulukadhi gwedhina Soten, ngoka ha zi koKambodia okwa ti kutya sho i ilongo edhina lyaKalunga, oshe mu etele enyanyu ndyoka inaa mona nale. Dhana OKAVIDIO, e tamu kundathana epulo tali landula.
-
Ngaashi shu ulikwa mokavidio, sho Soten i ilongo edhina lyaKalunga oshe mu gumu ngiini?
Opo wu pange uukuume nomuntu, owu na tango okutseya edhina lye. Lesha Jakob 4:8a, e tamu kundathana omapulo taga landula:
-
Jehova ote ku hiya wu ninge shike?
-
Okutseya edhina lyaKalunga nokukala ho li longitha, otaku vulu ngiini oku ku kwathela wu hedhe popepi naye?
AANTU YAMWE OHAYA TI: “Kalunga gumwe owala, nakehe gumwe ota vulu oku mu ithana nedhina ndyoka hali tumbulwa melaka lye.”
-
Mbela owi itaala ngaa kutya Jehova olyo edhina lyaKalunga?
-
Oto ka yelithila ngiini yalwe kutya Kalunga okwa hala tu kale hatu tumbula edhina lye?
OWI ILONGO SHIKE?
Jehova olyo edhina lyaKalunga awike kashili. Okwa hala tu li tseye notu li longithe, opo tu hedhe popepi naye.
Omapulo geendululo
-
Jehova okwa yooloka ko ngiini kookalunga yalwe mboka aantu haya longele?
-
Omolwashike twa pumbwa okulongitha edhina lyaKalunga?
-
Oshike tashi ulike kutya Jehova okwa hala wu hedhe popepi naye?
UUYELELE WA GWEDHWA PO
Tala omatompelo gatano ngoka tagu ulike kutya Kalunga oko e li shili.
“Mbela oku na ngaa shili Kalunga?” (Oshitopolwa shi li kepandja lyetu lyokointaneta)
Tala kutya omolwashike shi li pandunge okwiitaala kutya Kalunga oko a kala aluhe.
“Olye a shita Kalunga?” (Oshungolangelo, 1 Septemba 2014)
Ilonga kutya omolwashike tu na okukala hatu longitha edhina lyaKalunga, nonando katu shi kutya olya li hali tumbulwa ngiini petameko.
“Jehova oye lye?” (Oshitopolwa shi li kepandja lyetu lyokointaneta)
Mbela oshi na ngaa oshilonga kutya Kalunga ohatu mu ithana ngiini? Omolwashike tatu vulu okutya oku na owala edhina limwe alike? Lesha oshitopolwa shika.
“Kalunga oku na omadhina gangapi?” (Oshitopolwa shi li kepandja lyetu lyokointaneta)
a Opo wu mone uuyelele wulwe kombinga yeityo lyedhina lyaKalunga nosho wo kutya omolwashike lya kuthwa mo momatoloko gOombiimbeli dhimwe, tala okambo: Ekwatho kungoye wu ilonge Oohapu dhaKalunga, epandja 1-13.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
