WANGƆ 04
Nzapa du na?
Bandandó gã azi ndo vɔrɔ anzapa ndɛ̃́ ndɛ̃́ ndɛ̃́. Kanda Ngbangɔ tɛnɛ tɛnɛ tɛ Nzapa kɔi mɛ “lo ɔ anzapa zu.” (2 Ntango 2:5) Nzapa niko la na? Wa ye mɛ ali ya lo ɔ anzapa zu mɛ azi ndo vɔrɔ nɛ? Na ya wangɔ olo mɔ na hĩngangɔ se mɛ Nzapa fa tɛrɛ lo na mɔ.
1. Ili Nzapa la na, wa ye mɛ ndo fa ya lo ye ya mɔ hĩnga ili lo nɛ?
Nzapa fa e na ili lo ka ya Ngbangɔ. Lo tɛnɛ ya: “Mbi du Yehova. Ili mbi la.” (Di Yisaya 42:5, 8.) Ila mɛ, “Yehova” alo na yanga ti Ebre mɛ alengbi ti fangɔ ya “lo ndo li ya ati.” Gwɛ̃ tɛ Yehova du ya e hĩnga ili lo. (Kobima 3:15) E hĩnga ni ngasia? Elengbi ti tãngɔ ili Yehova kaya Ngbangɔ ɔngɔ fãni 7 000! a Yehova adu ili “bɛta Nzapa ka ndozu nga ge lɛ sese.”—Kolimbola Mibeko 4:39.
2. Ye mɛ Ngbangɔ ndo ha na e na ndo Yehova nɛ?
Azi ndo vɔrɔ anzapa gba, kanda Ngbangɔ tɛnɛ ya bo Yehova kɔi la du bɛta Nzapa. Na lo nɛ? Alo gba la to e ya e tɛnɛ ngaso. Lo-Gbia tɛ Yehova aɔ alo-gbia mɛndɛ̃ zu, bo lo kɔi la lo “Ɔ Ndozu ná tise zu.” (Di Nzembo 83:18.) Lo du “Nvɛ̃ ngunu zu,” afa ya lo na ngunu ti lingɔ ye zu mɛ lo sepala lingɔ ni. Lo “li aye kwɛ zu”—mɛ ka ndozu nga ge tise. (Suma 4:8, 11) Yehova ndó da gã, wa lo nga na ngbãngɔ bwai na bwai.—Nzembo 90:2.
GI HĨNGANGƆ LO MƐNDƐ̃
Gi hĩngangɔ ɔngbi mɛ ka popo ti atitrɛ mɛ Nzapa na ni ná ili lo. Ba se mɛ lo fa na mɔ ili lo, wa na lo nɛ.
3. Nzapa na atitrɛ gba wa lo bo na ila kɔi
Ti nɛngɔ ya mɔ hĩnga ɔngbi mɛ ka popo ti titrɛ mɛ zo kɔi na ni ná ili lo ko, ba VIDEO, wa na pɛni hɛ̃ gbinya ti hũnda olo mɛ.
-
Ɔngbi mɛ ka popo ti titrɛ mɛ “Gbia,” ná ila nɛ?
Ngbangɔ tɛnɛ ya azi ndo vɔrɔ anzapa gba nga na agbia. Di Nzembo 136:1-3, wa na pɛni hɛ̃ gbinya ti hũnda olo mɛ:
-
Zo mɛ “Nzapa tɛ anzapa” nga “Gbia tɛ agbia” na?
4. Gwɛ̃ tɛ Yehova du ya mɔ hĩnga ili ni wa mɔ ndo di nga ni
Ye mɛ ndo fa ya, Yehova ye ya mɔ hĩnga ili lo nɛ? Ba VIDEO, wa na pɛni hɛ̃ gbinya ti ahũnda olo mɛ.
-
Mɔ da bɛ ya gwɛ̃ tɛ Yehova du ya azi hĩnga ili lo? Wa na lo nɛ?
Gwɛ̃ tɛ Yehova du ya azi ndo di ili ni. Di Roma 10:13, wa na pɛni hɛ̃ gbinya ti ahũnda olo mɛ:
-
Nda mɛ adu ngbondoni ya e ili Nzapa na ili lo ti Yehova nɛ?
-
Mɔ lengbi ti mangɔ tɛrɛ mɔ ngasia se du ya zo kɔi ili mɔ na ili mɔ bere lo di ni nɛ?
-
Mɔ da bɛ mɔ ya nɛ, Yehova ndo ma ngasia na ngoi mɛ mɔ ndo ili lo na ili lo nɛ?
5. Yehova ndo du na gwɛ̃ ya mɔ ti kwa lo
Wali kɔi mɛ zo ti Cambodge ili lo la Soten tɛnɛndó ya, hĩngangɔ ili Nzapa a hɛ̃ndó ni, “kota dengɔ bɛ nvɛ̃ni.” Ba VIDEO, wa na pɛni hɛ̃ gbinya ti ahũnda olo mɛ.
-
Na ya video mɛ, ye mɛndó Soten li na ngoi mɛndó lo hĩnga ili Nzapa nɛ?
Uzu ti nɛngɔ ya mɔ ti kwa zo kɔi ko, ayɔ ya mɔ gi hĩngangɔ ili lo. Di Zaki 4:8a, wa na pɛni hɛ̃ gbinya ti ahũnda olo mɛ:
-
Ye mɛ Yehova yɔ ka ti mɔ ya mɔ li nɛ?
-
Na lo nɛ la, hĩngangɔ ili Nzapa nga na ilingɔ lo na ili lo alengbi ti zangɔ mɔ ya mɔ ti kwa lo nɛ?
AZI MƐNDƐ̃ NDO TƐNƐ YA: “Nzapa bo kɔi, wa ta tina ti ilingɔ lo na ili lo da ma.”
-
Mɔ ndo ye ya ili Nzapa la Yehova?
-
Ngasia la mɔ lengbi ti kambisangɔ hɛ̃ zo mɛndɛ̃ ya Nzapa na gwɛ̃ ya e ili lo na ili lo nɛ?
NA NDUNU NI
Yehova du ili Nzapa kɔi ti bɛtani. Lo na gwɛ̃ ya e hĩnga ili lo, wa e ili lo na ila ni ti nɛngɔ ya e ti akwa lo.
Bozongeli
-
Ye mɛ li ya Yehova ɔngbi na anzapa mɛndɛ̃ mɛ azi ndo vɔrɔ nɛ?
-
Nda mɛ ayɔ ya e ili Nzapa na ili lo nɛ?
-
Ye mɛ ndo fa ya Yehova na gwɛ̃ ya mɔ ti kwa lo nɛ?
AYE MƐNDƐ̃ MƐ MƆ LI
Ba alo kũ mɛ ndo fa ya Nzapa da biani.
Nda mɛ adu nzɔ̃ni yengɔ ya Nzapa da nɛ?
Ba nda mɛ ayɔ ya e ili Nzapa na ili lo, abɛse du ya ta e hĩnga se mɛndó ndo ili na ni na ngoi ti gã ma.
Adu ngbondo ni ya e ili Nzapa na ili lo? Ba nda mɛ elengbi ti tɛnɛngɔ ya Nzapa bo na ila kɔi.
