MWAHA 04
Muluku Taani?
Ovinyerya vaavaa achu apacenryaaya okhala, awo annaalapela amuluku ni minepa seethiyana. Naamwi hiihaa, Piipiliya onnamuloca Muluku mmoha yoowo ori “mutokwenesa wapwaha amuluku othene.” (2 Matharihelo 2:5, BNM) Muluku taani yoowo? Nave tiheeni enamweeriha okhala mutokweenesa waapwaha amuluku oothene achu anaalapelaaya? Mmwaha yoola, munahaala ohuserya yeeyo Muluku onachuneiye wi musuwele vooloca sa yoowo.
1. Nsina na Muluku tinivi, nave tiheeni enooniherya wi onnachuna wi nsuwele?
Mpiipiliyani, Muluku onnanleela nsina nawe. Owo onii: “Miyo ka [Yehova], nsina naka ti nenla.” (Mwaalakhanye Isaiya 42:5, 8.) Nsina nawi “Yehova” mu Ehepiri nnataphulela “Owo Onnakhala Yeeyo Onachuneiye Okhala.” Yehova onachuna wi nisuwele nsina nawe. (Mukwaha 3:15) Nni nroromele hai yeela? Mpiipiliyani nsina nenla ninnaphwanyeya ikwaha opwaha 7.000! a Yehova nsina na “Muluku mmoharu wirimu ni elapo yoothene ya vathi.”—Malamulo 4:39.
2. Tiheeni Piipiliya onanleeleiye vooloca sa Yehova?
Piipiliya onaloca wi opwaha amuluku oothene achu anaalapelaaya, Yehova ti Muluku mmoharu eeparipari. Ntakhara heeni? Aakhalavo mathowa mancipale. Yehova ookhalano owerya otokweene, nave owo pahiru tori “Awirimurimu velaponi yothene ya vathi.” (Mwaalakhanye Salumu 83:18, NN.) Piipiliya onnamwiichana owo “a ikuru soothene,” nthowa nawi owo ookhalano owerya wa opaka yeeyo onachuneiye oopaka. Owo ‘mpatusha a ichu soothene’—elapo yoothene ni ikumi soothene veelaponi yavathi. (Wupulula 4:8, 11) Nave pahiru Yehova tokhanle opacerya woopacerya, nave harwa akhalano makuchuwelo.—Salumu 90:2.
OHUSERYA MWAWIISEELA
Muhuserye ohiyana orivovo variyari va masina a ncicimiho a Muluku ni nsina nawe navameekhaaya. Voocharela moone ti mwawiihai nave ntakhara heeni owo oosuwelinheiyeeni nsina nawe.
3. Muluku ookhalano masina mancipale a ncicimiho, nyenya orino nsina nimoha
Wi moone ohiyana orivovo variyari va masina a ncicimiho a muchu ni nsina nawe, moone EXILEMA, nave voocharela muthokororye nikoho nnacharela.
-
Ohiyana taani orivovo variyari va masina a ncicimiho, ntoko “Apwiya,” ni nsina?
Piipiliya onaloca wi achu annaalapela amuluku ancipale ni asipwiya. Mwaalakhanye Salumu 136:1-3, nave voocharela muthokororye nikoho nla:
-
Taani ori “Muluku a amuluku” ni “Pwiya a asipwiya”?
4. Yehova onachuna wi mmusuwele nave mpharihele nsina nawe
Tiheeni enooniherya wi Yehova onachuna wi nyuwaano musuwele nsina nawe? Moone EXILEMA, nave voocharela muthokororye makoho anacharela.
-
Apwanne munuupuwela wi Yehova onachuna wi nsina nawe nsuweliwe? Ntakhara heeni?
Yehova onachuna wi achu ephariheleke nsina nawe. Mwaalakhanye Aroma 10:13, nave voocharela muthokororye makoho ala:
-
Ntakhara heeni ti woochuneya opharihela nsina na Muluku, Yehova?
-
Munoona hai vaavaa muchu mukina onuupuweleiye ni opharihela nsina nanyu?
-
Munuupuwela wi Yehova onoona hai vaavaa munapharihelaanyu nsina nawe?
5. Yehova onachuna wi mukhale nthamwene awe
Muthiyana o Kampoxa oniichaniwa Soten olonce wi “ohuserya nsina na Muluku yaamweeriha okhala oohakalala opwaha khalai.” Moone EXILEMA, nave voocharela muthokororye nikoho nnacharela.
-
Mu exilema, ti mwawiihai osuwela nsina na Muluku yaamvolowenlaaya Soten?
Muhaakumve okhala nthamwene a muchu, munnasuwela nsina nawe. Mwaalakhanye Tiyako 4:8a, nave voocharela mwaakhule makoho ala:
-
Tiheeni Yehova onoowopeiyeeni wi mpake?
-
Ti mwawiihai osuwela ni opharihela nsina na Muluku eneeraaya yookhaviheryeeni omwaacamela yoowo?
ACHU AKINA ANI: “Orivovo pahiru Muluku mmoha, mwawiihiiha hori woochuneya mukhalelo munamwiichanaanyu.”
-
Apwanne munnaroromela wi Yehova nsina na Muluku?
-
Mwaahaala othariha hai mukhalelo Muluku onachuneiye wi nipharihele nsina nawe?
MUKWASU
Yehova nsina na Muluku mmoharu eeparipari. Owo onachuna wi nsuwele nave nipharihele nsina nawe wi nimwaacamele yoowo.
Makoho awuuluulela
-
Ti mwawiihai Yehova oreiye oohiyana ni amuluku oothene achu anaalapelaaya?
-
Ntakhara heeni ninnaphwanela opharihela nsina na Muluku?
-
Tiheeni enooniherya wi Yehova onachuna wi mmwaacamele?
OTHOLATHOLA
Muthokororye mathowa maxexe ananeeriha ororomela wi Muluku ookhala.
Muthokororye ntakhara heeni oryaaya woophwanelela ororomela wi ovinyerya khalai Muluku aakhala.
Muhuserye ntakhara heeni ninnaphwanela opharihela nsina na Muluku, naamwi nihisuwenle mwawaakhwanela mukhalelo naaromoliwaaya woopaceryani.
“Quem é Jeová e por que seu nome é importante?” (Artigo do jw.org)
Apwanne ti woochuneya mukhalelo nnamwiichanaahu Muluku? Moone ntakhara heeni nnalocaahu wi owo orino nsina nimoha navameekhaaya.
a Wa sooleeliherya ikina vooloca sa yootaphulela ya nsina na Muluku nave ntakhara heeni Apiipiliya akina hinnaphwanyeyamo nsina nenla, mmoone Apêndice A4 mu Tradução do Novo Mundo da Bíblia Sagrada.
