THUTO 04
Modimo ke Mang?
Ke go tloga kgale batho ba rapela medimo ya go fapafapana, eupša Beibele e bolela ka Modimo o tee yoo e lego “yo mogolo go feta medimo e mengwe ka moka.” (2 Dikoronika 2:5) Modimo yoo ke ofe? Le gona, ke’ng seo se dirago gore a fete medimo ka moka yeo batho ba e rapelago? Thutong ye, o tlo kwa gore Modimo yoo o itsebiša bjang go wena.
1. Leina la Modimo ke mang, gona re ka tseba bjang gore o nyaka gore re le tsebe?
Ka Beibeleng, Modimo o re botša gore ke yena mang. O re: “Ke nna Jehofa. Ke lona leina la ka.” (Bala Jesaya 42:5, 8.) Leina “Jehofa,” le fetoletšwe go tšwa lelemeng la Seheberu. Go bonagala leina le le era gore, “Yo a Bakago go ba Gona.” Jehofa o nyaka gore re tsebe leina la gagwe. (Ekisodo 3:15) Re tseba seo bjang? Re tseba se ka gobane ka Beibeleng, leina le le ngwadilwe ka makga a fetago a 7 000! a Jehofa ke leina la ‘Modimo wa therešo godimo magodimong, le tlase lefaseng.’—Doiteronomio 4:39.
2. Beibele e re botša eng ka Jehofa?
Beibele e re go medimo ka moka yeo batho ba e rapelago, Jehofa ke yena a nnoši e lego Modimo wa therešo. Ke ka baka la’ng re re’alo? Go na le mabaka a mmalwa. Ka mohlala, Jehofa ke yena a nnoši a nago le matla a bolaodi. Ke ka baka leo e lego, “Yo Godimodimo godimo ga lefase ka moka.” (Bala Psalme 83:18.) Beibele e re ke Modimo “Ramatlaohle.” Se se ra gore o na le matla a go dira selo se sengwe le se sengwe seo a se nyakago. Le gona, ke yena a ‘bopilego dilo ka moka,’ e ka ba legodimong goba lefaseng. (Kutollo 4:8, 11) Ke kgale Jehofa a le gona, e bile o tla dula a le gona go ya go ile.—Psalme 90:2.
ITHUTE KA MO GO TSENELETŠEGO
Ithute ka mo go oketšegilego gore ke ka baka la eng leina la Modimo le fapane le direto tše bjalo ka Morena. Ke moka o kwe gore ke ka baka la eng Modimo a re boditše leina le, le gore o dirile seo bjang.
3. Modimo o retwa ka ditsela tše dintši, eupša o na le leina le letee feela
Na go na le phapano magareng ga go bitša motho ka sereto sa gagwe le go mmitša ka leina la gagwe? E le gore o tsebe karabo, bapalang BIDIO ye, gomme le boledišaneng ka potšišo e latelago:
-
Phapano ke’ng magareng ga leina le sereto se bjalo ka “Morena”?
Beibele e re batho ba rapela medimo e mentši le marena a mantši. Balang Psalme 136:1-3, gomme le boledišaneng ka potšišo e latelago:
-
Ke mang yoo e lego “Modimo gare ga medimo,” le “Morena wa marena”?
4. Jehofa o nyaka gore o mo tsebe le gore o mmitše ka leina la gagwe
Re tseba bjang gore Jehofa o nyaka gore re tsebe leina la gagwe? Bapalang BIDIO ye, gomme le boledišaneng ka dipotšišo tše di latelago:
-
Na o nagana gore Jehofa o nyaka gore batho ka moka ba tsebe leina la gagwe? Ke ka baka la’ng o re’alo?
Jehofa o nyaka gore batho ka moka ba mmitše ka leina la gagwe. Balang Baroma 10:13, gomme le boledišaneng ka dipotšišo tše di latelago:
-
Ke ka baka la’ng go le bohlokwa go šomiša leina la Modimo e lego Jehofa?
-
Wena o ikwa bjang ge motho a gopola leina la gago, e bile a go bitša ka lona?
-
O nagana gore Jehofa yena o ikwa bjang ge re mmitša ka leina la gagwe?
5. Jehofa o nyaka gore o be mogwera wa gagwe
Mosadi yo mongwe yo a bitšwago Soten, yo a tšwago Cambodia, o re: “Ge ke be ke thoma go tseba gore leina la Modimo ke Jehofa, ke ile ka thaba kudu.” Bapalang BIDIO ye, gomme le boledišaneng ka potšišo e latelago.
-
Bidiong ye, Soten o ile a ikwa bjang ge a be a thoma go tseba leina la Modimo?
Pele o ka ba mogwera wa motho yo a itšego, gantši o thoma pele ka go tseba leina la gagwe. Balang Jakobo 4:8a, gomme le boledišaneng ka dipotšišo tše di latelago:
-
Jehofa o nyaka gore o dire’ng?
-
Go tseba Modimo le go diriša leina la gagwe, go ka go thuša bjang gore o be mogwera wa gagwe?
BATHO BA BANGWE BA RE: “Modimo ke Modimo, ga a na leina.”
-
Na wena o a dumela gore Jehofa ke leina la Modimo?
-
O ka hlalosetša batho ba bangwe bjang gore Modimo o nyaka gore re mmitše ka leina la gagwe?
O ITHUTILE ENG?
Jehofa ke leina la Modimo o tee feela wa therešo. O nyaka gore re tsebe leina la gagwe le go mmitša ka lona, e le gore re be bagwera ba gagwe.
Dipotšišo
-
Jehofa o fapana bjang le medimo e mengwe yeo batho ba e rapelago?
-
Ke ka baka la’ng re swanetše go bitša Modimo ka leina la gagwe?
-
Ke’ng seo se bontšhago gore Jehofa o nyaka gore o be mogwera wa gagwe?
ITHUTE KA MO GO OKETŠEGILEGO
Nyaka mabaka a mahlano ao a bontšhago gore ka nnete Modimo o gona.
Ekwa gore ke ka baka la eng e le mo go kwagalago go dumela gore Modimo o be a dutše a le gona.
Ekwa gore ke ka baka la eng re swanetše go diriša leina la Modimo, le ge re sa tsebe tlwaa gore mathomong le be le bitšwa bjang.
Na go na le taba gore re bitša Modimo ka tsela efe? Ekwa gore ke ka baka la eng Modimo a na le leina le letee feela.
“Modimo o na le Maina a Makae?” (Sehlogo seo se lego wepesaeteng)
a Ge e ba o nyaka go tseba ka mo go oketšegilego gore leina la Modimo le ra go reng, le gore ke ka baka la eng Dibeibele tše dingwe di sa diriše leina le, bala pukwana ya Tlhahlo ya go Ithuta Lentšu la Modimo, Karolo 1.
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
