PFUNZIRO 04
Kodi Mulungu ni Mbani?
Kuyambira kale-kale wanthu azinji akunamata mirungu yakunama. Tsono Bibliya limbalewa kuti alipo Mulungu m’bodzi omwe “ni mkulu kuposa mirungu yentse.” (2 Nkhani 2:5) Kodi iye ni mbani? Ndipo n’ciyani comwe cimbamucitisa kukhala mkulu kuposa mirungu yentse yomwe wanthu ambainamata? Mu pfunziro lino munipfunza thangwe ranyi Mulungu umweyu akufuna kuti imwepo mumudziwe.
1. Kodi dzina la Mulungu ni mbani, ndipo timbadziwa tani kuti iye ambafuna kuti tilidziwe dzina lacelo?
Mulungu ambabzidziwikisa kwa ifepano kucokera m’Bibliya. Iye adalewa kuti: “Ine ndine Yahova. Limweri ndiro dzina langu.” (Werengani Zaiya 42:5, 8.) “Yahova” ni kusanduliziridwa kwa dzina la Cihebereu lomwe limbathandauza “Iye Ambacitisa Kuti Bzikwanisike.” Yahova ambafuna kuti tidziwe dzina lace. (Ekisodo 3:15) Kodi timbadziwa tani bzimwebzo? Timbadziwa thangwe mbuto zomwe dzina laceri limbagumanika m’Bibliya zimbapitirira 7000! a Dzina lakuti Yahova nda “Mulungu wacadidi kudzulu na pantsi pano.”—Deuteronomiyo 4:39.
2. Kodi Bibliya limbatiuza ciyani bza Yahova?
Bibliya limbalewa kuti pa mirungu yentse yomwe wanthu ambanamata, Yahova ndiye yekha Mulungu wacadidi. Thangwe ranyi? Pana mathangwe mazinji. Yahova ngwamphanvu-zentse ndipo iye ndiye yekha “Mkululetu pa dziko lentse la pantsi.” (Werengani Salimo 83:18.) Bibliya likambalewa kuti Yahova “Ngwamphanvu-zentse,” bzikufuna kulewa kuti iye ana mphanvu zakucita ciri-centse comwe angafune. Iye “adalenga bzinthu bzentse,” kuyambira cirengedwe na camoyo ciri-centse comwe ciri pa dziko la pantsi. (Apokalipse 4:8, 11) Mwakusiyana na munthu ali-wentse, Yahova ndiye yekha omwe alibe ciyambi, ndipo iye an’dzakhala mpaka muyaya.—Salimo 90:2.
FUFUDZANI BZINANGO
Fufudzani kusiyana komwe kulipo pakati pa madzina yaulemu yomwe Mulungu anayo na dzina lace cairo. Ndipo mukamala pfunzani momwe iye adadziwisira dzina lace kwa imwepo na thangwe lace.
3. Mulungu ana madzina mazinji ya ulemu, koma dzina lace cairo ndibodzi
Kuti muwone kusiyana komwe kulipo pakati pa madzina ya ulemu na dzina lace cairo, onani VIDIYO, ndipo mukamala cezeranani mbvunzo wakutewerayu.
-
Kodi n’kusiyana kuponi komwe kulipo pakati pa dzina la ulemu lakuti “Mbuya” na dzina cairo?
Bibliya limbalewa kuti wanthu ambanamata mirungu mizinji na ambuya azinji. Werengani Salimo 136:1-3, ndipo mukamala cezeranani mbvunzo wakutewerayu:
-
Kodi “Mulungu wa mirungu” na “Mbuya wa ambuya” ni mbani?
4. Yahova akufuna kuti mudziwe dzina lace na kuliphatisa basa
N’ciyani cimbalatiza kuti Yahova an’funa kuti mudziwe dzina lace? Onani VIDIYO, ndipo mukamala cezeranani mibvunzo ikutewerayi.
-
Kodi imwepo mukukumbuka kuti Yahova an’funa kuti dzina lace lidziwike? Thangwe ranyi?
Yahova an’funa kuti wanthu ambaphatise basa dzina lace. Werengani Aroma 10:13, ndipo mukamala cezeranani mibvunzo ikutewerayi:
-
Thangwe ranyi mpsakufunika kumbaphatisa basa dzina la Mulungu, Yahova?
-
Kodi mumbabzibva tani munthu akadziwa dzina lanu na kuliphatisa basa?
-
Kodi imwepo mumbakumbuka kuti Yahova ambabzibva tani mukambaphatisa basa dzina lace?
5. Yahova akufuna kuti mukhale xamwali wace
Mkazi munango wa ku Camboja dzina lace Soten adalewa kuti pomwe adadziwa bza dzina la Mulungu adayamba kukhala na “moyo wabwino.” Onani VIDIYO, ndipo mukamala cezeranani mbvunzo ukutewerayi.
-
Mu vidiyo yomwe mwawonayi, kodi kudziwa bza dzina la Mulungu kwathandiza tani Soten?
Mukanati kukhala pa uxamwali na munthu, mumbayamba mwadziwa dzina lace. Werengani Tiyago 4:8a, ndipo mukamala cezeranani mibvunzo ikutewerayi:
-
Kodi Yahova akufuna kuti mucite ciyani?
-
Kodi kudziwa dzina la Mulungu na kuliphatisa basa kungakuthandizeni tani kukhala pa uxamwali bwa mphanvu na iye?
WANTHU WINANGO AMBALEWA KUTI: “Mulungu ni mʼbodzi, ndipopa tingamucemere moda uli-wentse.”
-
Kodi mumbakhulupira kuti Yahova ni dzina la Mulungu?
-
Kodi mungafotokoze tani kuti Mulungu akufuna kuti timbaphatise basa dzina lace?
KODI MWAPFUNZA CIYANI?
Yahova ni dzina la Mulungu wacadidi. Iye akufuna kuti tidziwe dzina limweri na kuliphatisa basa kuti tikhale pa uxamwali bwa mphanvu na iye.
Mibvunzo yakubwerezera
-
Kodi Yahova ambasiyana tani na mirungu yentse yomwe wanthu ambainamata?
-
Thangwe ranyi tin’funika kumbaphatisa basa dzina la Mulungu?
-
Kodi n’ciyani comwe cimbalatiza kuti Yahova akufuna kuti imwepo mukhale naye pa uxamwali bwamphanvu?
ONANI POMWE IBZI
Onani bzinthu bzixanu bzakutsimikizirika bzomwe bzimbapereka umboni bwakuti Mulungu alipo.
Onani thangwe ranyi mpsakubveka kukhulupira kuti Mulungu alipo kuyambira kale-kale.
“Kodi Mbani Adalenga Mulungu?” (Ntsanza ya Mulindiri ya 1 Agosto, 2014)
Pfunzani thangwe lomwe tin’funikira kuphatisa basa dzina la Mulungu, napo kuti bzikudziwika lini momwe likhacemeredwera kale-kale.
Kodi Mulungu ambawona kuti mpsakufunika kuphatisa basa dzina lace? Onani thangwe lomwe tingalewere kuti dzina lace cairo ndibodzi lokha.
a Kuti mudziwe bzinango bza thandauzo la dzina la Mulungu na thangwe lomwe lidacitisa kuti anyakusandulizira winango wa Bibliya aleke kulinemba, onani Nkhani Zakuthumizira A4 mu Bibliya la Dziko Lipsa.
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
