ƐZUKOALƐDEƐ 04
Nyamenle A Le Nwane?
Alesama ɛzonle nyamenle ngakyile dɔɔnwo mekɛ tendenle. Noko Baebolo ne ka Nyamenle ko mɔɔ “le bedevinli tɛla nyamenle gyɛne biala” la anwo edwɛkɛ. (2 Edwɛkɛsisilɛ 2:5) Yemɔ a le nwane? Na duzu a maa ɔyɛ kpole ɔtɛla nyamenle gyɛne kɔsɔɔti mɔɔ menli sonle bɛ la ɛ? Wɔ ɛzukoalɛdeɛ ɛhye anu, ɛbazukoa kɛzi Nyamenle ɛhye kulo kɛ ɛnwu ye la.
1. Kɛ bɛfɛlɛ Nyamenle ɛ, na duzu a kile kɛ ɔkulo kɛ yɛnwu ye duma a?
Nyamenle ɛmaa yɛnwu ye duma wɔ Baebolo ne anu. Ɔka kɛ: “Medame a mele Gyihova a. Me duma ɛne.” (Kenga Ayezaya 42:5, 8.) “Gyihova” le Hibulu duma mɔɔ ɔ bo kile “Ɔmaa Ɔyɛ Ɛkɛ” la. Gyihova kulo kɛ yɛnwu ye duma. (Ɛzɛdɔso 3:15) Kɛzi yɛkola yɛnwu ye zɔ ɛ? Ye duma ne finde fane mɔɔ bo 7,000 la wɔ Baebolo ne anu! a ‘Nɔhalɛ Nyamenle ne mɔɔ wɔ anwuma lɔ nee azɛlɛ ye azo’ la duma a le Gyihova.—Ditilɔnomi 4:39.
2. Duzu a Baebolo ne maa yɛnwu ye wɔ Gyihova anwo a?
Baebolo ne ka kɛ wɔ nyamenle kɔsɔɔti mɔɔ alesama sonle bɛ la anu, Gyihova angomekye a le nɔhalɛ Nyamenle a. Duzu ati ɔ? Deɛmɔti ɔle zɔ la zonle. Gyihova lɛ tumi kpole, ɛhye ati ɔ ngomekye ala a ɔle “Anwuma Anwumanli wɔ azɛlɛ ye kɔsɔɔti azo a.” (Kenga Edwɛne 83:18.) Ɔdaye a ɔle “Tumivolɛ Bedevinli ne,” mɔɔ kile kɛ ɔlɛ tumi mɔɔ maa ɔkola ɔyɛ debie biala mɔɔ ɔkulo la. Ɔdaye a ‘ɔbɔle ninyɛne kɔsɔɔti a’—anwuma nee aze yɛɛ debie biala mɔɔ lɛ ngoane mɔɔ wɔ zo la. (Yekile 4:8, 11) Gyihova angomekye a wɔ ɛkɛ ne dahuu na ɔbadɛnla ɛkɛ dahuu a.—Edwɛne 90:2.
SUKOA DƆƆNWO
Sukoa ngakyile mɔɔ wɔ Nyamenle amodinli ne mɔ nee ye duma ne mɔɔ ɔ ngomekye a bɛfa bɛfɛlɛ ye anu la anwo ninyɛne dɔɔnwo. Akee sukoa kɛzi yemaa wɔnwu ye duma nee deɛmɔti ɔyɛle zɔ la.
3. Nyamenle lɛ amodinli dɔɔnwo noko ɔlɛ duma kokye
Amaa wɔanwu ngakyile mɔɔ wɔ awie amodinli nee ye duma nu la, ye VIDIO ne, na akee bɛzuzu kpuya ɛhye anwo.
-
Ngakyile boni a wɔ amodinli le kɛ “Awulae” nee awie duma nu a?
Baebolo ne ka kɛ menli sonle nyamenle nee awulae mɔ dɔɔnwo. Kenga Edwɛne 136:1-3, na akee bɛzuzu kpuya ɛhye anwo:
-
Nwane a le “nyamenle ne mɔ Nyamenle ne” nee “awulae mɔ Awulae ne” a?
4. Gyihova kulo kɛ ɛnwu ye duma na ɛfa ɛfɛlɛ ye
Duzu a kile kɛ Gyihova kulo kɛ ɛnwu ye duma a? Ye VIDIO ne na akee bɛzuzu kpuya ɛhye mɔ anwo.
-
Ɛnea a Gyihova kulo kɛ ɛnwu ye duma ɔ? Nzɔne ati ɔ?
Gyihova kulo kɛ menli bɔ ye duma. Kenga Wulomuma 10:13, na akee bɛzuzu kpuya ɛhye mɔ anwo:
-
Duzu ati a ɔhyia kɛ ɛbɔ Nyamenle duma Gyihova ne a?
-
Saa awie kakye wɔ duma na ɔfa ɔfɛlɛ wɔ a, kɛzi ɛte nganeɛ ɛ?
-
Saa ɛfa Gyihova duma ɛfɛlɛ ye a, ɛnea a kɛzi ɔte nganeɛ ɛ?
5. Gyihova kulo kɛ ɛyɛ ɔ gɔnwo
Raalɛ bie mɔɔ bɛfɛlɛ ye Soten mɔɔ vi Cambodia la hanle kɛ Nyamenle duma mɔɔ ɔnwunle ye la boale ye maanle “ɔ nye liele kpalɛ.” Ye VIDIO ne, na akee bɛzuzu kpuya ɛhye anwo.
-
Wɔ vidio ne anu, kɛzi Nyamenle duma mɔɔ Soten nwunle ye la boale ye ɛ?
Fane dɔɔnwo ne ala ɛdimoa ɛnwu awie duma kolaa na wɔayɛ ɔ gɔnwo. Kenga Gyemise 4:8a, na akee bɛzuzu kpuya ɛhye mɔ anwo:
-
Duzu a Gyihova kulo kɛ ɛyɛ a?
-
Kɛzi ɛnwu Nyamenle duma na ɛfa ɛfɛlɛ ye a ɔbamaa wɔayɛ ɔ gɔnwo ɛ?
BIE MƆ KA KƐ: “Nyamenle kokye a wɔ ɛkɛ a, ɔti kɛzi yɛfɛlɛ ye biala la anwo ɛngyia.”
-
Ɛdie ɛdi kɛ Nyamenle duma a le Gyihova ɔ?
-
Kɛzi ɛbahilehile nu wɔahile awie kɛ Nyamenle kulo kɛ yɛfa ye duma yɛfɛlɛ ye ɛ?
EDWƐKƐ TITILI
Nɔhalɛ Nyamenle kokye ne duma a le Gyihova. Ɔkulo kɛ yɛnwu ye duma na yɛfa yɛfɛlɛ ye amaa yɛayɛ ɔ gɔnwo.
Ndinu
-
Duzu a maa Gyihova yɛ ngakyile wɔ nyamenle gyɛne kɔsɔɔti mɔɔ menli sonle bɛ la anu a?
-
Duzu ati a ɔwɔ kɛ yɛfa Nyamenle duma yɛfɛlɛ ye a?
-
Duzu a kile kɛ Gyihova kulo kɛ ɛyɛ ɔ gɔnwo a?
KPONDƐ DƆƆNWO
Sukoa ninyɛne nnu mɔɔ bamaa wɔalie wɔali kɛ Nyamenle wɔ ɛkɛ la.
Sukoa deɛmɔti ɛdie ɛdi kɛ Nyamenle wɔ ɛkɛ ne dahuu a ndelebɛbo wɔ nu la.
Sukoa deɛmɔti ɔwɔ kɛ yɛfa Nyamenle duma yɛfɛlɛ ye, saa bɔbɔ yɛnze kɛzi ɛnee bɛbɔ ye wɔ tete ne la a.
Asoo duma mɔɔ yɛfa yɛfɛlɛ Nyamenle la anwo hyia? Nea deɛmɔti yɛkola yɛka kɛ ɔlɛ duma kokye la.
a Saa ɛkpondɛ mɔɔ Nyamenle duma ne abo kile nee deɛmɔti bɛye bɛvi Baebolo ngilebɛbo bie mɔ anu la anwo edwɛkɛ dɔɔnwo a, nea Mokanwo A4 mɔɔ wɔ Ngɛlɛlera Nwuanzanwuanza—Ewiade Fofolɛ Ngilebɛbo ne anu la.
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
