4. KAPITEL
Wäa es Gott?
Meist soo lang, aus de Menschen jeläft haben, haben dee väl Jetta aunjebät. Oba de Schreft rät von eenen Gott un dee sajcht, dee es “jrata aus aule aundre Jetta” (2. Chronik 2:4). Waut es daut fa een Gott? Un wuarom es dee jrata aus aule aundre Jetta, waut Menschen aunbäden? En dit Kapitel woascht du kjennen lieren, daut Gott haben well, daut du am saust kjanen lieren.
1. Waut es Gott sien Nomen un woo weet wie, daut wie sienen Nomen kjanen sellen?
En de Schreft sajcht Gott ons selfst, wäa hee es. Hee sajcht: “Ekj sie Jehova. Daut es mien Nomen” (läs Jesaja 42:5; 42:8, NW). De Nomen “Jehova” es eene Äwasatunk von de hebräische Sproak, un dee Nomen kaun bedieden: “Hee lat woaren”. Jehova well, daut wie sienen Nomen kjanen (2. Mose 3:15). Woo kjenn wie daut weeten? Na, en de Schreft haft hee dän äwa 7000 Mol loten nenschriewen! a Jehova es de Nomen von dän woaren Gott “em Himmel un oppe Ieed” (5. Mose 4:39).
2. Waut sajcht de Schreft von Jehova?
Mank aul dee Jetta, waut de Menschen aunbäden, es bloos Jehova de woara Gott, sajcht de Schreft. Wuarom? Daut jeft miere Uasoaken doafäa. Wäajen Jehova äwa aules de Macht haft, es hee auleen “de Aulahechsta en de Welt” (läs Psalm 83:19). Hee es “de aulmajchtja Gott” un daut meent, daut hee de Krauft haft, daut hee daut doonen kaun, waut hee well. Hee haft “aules jemoakt”: dän Himmel, de Ieed un aulet Läwen oppe Ieed (Openboarunk 4:8, 11). Bie Jehova es daut aundasch aus bie aulet aundre, hee es noch emma jewast un hee woat uk emma sennen (Psalm 90:2).
DOLLA UNJASTONEN
Gott woat veschieden jenant, oba hee haft mau eenen eensjen Nomen. Finj ut, waut de Unjascheet es. Un lia uk, wuarom Gott die sienen Nomen haft weeten loten un woo hee daut deed.
3. Gott woat veschieden jenant, oba hee haft mau eenen Nomen
Doa es een Unjascheet, woo een Mensch eenjemol jenant woat un waut dän sien rajchta Nomen es. Toom seenen, waut de Unjascheet krakjt es, kjikjt daut VIDEO un dan got toop de Froag derch, waut hia aunjejäft es:
-
Waut es de Unjascheet tweschen woo eena kaun jenant woaren ooda eenem sienen rajchten Nomen?
De Schreft sajcht, daut de Menschen väl Jetta un Haren aunbäden. Läst Psalm 136:1-3 un dan got toop dise Froag derch:
-
Wäa es de “Gott äwa aule Jetta” un de Har “äwa aule Haren”?
4. Jehova well haben, daut du sienen Nomen kjanst un dän uk brukst
Woo weet wie, daut Jehova daut haben well, daut wie sienen Nomen sellen kjanen lieren? Kjikjt daut VIDEO un dan got toop dise Froagen derch:
-
Jleefst du, daut Jehova daut haben well, daut sien Nomen saul bekaunt woaren? Un wuarom?
Jehova well haben, daut de Menschen sienen Nomen brucken sellen. Läst Reema 10:13 un dan got toop dise Froagen derch:
-
Woo wichtich es daut, Gott sienen Nomen, Jehova, to brucken?
-
Woo jeit die daut, wan se die biem Nomen nanen, wäajen dee dän haben em Denkj jehoolen?
-
Un woo denkjt Jehova doaräwa, wan wie sienen Nomen brucken?
5. Jehova well haben, daut du sien Frint best
Eene Fru von daut Launt Kambodscha, waut Sootein heet, säd, daut Gott sienen Nomen kjanen lieren, wia daut baste, waut see jeemols beläft haud. Kjikjt daut VIDEO un dan got toop dise Froag derch:
-
Woo wia daut fa Sootein en daut Video, Gott sienen Nomen kjanen to lieren?
Ea eena wäm kjanen lieet, frajcht eena jeweenlich no dän sienen Nomen. Läst Jakobus 4:8a un dan got toop dise Froagen derch:
-
Waut wenscht Jehova sikj von die?
-
Woo kaun die daut halpen, Gott noda to komen, wan du dän sienen Nomen kjanst un brukst?
WAUT EENJE SAJEN: “Daut es endoont, woo eena Gott nant, dee weet aulmols goot, wäm wie meenen.”
-
Jleefst du daut, daut Gott sien Nomen Jehova es?
-
Woo wurscht du daut utlajen, daut Gott daut haben well, daut wie sienen Nomen brucken sellen?
KAPITEL TOOPJEFOT
Jehova es de Nomen von dän eensich woaren Gott. Hee well, daut wie dän kjanen un uk brucken, om daut wie kjennen siene Frind sennen.
Waut hast du jelieet?
-
Waut es de Unjascheet tweschen Jehova un de aundre Jetta, waut Menschen aunbäden?
-
Wuarom sell wie Gott sienen Nomen brucken?
-
Woo weet wie, daut Jehova haben well, daut wie sellen met am Frind woaren?
MEA NOSIEEKJEN
See mol fief Jrind, waut doa wiesen, daut et eenen Gott jeft.
Unjasto die daut, wuarom wie daut jleewen kjennen, daut Gott noch von emma jewast es.
Lia, wuarom wie Gott sienen Nomen brucken sellen, wan wie uk nich weeten, woo se dän to jane Tiet utjesproaken haben.
Es daut endoont, woo wie Gott nanen? See mol, wuarom wie daut sajen kjennen, daut hee bloos eenen Nomen haft.
Veleicht jleichst du uk dit
WAUT FOAKEN JEFROACHT WOAT
Woo es een Bibelstudium met Jehova siene Zeijen?
Wan Jehova siene Zeijen emsonst met die de Bibel studieren, dan kaust du soone Bibel brucken, aus du west. Doa kaun diene gaunze Famielje met bie sennen un uk Frind, wan du dee enloden west.
