MSOLO 04
Mulungu ni mbani?
Kundoyambira pa chiyambi cha ntundu wa wanthu, wanthu akhala ankutumikira milungu yazinji. Koma Baibolo ichanena va Mulungu yemwe ‘ni nkulu kuposha milungu yose.’ (2 Mbiri 2:5) Iye nimbani? Ndipo ndawa chani iye ni nkulu kuposha milungu yanango? Mulungu moyu achada kuti imwepo mupfunzire va iye. Tiwone vimwevi mu pfunziro mwaino.
1. Ko dzina ya Mulungu ni mbani, ndipo nchani chikuwonesa kuti iye achada kuti tidziwe dzina yake?
Mu Baibolo Mulungu achafotokoza kuti ni mbani. Iye achati: ‘Ine ndine Yahova, imweyi ni dzina yangu.’ (Lewengani Yesaya 42:5, 8.) ‘Yahova’ ni dzina yotsumbudzululiwa mu Chiheberi yomwe inkuwoneka kuti ichathandawuza ‘achakhala yemwe adzafune kukhala.’ Yahova achada kuti tiidziwe dzina yake. (Ekisodo 3:15) Ko tingatsimikize tani vimwevi? Iye adachita vimwevi pakuikha dzina yake m’Baibolo maulendo yoposha 7000! a Dzina yakuti Yahova ni ‘ya Mulungu chaiye wakudzulu na padziko yapasi.ʼ—Deuteronomo 4:39.
2. Ko Baibolo ichati chani va Yahova?
Wanthu achatumikira milungu yazinji, koma Baibolo ichati Yahova ndiye Mulungu chaiye. Ndawa chani tinkunena tene? Panavifukwa vizinji. Palibe anaudindo ukulu kuposha Yahova ndipomwapa iye ‘ni nkulu wa wachilengedwe chose.’ (Lewengani Salimo 83:18.) Iye ni ‘Wamphanvu yose’ ndawa anamphanvu yakuchita vilivose vangafune. Iye ‘adasika vinthu vose’ va kudzulu na vose va padziko yapasi. (Chivumbulutso 4:8, 11) Yahova ndiye yekha Mulungu kuchoka kale-kale, ndipo adzakhalepo mpakana kale-kale.—Salimo 90:2.
PFUNZIRANI VIZINJI
Pfunzirani kusiyana pakati pa madzina yaudindo ya Mulungu na dzina yake chaiyo. Ndipo onani momwe Mulungu adaululira dzina kwa imwepo na ndawa yake adachita vimwevi.
3. Mulungu anamadzina yazinji ya udindo, koma dzina yake ni ibodzi
Ko pali kusiyana pakati pa dzina yaudindo na dzina chaiyo ya munthu? kuti mudziwe n’dawiro wake wonani wonesani VIDIYO, ndipo kambiranani mbvunzo uyu:
-
Ko pali kusiyana kuponi pakati pa dzina chaiyo na dzina ya udindo ninge ‘Ambuya’?
Baibolo ichati wanthu achatumikira milungu na azimbuya azinji. Lewengani Salimo 136:1-3, ndipo kambiranani mbvunzo uyu:
-
Ko ‘Mulungu wa milungu’ na ‘Ambuya wa azimbuya ni mbani’?
4. Yahova achada kuti muidziwe na kuiphatisa basa dzina yake
Ko nchani chinkutsimikizira kuti Yahova achada kuti muidziwe dzina yake? Wonesani VIDIYO, ndipo kambiranani mibvunzo aya:
-
Ndawa chani munkuwona kuti Yahova achada kuti wanthu aidziwe dzina yake?
Yahova achada kuti wanthu ambaphatise basa dzina yake. Lewengani Aroma 10:13, ndipo kambiranani mibvunzo aya:
-
Ndawa chani nivodekana kuphatisa basa dzina ya Mulungu?
-
Ko muchabva tani munthu akakhala kuti ankukumbuka dzina yanu?
-
Ko munkuwona kuti Yahova achabvatani mukambaphatisa basa dzina yake?
5. Yahova achada kuti imwepo mumufenderere maninge
Wonani chitsanzo cha nkazi wa ku Camboja dzina yake Soten. Iye adati kudziwa dzina ya Mulungu na kupfunzira thandauzo yake venze vinthu ‘vokomedza kwa ine.’ Wonesani VIDIYO, ndipo kambiranani mbvunzo uyu:
-
Ko moyo wa Soten udachinja tani pomwe adapfunzira dzina ya Mulungu?
Kuti tikhale shamwali wa munthu, tichadekana kumudziwa dzina yake. Lewengani Yakobo 4:8a, ndipo kambiranani mibvunzo aya:
-
Ko nchani chomwe Yahova ankufuna kwa imwepo?
-
Ko kuidziwa na kuphatisira basa dzina ya Mulungu kungakuthandizeni tani kudzibva kuti muli pafupi na iye?
WANTHU ANANGO ACHATI: ‘Mulungu ni m’bodzi, vilibe basa mwamungamuchemerere.’
-
Ko imwepo muchakhulupirira kuti dzina ya Mulungu ni Yahova?
-
Mulungu achada kuti wanthu ambaphatise basa dzina yake. Ko imwepo mungamuuze tani munthu munango vimwevi?
CHIGWATO
Yahova ni dzina ya Mulungu chaiye. Iye achada kuti ise tifenderere kwa iye. Ndipomwapa nivodekana kudziwa na kuphatisa basa dzina yake.
Kubwerezera
-
Ndawa chani Yahova ni wosiyana na milungu yanango?
-
Ndawa chani nivodekana kuphatisa basa dzina ya Mulungu?
-
Nchani chinkutsimikizira kuti Yahova achada kuti imwepo mufenderere kwa iye?
KUTI MUDZIWE VIZINJI
Onani mpfundo zishanu zowonesa kuti Mulungu aliko.
Onani ndawa yake nivobveka kukhulupirira kuti Mulungu aliko.
Tidziwalini momwe dzina ya Mulungu ingatomololererewa pakuyamba. Pfunzirani ndawa yake nivodekana kuphatisa basa dzina yake podiya viri tene.
Ko ni vabwino kuchemera Mulungu na dzina yake panango neye? Onani ndawa yake tichanena kuti Mulungu anadzina ibodzi.
a Kuti Mudziwe vizinji va thandauzo ya dzina ya Mulungu na kuwona ndawa yake mabaibolo yanango yadachosa dzina ya Mulungu wonani ku Apêndice A4 mu Tradução do Novo Mundo da Bíblia Sagrada.
