LESON 04
Wat Nao Truth Abaotem God?
Start taem olketa man laef lo earth olketa worshipim staka difren god. Bat Bible storyim wanfala God wea “hae winim eni narafala God.” (Mektu Kronikols 2:5) Which God nao datwan? And wat nao mekem hem hae winim evri nara god wea pipol worshipim? Lo disfala leson, bae iu lanem hao God laekem iu for savve lo hem.
1. Hu nao nem blo God, and wat nao showim hem laekem iumi for savve lo hem?
Lo Bible, God introducem hemseleva lo iumi. Hem sei: “Mi nao Jehovah. Hem nao nem blo mi.” (Readim Isaiah 42:5, 8, NW.) Datfala nem “Jehovah” hem kam from wanfala Hebrew nem wea staka savveman sei hem minim “Hem Savve Duim Eni Samting.” Jehovah laekem iumi for savve lo nem blo hem. (Eksodas 3:15) Hao nao iumi savve lo datwan? Nem blo hem stap lo Bible winim 7,000 taem! a Datfala nem Jehovah, “trufala God lo heven antap and lo earth andanit” hem nomoa garem datfala nem.—Deuteronomy 4:39, NW.
2. Wat nao Bible talem abaotem Jehovah?
Bible sei lo evri god wea pipol worshipim Jehovah nomoa tru God. Why nao olsem? Bikos Jehovah nomoa “Barava Haefala God ovarem full earth.” (Readim Psalm 83:18, NW.) Bible kolem hem “datfala Olmaeti” bikos hem garem paoa for duim eni samting hem laekem. Hem “wakem evri samting” wea hem nao disfala universe and evri samting wea laef lo earth. (Revelation 4:8, 11) Only Jehovah nomoa no garem start and bae hem stap for olowe.—Sams 90:2.
DIG GO MOA
Iumi bae lanem hao olketa title wea God garem hem difren from nem blo hem, wanem hem duim for mekem iumi savve lo nem blo hem, and why hem duim olsem.
3. God garem staka title bat wanfala nem nomoa
For luksavve hao title wea man garem hem difren from nem blo hem, pleim VIDEO, then discussim tugeta disfala kwestin.
-
Why nao olketa title wea samwan garem olsem “Lord,” hem difren from nem blo hem?
Bible storyim pipol worshipim staka god and lord. Readim Psalm 136:1-3 (NW), then discussim tugeta disfala kwestin:
-
Hu nao “God blo olketa god” and “Lord blo olketa lord”?
4. Jehovah laekem iu for savve lo nem blo hem and iusim
Hao nao iu savve Jehovah laekem iu for savve lo nem blo hem? Pleim VIDEO, then discussim tugeta disfala kwestin.
-
Iu tingse, why nao God laekem pipol for savve lo nem blo hem?
Jehovah laekem pipol for iusim nem blo hem. Readim Rome 10:13, then discussim tugeta olketa kwestin hia:
-
Why nao hem important for iusim nem blo God, Jehovah?
-
Hao nao feeling blo iu taem samwan tingim nem blo iu and iusim?
-
Hao nao feeling blo Jehovah taem iu iusim nem blo hem?
5. Jehovah laekem iu for fren witim hem
Wanfala woman from Cambodia wea nem blo hem Soten sei taem hem savve lo nem blo God datwan mekem hem hapi tumas. Pleim VIDEO, then discussim tugeta disfala kwestin.
-
Olsem iumi lukim lo video, taem Soten savve lo nem blo God, hao nao datwan helpem hem?
Bifor iu fren witim eniwan, staka taem first samting for iu savve hem nem blo hem. Readim James 4:8a, then discussim tugeta olketa kwestin hia:
-
Wat nao Jehovah laekem iu for duim?
-
For savve and iusim nem blo God, hao nao datwan helpem iu for fren witim hem?
SAMFALA SAVVE TALEM: “Iumi prea lo wanfala God nomoa, so iumi savve iusim eni title or nem nomoa.”
-
Hao, iu bilivim nem blo God nao hem Jehovah?
-
Hao nao bae iu explainim lo samwan, God laekem iumi for iusim nem blo hem?
MAIN POINT
Nem blo tru God hem Jehovah. Hem laekem iumi for savve and iusim datfala nem mekem iumi fren witim hem.
Review
-
Wat nao mekem Jehovah difren from evri nara god wea pipol worshipim?
-
Why nao iumi shud iusim nem blo God?
-
Wat nao showim Jehovah laekem iu for fren witim hem?
FAENDAOT MOA
Read abaotem faevfala reason wea pruvim God hem stap.
Read abaotem why hem stret for bilivim God no garem start and no garem end.
Lanem why iumi shud iusim nem blo God, nomata iumi no savve lo stretfala wei wea olketa pronouncem bifor.
Hao, iumi savve kolem God lo eni title nomoa? Lukim why hem stret for sei hem garem wanfala nem nomoa.
a For savve moa abaotem mining lo nem blo God and why samfala Bible transleison aotem datfala nem, lukim Appendix 1 lo buklet Tul for Studyim Bible.
Iu Laek Lukim Nara Samting?
OLKETA KWESTIN WEA STAKA PIPOL ASKEM
Wat Nao Bible Study Course blo Olketa Jehovah’s Witness?
Disfala Bible study course blo Olketa Jehovah’s Witness hem free nomoa, and iu savve iusim eni Bible transleison wea iu laekem. Iu savve invaetem olketa lo famili or eni fren blo iu for joinim disfala course.
