LECCIÓN 04
¿Pitaj Dios?
Runasqa unaymantapacha ashkha dioskunata yupaychanku. Bibliatajrí niwanchej uj Dioslla kasqanta, chay Diostaj “tukuy dioskunamanta aswan jatun” kasqanta (2 Crónicas 2:5). ¿Pitaj chay Dios? Chanta, ¿imaraykutaj mana waj Dioskunawan kikinchu? Kay leccionpeqa imatachus Diosninchej pay kikinmanta niwasqanchejta yachakusun.
1. ¿Imataj Diospa sutin? ¿Pay munanchu sutinta yachananchejta?
Diosllataj Bibliapi sutinta willawanchej. Pay nin: “Noqa Jehová kani. Chaymin suteyqa”, nispa (Isaías 42:5, 8 leey). “Jehová” suteqa qallariypi hebreo parlaypi qhelqakorqa. Yachayniyoj runas nisqankuman jinataj chay suteqa niyta munan ‘imamanpis tukuchiy’. Jehová Diosqa chay sutiwan rejsinanchejta munan (Éxodo 3:15). Chayrayku payqa Bibliapi 7.000 kutismanta astawan sutinta churacherqa. a Diospa sutenqa Jehová. Paylla ‘cielopipis kay jallpʼapipis cheqa Diosqa’ (Deuteronomio 4:39).
2. ¿Imatataj Biblia Jehová Diosmanta willawanchej?
Bibliaqa niwanchej runas ashkha dioskunata yupaychajtinkupis, uj kʼata cheqa Dioslla kasqanta. Chay Diostaj Jehová. ¿Imaraykutaj paylla cheqa Dios? Imaraykuchus Jehovalla “Aswan Patapi kaj Dios” (Salmo 83:18 leey). Chantapis paylla “Tukuy Atiyniyoj” Dios. Chayrayku imatachá ruwayta munan, chayta ruwananpaj atiyniyoj. Chantapis payqa cielota, kay jallpʼata, chaypi tukuy kausajkunatawan ruwarqa (Apocalipsis 4:8, 11). Jehová Dioslla “wiñaymantapacha wiñaykama” kausaj Dios (Salmo 90:2).
ASTAWAN YACHAKUNA
Kaypi yachakusun Diosman imaymana sutista churajtinkupis, Diosqa uj sutiyojlla kasqanta. Chantá yachakusun imaynatachus sutinta rejsichiwasqanchejta, imaraykuchus sutinta oqharinanchejtapis.
3. Diosman imaymana sutista churajtinkupis payqa uj sutiyojlla
Uj runataqa nisunman “tata”, “caballero” chayri “alcalde” nispa. Jinapis chaykunaqa mana chay runaj sutisninchu kanku. VIDEOTA qhawariychej, chantá yachakojta tapuriy:
-
“Señor” chayri “Tata Dios”, ¿sutischu kanku, ima niwajtaj?
Bibliaqa nin, runasqa ashkha dioskunata, ashkha señorkunatataj yupaychasqankuta. Salmo 136:1-3 leeriychej, chantá yachakojta tapuriy:
-
¿Pitaj kasqa ‘tukuy dioskunamanta aswan patapi kaj Dios’, ‘señorkunaj Señornintaj’?
4. Jehová Diosqa munan sutinta yachananchejta oqharinanchejtataj
Jehová Diosqa sutinta yachananchejta munan. ¿Imaynatá chayta yachanchej? Chaypaj VIDEOTA qhawariychej, chantá yachakojta tapuriy:
-
¿Jehová Dios munanchu sutinta yachananchejta?
Jehová Diosqa sutinta oqharinanchejta munan. Romanos 10:13 leeriychej, chantá yachakojta tapuriy:
-
¿Imaraykutaj Diospa sutinta oqharinanchejpuni kasqa?
-
Noqanchejpis munanchej pillapis sutinchejmantapuni parlapanawanchejta, ¿icharí?
-
Jehová Diosrí, ¿kusikunmanchu sutinta oqharejtinchej?
5. Jehová Diosqa munan payman qayllaykunanchejta
Camboya suyumanta uj warmi, Diospa sutinta yachakuspa mayta kusikusqanta nin. VIDEOTA qhawariychej, chantá yachakojta tapuriy:
-
Kay videopi qhawasqanchejman jina, ¿Soten nisqa sutiyoj warmita Diospa sutinta yachay yanapasqachu?
Pillawanpis amigos kanapajqa, sutintaraj ñaupajta yachanchej. Santiago 4:8 qallariyninta leeriychej, chantá yachakojta tapuriy:
-
¿Imata ruwananchejtataj Jehová Dios munan?
-
Diospa sutinta yachay, oqhariy ima, ¿yanapasunkimanchu payman astawan qayllaykunaykipaj?
WAKIN RUNAS NINKU: “Diosninchejqa ujlla, ima sutiyojpis kachun”, nispa.
-
Qanrí, ¿imatá niwaj? ¿Jehovapunichu Diospa sutin kanman?
-
¿Imaynatá wajkunaman entiendechiwaj Diospa sutinta oqharinapuni kasqanta?
¿IMASTÁ YACHAKUNCHEJ?
Kaypi yachakunchej kʼata cheqa Diospa sutenqa Jehová kasqanta. Payqa sutinta yachananchejta oqharinanchejta ima munan, payman astawan qayllaykunapaj.
Yuyarikunapaj
-
¿Imaraykutaj Jehová mana waj dioskunawan kikinchu?
-
¿Imaraykutaj Diospa sutinta oqharinanchejpuni tiyan?
-
¿Imatataj Dios willawanchej paywan amigos kanapaj?
ASTAWAN YACHAKUNAYKIPAJ
¿Imaraykutaj Dios kasqantapuni yachanchej? Chayta yachanaykipaj kayta leeriy.
“¿Dios kanpunichu?” (Chaytaqa Internetpi jw.org nisqapi tarinki)
¿Imaynapí yachanchej Dios wiñaymantapachapuni kasqanta? Chayta yachanaykipaj kayta leeriy.
“¿Pitaj Diosta ruwarqa?” (Torremanta Qhawaj, 1 de agosto de 2014)
Diospa sutin imaynatachus unay oqharikusqanta mana yachaspapis, imaraykuchus oqharinapuni kasqanta yachanaykipaj kayta leeriy.
“¿Pitaj Jehová?” (Chaytaqa Internetpi jw.org nisqapi tarinki)
¿Imaraykutaj ninchej Diosqa uj sutiyojlla kasqanta? Chayta yachanaykipaj kayta leeriy.
“¿Cuántos nombres tiene Dios?” (Chaytaqa Internetpi jw.org nisqapi tarinki)
Kaykunatapis qhawaykurillawajtaj
¿IMATÁ TAPUKUNKU JEHOVAJ TESTIGOSNINMANTA?
¿Imaynatá Jehovaj testigosnin Bibliamanta yachachinku?
Jehovaj testigosnenqa, gratis Bibliamanta yachachiyku, qanpis gustasusqan Bibliawan yachakuyta atiwaj. Chantapis familiaykita, amigosniykitapis invitariwaj qanwan khuska yachakunankupaj.
