4 KAQ YACHAKUNËKIPAQ
Diosta reqita puëdinkim
Nunakunaqa unë tiempupitanam santukunata Diostanö adorayan. Peru Bibliachöqa kënömi nin: “Diosnïkunawanqa manam ima diospis igualantsu” (2 Crönicas 2:5). ‘Diosnïkuna’ nirqa, ¿pipaqtan parlëkan? Këchömi yachakunki Bibliachö willakunqan Dios pï kanqanta, reqinëkita munanqanta y santukunapita jukläya kanqanta.
1 KAQ: ¿Imatan Diospa jutin? Y, ¿imanötan musyantsik jutimpa reqinata munanqanta?
Diosnintsikqa Bibliachömi kënö nin: “Noqaqa Jehovämi kä, tsëmi jutï” (leyi Isaïas 42:5, 8). Hebreu idiömachöqa Jehovä jutiqa “llapan munanqanta rurëta puëdeq” ninanmi. Jehoväqa jutimpa reqiyänantam munan (Exodu 3:15). Tsëmi Palabran Bibliaman 7 mil kutipitapis mas qellqatsishqa. a “Patsachö y ciëluchöpis” Teyta Diosnintsikpa jutinqa Jehovämi (Deuteronomiu 4:39).
2 KAQ: Bibliachöqa, ¿imatataq Jehovapaq willakun?
Santukunata Diostanö nunakuna adorayaptimpis, Bibliachöqa nin Jehovälla Diosnintsik kanqantam. Pëllam llapampitapis mas puëdeq, tsëmi Bibliachöqa nin pëqa “Llapanta Gobernaq Poderösu Dios” kanqanta (leyi Salmus 83:18). “Llapanta Gobernaq Poderösu Dios” karmi llapan munanqanta rurëta puëdin. Ciëluchö y Patsachö llapan rikanqantsikkunataqa Jehovämi kamashqa. Tsëmi Bibliachöqa pëpaq nin ‘llapan imëkata kamashqa’ kanqanta (Apocalipsis 4:8, 11). Jehoväqa imëpis kashqam y imëpis këkanqam (Salmus 90:2).
MASLLA YACHAKUSHUN
Këchöqa yachakushun Diospa jutinta, jutimpa reqinata munanqanta y reqinapaq imata ruranqantam.
3 KAQ: Diospa jutinqa jukllëllam
Nunakunata doctor, abogädu, profesor o teyta nir reqiyaptimpis jutinkunaqa kanmi, tsënöllam Diospapis jutin kan. VIDEUTA rikäyë y këpaq parlayë:
-
Diosta Señor nirnin o juknöpa qayarpis, ¿imanirtan jutimpa qayëqa mas alli kanman?
Bibliachöqa willakun nunakuna santukunata Diostanö adorayanqantam. Leyiyë Salmus 136:1-3 ima ninqanta y këpaq parlayë:
-
“Llapan dioskunapitapis mas poderösu” y ‘Gobernaqkunapa Gobernantin’ nirqa, ¿pipaqtan parlëkan?
4 KAQ: Jehoväqa jutimpa reqinëkitam munan
¿Imanirtan Jehoväqa jutimpa reqinëkita munan? VIDEUTA rikäyë y këpaq parlayë:
-
¿Imanirtan Jehoväqa jutimpa reqiyänanta munan?
Jehoväqa jutimpa reqiyänantam munan. Leyiyë Romänus 10:13 ima ninqanta y këkunapaq parlayë:
-
¿Imanirtan Diosta jutimpa qayanantsik?
-
¿Imanötan sientikunki jutikipa qayayäshuptiki?
-
¿Imanöraq Jehovä sientikun jutimpa qayaptiki?
5 KAQ: Jehoväqa reqinëkitam munan
Camböya markapita Soten jutiyoq warmim willakun Diospa jutinta musyarir alläpa kushikunqanta. VIDEUTA rikäyë y këpaq parlayë:
-
Soten jutiyoq warmitaqa, ¿imanötan yanaparqan Diospa jutinta yachakunqan?
Pitapis reqita munarqa puntataqa jutintam tapurintsik. Leyiyë Santiägu 4:8a ima ninqanta y këkunapaq parlayë:
-
¿Imata ruranëkitataq Jehoväqa munan?
-
Diospa jutinta musyanqëki y jutimpa qayanqëkiqa, ¿yanapashunkimantsuraq pëta mas reqinëkipaq? ¿Imanir?
WAKIN IMA NIYANQAN: “Diosqa jukllëllam, y manam jutimparaqtsu qayanantsik”.
-
¿Qamqa creinkiku Diospa jutin Jehovä kanqanta?
-
Jehoväqa jutimpa qayanata munanqanta, ¿imanöraq jukkunata yachatsinkiman?
KËTAM YACHAKURQUNKI
Diospa jutinqa Jehovämi. Pëqa munan amïgun kanëkitam, tsëmi jutinta musyanëki y jutimpa qayanëki.
¿Yarpankiku?
-
¿Imanirtan santukunataqa Diostanö adorashwantsu?
-
¿Imanirtan Diostaqa jutimpa qayanëki?
-
¿Jehoväqa munanku pëta mas reqinëkita? ¿Imanötan tsëta musyanki?
MASTA YACHAKUY
Dios rasumpa kanqanta creinëkipaq yachakuy.
Diosqa imëpis kashqam, tsëta yachakuy.
Manam musyantsiktsu unë witsan hebreu idiömachö Diospa jutinta imanö parlayanqanta. Tsëqa, ¿imanirtan Diosta jutimpa qayashwan? Tsëta yachakuy.
Diospa jutin ima kanqanta y imanir jutimpa qayanantsikpaq kaqta yachakuy.
a Mushoq Patsachö Kawaqkunapaq Bibliachömi tarinki Diospa jutin ima ninan kanqanta, y wakin Bibliakunachö Diospa jutin imanir mana kanqanta. Tsëpaqqa Masllata musyanapaq A neqta leyi.
