ЛЕКЦИЈА 04
Кој тано о Девел?
Панда таро почеток тари манушикани историја, о мануша обожавинена сине буте девлен. Ама, и Библија вакерела кај постојнела само јекх Девел кова сој тано „побаро таро са о јавера девела“ (2. Летописи 2:5). Кој тано адава Девел? Хем соске тано побаро таро са о јавера девела колен со обожавинена о мануша? Сикљов ки акаја лекција со мангела о Девел те џане баши лесте.
1. Кова тано е Девлескоро анав, хем соске шај те ова сигурна кај ов мангела те џана адава анав?
Ки Библија, о Девел откринела аменге несаве буќа баши песте. Ов вакерела: „Ме сиум о Јехова. Адава тано мло анав“. (Читин Исаија 42:5, 8.) О анав Јехова, кова со авела тари хебрејско чхиб, најверојатно значинела „Ов керела те овел“. О Јехова мангела те џана лескоро анав (2. Мојсеева 3:15). Соске шај те ова сигурна ко акава? Ов денѓа ки Библија лескоро анав те овел пишимо повише таро 7.000 пути! a О анав Јехова припадинела „е чачутне Девлеске упре ко небо хем теле ки пхув“ (5. Мојсеева 4:39).
2. Со вакерела аменге и Библија башо Јехова?
И Библија вакерела аменге кај о Јехова тано о единствено чачутно Девел, иако о мануша обожавинена буте јавере девлен. Соске шај те ова сигурна ко акава? Иси некобор причине. Е Јехова иси ле и најбари, јавере лафенцар и врховно власт хем само ов тано о „Најбаро упри цело пхув“. (Читин Псалм 83:18.) Ов тано Семоќно, а адава значинела кај иси ле моќ те керел са со мангела. Ов створинѓа са — о универзум хем са сој џивдо ки Пхув (Откровение 4:8, 11). Хем само о Јехова секогаш постојнела сине хем ка постојнел (Псалм 90:2).
ДОЗНАЈН ПОВИШЕ
Дикх која тани и разлика машкар е Девлескере титуле хем лескоро анав. Исто аѓаар, дознајн сар о Девел откринѓа пло анав хем соске мангела те џане хем те користине лескоро анав.
3. Е Девле иси ле бут титуле, ама само јекх анав
Те шај те дикхе сави тани и разлика машкар и титула хем о анав јекхе манушескоро, дикх о ВИДЕОКЛИПИ, а пало адава керен лафи башо акава пучибе:
-
Која тани и разлика машкар јекх титула, сар сој „Господ“, хем јекх анав?
И Библија вакерела кај о мануша служинена буте девленге хем господаренге. Читин Псалм 136:1-3, а пало адава керен лафи башо акава пучибе:
-
Кој тано о Девел „кова тано најбаро таро са о девела“ хем о Господари „кова тано најбаро таро са о господарија“?
4. О Јехова мангела те џане хем те користине лескоро анав
Со сикавела кај о Јехова мангела те џане лескоро анав? Дикх о ВИДЕОКЛИПИ, а пало адава керен лафи башо акава пучибе:
-
Со мислинеа, соске о Јехова мангела те џана лескоро анав?
О Јехова мангела о мануша те користинен лескоро анав. Читин Римјаните 10:13, а пало адава керен лафи башо акала пучиба:
-
Соске тано важно те користина е Девлескоро анав, Јехова?
-
Сар осетинеа тут кеда некој памтинела хем користинела тло анав?
-
Со мислинеа, сар осетинела пе о Јехова кеда користинеа лескоро анав?
5. О Јехова мангела те ове леа попаше
Јекх џувли тари Камбоџа со викинела пе Сотен вакерѓа кај о најшужо чувство ко живото сине лаке кеда дознајнѓа е Девлескоро анав. Дикх о ВИДЕОКЛИПИ, а пало адава керен лафи башо акава пучибе:
-
Сар влијајнѓа упри Сотен адава со дознајнѓа е Девлескоро анав?
Англедер те ове некасаја амал, обично прво дознајнеа лескоро анав. Читин Јаков 4:8а, а пало адава керен лафи башо акала пучиба:
-
Спрема акава стихо, ко со поттикнинела тут о Јехова?
-
Сар адава со џанеа хем користинеа е Девлескоро анав поможинела туке те ове леа попаше?
НЕСАВЕ ШАЈ ВАКЕРЕНА: „Иси само јекх Девел, адалеске нане важно сар ка викине ле“.
-
Дали верујнеа кај е Девлескоро анав тано Јехова?
-
Сар ка објаснине кај о Девел мангела те користина лескоро анав?
СО СИКЛИЛЕМ
О единствено чачутно Девел викинела пе Јехова. Ов мангела те џана хем те користина лескоро анав те шај те ова леа попаше.
Сар ка одговорине?
-
Сар о Јехова разликујнела пе таро са о јавера девела колен со о мануша обожавинена?
-
Соске ваљани те користина е Девлескоро анав?
-
Со сикавела кај о Јехова мангела те ове леа попаше?
ИСТРАЖИН
Дикх панџ причине соске шај те ова сигурна кај постојнела Девел.
Соске тано логично те верујна кај о Девел постојнела отсекогаш?
Дознајн соске ваљани те користина е Девлескоро анав иако на џанаја точно сар изговоринела пе сине англедер.
Дали тано важно сар викинаја е Девле? Читин соске шај те вакера кај е Девле иси ле само јекх лично анав.
a Ако мангеа те џане нешто повише башо адава со значинела е Девлескоро анав хем соске ко несаве преводија тари Библија нане чхивдо, шај те читине ко Дел 1 тари брошурка Да ја истражуваме Божјата Реч.