04 УРОКИ
Кова си о Дел?
Панда таро пуране диеса о мануша поклонинен пес буте девленге. Ама и Библия пхенел, кай иси йекх Дел, ковато си „по-баро саворе околе девлендар“. (2 Летописи 2:5) Кова си ов? Тай соске си по-баро саворе околе девлендар, коленге поклонинен пес о мануша? Калке урокиестар ка ахальовес со мангел кавка Дел те жанес леске.
1. Сар си е Девлескоро алав тай соске ащи те овас сигурна, кай о Дел мангел те жанас лескоро алав?
Анди Библия о Дел пхенел аменге кова си. Ов пхенел: „Ме синьом о Йехова. Кавка си мо алав.“ (Четине Исаия 42:5, 8.) О алав „Йехова“ си тари еврейско чшиб тай бут учена пхенен, кай означинел „Ов керел те ачшол“. Катар жанас, кай о Йехова мангел те жанас лескоро алав? (Изход 3:15) Анди Библия кавка алав си пишиме декхате 7000 дром! a „О истинско Дел упре ко небес тай теле ки пхув“ пхенел пес Йехова. (Второзаконие 4:39)
2. Со пхенел аменге и Библия е Йеховаске?
И Библия пхенел, кай саворе девлендар, коленге поклонинен пес о мануша, само о Йехова си о истинско Дел. Соске? Иси бут причинес. Само о Йехова си „о Всевишно упрал и цело пхув“, соскето лес иси и най-бари власт. (Четине Псалм 83:18.) Ов си „о Всемогъщо“, демек иси лес и сила те керел всичко со мангел. Ов „кергяс саворе букя“ — и Вселена тай о животос ки Пхув. (Откровение 4:8, 11) Само о Йехова винаги сине тай винаги ка овел. (Псалм 90:2)
РОДЕ ПО-ХОРЕСТЕ
Ахальов сави си и разлика машкар о титлес, колато иси е Девлес, тай лескоро уникално алав. Също дикх сар тай соске о Дел пхенгяс туке сар си лескоро алав.
3. Е Девлес иси бут титлес, ама само йекх алав
Дикх сави си и разлика машкар о титлес, коленца си пенжардо декхой, тай лескоро лично алав. Дикхен о КЛИПИ тай хоратинен калке въпросиеске:
-
Сави си и разлика машкар йекхе титлате, сарто например „Господ“ или „Господар“, тай йекхе алавесте?
И Библия пхенел, кай о мануша служинен буте девленге тай буте господариенге. Четинен Псалм 136:1-3 тай хоратинен калке въпросиеске:
-
Кова си „о Дел е девленгоро“ тай „о Господари е господариенгоро“?
4. О Йехова мангел те жанес тай те използвинес лескоро алав
Катар жанас, кай о Йехова мангел те жанес тай те използвинес лескоро алав? Дикхен о КЛИПИ тай хоратинен калке въпросиенге:
-
Мислинес ли, кай о Йехова мангел о мануша те жанен лескоро алав? Соске?
О Йехова мангел о мануша те използвинен лескоро алав. Четинен Римляни 10:13 тай хоратинен калке въпросиенге:
-
Кизом си важно те използвинес е Девлескоро алав, Йехова?
-
Сар чувствинес тут, кана декхой помнинел то алав тай използвинел лес?
-
Сар мислинес, кай чувствинел пес о Йехова, кана използвинес лескоро алав?
5. О Йехова мангел те овес лескоро амал
Йекх жувли тари Камбоджа, колакоро алав си Сотен, пхенел, кай о най-шукар моменти лакере животосте сине, кана ахалили е Девлескоро алав. Дикхен о КЛИПИ тай хоратинен калке въпросиеске:
-
Со кергяс и Сотен, кана вече жанелас е Девлескоро алав?
За те ачшовес амал декхаса, първо требе те ахальовес сар си лескоро алав. Четинен Яков 4:8а тай хоратинен калке въпросиенге:
-
Со мангел о Йехова те керес?
-
Мислинес ли, кай ащи те ачшовес по-близко е Девлеса, щом вече жанес тай използвинес лескоро алав? Соске?
ДЕСАВЕ МАНУША ПХЕНЕН: „Нанай значение сар ка пхенас е Девлеске, соскето о Дел си йекх.“
-
Верувинес ли, кай е Девлескоро алав си Йехова?
-
Сар ащи те помагинес декхаске те ахальовел, кай о Дел мангел те използвинас лескоро алав?
СО СИКЛИЛЯМ
О единствено истинско Дел пхенел пес Йехова. Ов мангел те жанас тай те използвинас кавка алав, за те ачшовас амала леса.
О най-важна букя таро уроки
-
Сави си и разлика машкар о Йехова тай саворе авере девленде, коленге поклонинен пес о мануша?
-
Соске требе те използвинас е Девлескоро алав?
-
Со сикавел, кай о Йехова мангел те ачшовес амал леса?
АХАЛЬОВ ПО-БУТ
Дикх панч букя, колато помагинен аменге те овас сигурна, кай иси Дел.
Дикх соске ащи те верувинас, кай о Дел винаги сине.
Ахальов соске требе те използвинас е Девлескоро алав, даже ако на жанас точно сар шуньолас кавка алав ко пуране диеса.
Иси ли значение сар пхенас е Девлеске? Дикх соске ащи те пхенас, кай лес иси само йекх алав.
a За те ахальовес со означинел е Девлескоро алав тай соске десаве Библиенде на пишинел лес, дикх и 1 част таро „Помагало за изучаване на Божието Слово“.
