4. LEKCIJA
Koj tano o Devel?
Skoro kotar početko sar o manuša hine stvorime, on verujinđe ko but devela. Ama, i Biblija vaćeri ando jekh Devel kova tano „pobaro ando sa avera devela“ (2. Letopisa 2:5). Koj tano odova Devel? Hem sose tano ov pobaro ando sa avera devela? Ki akija lekcija, ka sikljove so akava Devel mangela te penđare le.
1. Sar vićini pe o Devel hem sose šaj te ova sigurna so ov mangela te đana oleso anav?
Prekali Biblija o Devel mothovđa amenđe kova tano oleso anav. Ov phenela: „Me hijum o Jehova. Odova tano mo anav.“ (Čitinen Isaija 42:5, 8.) But manuša kola šukar penđarena i hebrejsko ćhib phenena so o anav „Jehova“ značini „Ov ćerela te ovel.“ O Jehova mangela te đana oleso anav (Izlazak 3:15). Sar šaj te ova sigurna ko odova? Ov dinđa oleso anav te pisini pe ki Biblija prekalo 7 000 putija! a O anav Jehova šaj te akhari samo okova kova tano „o pravo Devel upre ko nebo hem tele ki phuv“ (Ponovljeni zakoni 4:39).
2. So i Biblija sikavi amen ando Jehova?
O manuša verujinena ko but devela, ama i Biblija vaćeri so jedino o Jehova tano o pravo Devel. Sose? Aće nekobor razlogija. O Jehova isi le najbari vlast hem jedino tano ov „Najbaro upri celo phuv.“ (Čitinen Psalam 83:18.) Ov tano „Svemoćno“, so značini so isi le moć te ćerel so god mangela. Ov „sa stvorinđa“ – o svemir hem sa so isi ki phuv (Otkrivenje 4:8, 11). Samo o Jehova oduvek postojinđa hem ka postojini zauvek (Psalam 90:2).
SIKLJOV POBUTER
Sikljov koja tani i razlika maškaro e Devlese titule hem oleso anav. Isto ađahar, dikh so ćerđa o Jehova te šaj te mothovi amenđe po anav hem sose ćerđa odova.
3. O Devel isi le but titule, ama samo jekh anav
Savi razlika isi maškari e manušesi titula hem oleso anav? Dikhen o VIDEO, hem palo odova vaćeren ando akava pućibe:
-
Savi razlika isi maškari titula, na primer „Gospod“ hem jekh anav?
Ki Biblija pisini so o manuša isi len but devela hem gospodarija. Čitinen Psalam 136:1-3, hem palo odova vaćeren ando akava pućibe:
-
Koj tano „o Devel upro devela“ hem „o Gospodari upro gospodarija“?
4. O Jehova mangela te đane hem te koristine oleso anav
So mothovi so o Jehova mangela te đane oleso anav? Dikhen o VIDEO, hem palo odova vaćeren ando akava pućibe:
-
Sose mislineja so o Jehova mangela o manuša te đanen oleso anav?
O Jehova mangela o manuša te koristinen oleso anav. Čitinen Rimljanima 10:13, hem palo odova vaćeren ando akala pućiba:
-
Kobor tano važno te koristina e Devleso anav, Jehova?
-
Sar osetineja tut ked neko pamtini to anav hem vićini tut ko anav?
-
So mislineja, sar o Jehova osetini pe ked koristineja oleso anav?
5. O Jehova mangela te ove paše oleja
Jekh romni andi Kambodža koja vićini pe Soten phenđa so „najšukar osećaj ko sveto“ tano ked šuneja sar vićini pe o Devel. Dikhen o VIDEO, hem palo odova vaćeren ando akava pućibe:
-
Sar upri Soten utičinđa odova so sikljilji sar vićini pe o Devel?
Te šaj te ove nekasa amal, valjani te đane oleso anav. Čitinen Jakovljeva 4:8a, hem palo odova vaćeren ando akala pućiba:
-
So o Devel phenela amenđe te ćera?
-
Sar odova so đaneja hem koristineja e Devleso anav pomožini tut te ove popaše oleja?
AKO NEKO PHENELA: „Đanaja so isi jekh Devel, odolese nane bitno sar ka vićina le.“
-
Da li verujineja soj tano e Devleso anav Jehova?
-
Sar šaj te objasnine nekase so o Devel mangela te koristina oleso anav?
SO SIKLJILJAM
O jedino pravo Devel vićini pe Jehova. Ov mangela te đana hem te koristina oleso anav sose ađahar ka ova paše oleja.
Te ponovina
-
Sose o Jehova tano averćhane ando sa avera devela ko kola o manuša verujinena?
-
Sose valjani te koristina e Devleso anav?
-
Sar đanaja so o Jehova mangela te ova paše oleja?
RODE POBUTER
Dikh panđ razlogija sose šaj te verujina so o Devel postojini.
Dikh sose tano logično te verujina so o Devel oduvek postojinđa.
Dikh sose valjani te koristina e Devleso anav, iako na đanaja sar angleder tačno vaćerđa pe.
Da li tano važno sar vićinaja e Devle? Dikh sose šaj te phena so ov isi le samo jekh anav.
a Te šaj te đane pobuter ando odova so značini e Devleso anav hem sose tano cidimo ando disave prevodija andi Biblija, dikh o dodatak A4 ko prevod Novi svet.