FIANARA 04
Ia Ndranahary Zao?
Fa liany ela ty olombelo ro nivavaky tamy ndranahary maro sankarazany. Fe misy Ndranahary raiky volanini-Baiboly hoe “bevata mandilatsy ty ndranahary iaby.” (2 Tantara 2:5) Ia Ndranahary io? Le manino ie ro bevata mandilatsy ty ndranahary iaby ivavahan’olo? Ho hitantsika amy fianara toy ato hoe ino ty raha teani-Ndranahary io ho hainao mikasiky azy.
1. Ia ty anara-Ndranahary, le ino ty mampiseho hoe teany ho haintsika anara io?
Ndranahary mihintsy ro manambara ty vatany amy Baiboly ao. Hoy ie: “Zaho ro Jehovah! Zay ty anarako.” (Vakio Isaia 42:5, 8.) Nalà baka amy safà hebreo ty hoe “Jehovah.” Ty dikani-anara io le hoe “Mahavy azy Hanjary Ie.” Teani-Jehovah hahay ani-anarany io tsika. (Eksodosy 3:15) Manino tsika ro mivola ani-zay? Mimpolimpoly in-7000 mahery amy Baiboly ao anarany io! a Raiky avao ty “Ndranahary marina an-danitsy anabo any noho an-tany ambany etoy.” Jehovah ty anarany.—Deoteronomia 4:39.
2. Ino ty volanini-Baiboly mikasiky ani-Jehovah?
Volanini-Baiboly fa amy ty ndranahary iaby ivavahan’olo, le Jehovah raiky avao ro Ndranahary marina. Ino ty antony? Misy antony maromaro retoa: Manam-pahefà ambony Jehovah sady ie raiky avao ro “Farani-Anabo amy tany toy iaby.” (Vakio Salamo 83:18.) Ie ro “Farani-Ze Mahery”, zany hoe vitany iaby ze raha teany hatao. Ie ro “namoro ty raha iaby”, anatini-zay ty raha velo iaby an-tany etoa. (Apokalypsy 4:8, 11) Jehovah raiky avao koa ro fa nisy teo liany bakany zay sady ho eo avao zisiky farany.—Salamo 90:2.
DINIHO LALIKY
Diniho hoe ino ty tsy mampitovy ty anaram-boninahitsi-Ndranahary noho ty tena anarany. Bakeo diniho koa hoe nanino Ndranahary ro nanambara ty anarany, le akory ty nanaovany ani-zay.
3. Mana anaram-boninahitsy maro Ndranahary, fe raiky avao ty tena anarany
Mba hahità ty tsy mampitovy ty anaram-boninahitsy amy ty tena anaran’olo raiky, le alefaso VIDEO toy, bakeo iaraho midiniky fanontanea toy:
-
Ino ty tsy mampitovy ty tena anaran’olo raiky amy anaram-boninahitsy, ohatsy hoe “Tompo”?
Mivola ty Baiboly fa mivavaky amy ndranahary maro noho tompo maro ty olo. Vakio Salamo 136:1-3, le iaraho midiniky fanontanea toy:
-
Ia “Ndranaharini-ndranahary” noho “Tomponi-tompo” io?
4. Teani-Jehovah ho hainao noho hampiasanao ty anarany
Ino ty ahità hoe teani-Jehovah hahay ty anarany iha? Alefaso VIDEO toy, le iaraho midiniky fanontanea retoa:
-
Akory ty hevitsinao, tea-Ndranahary hahay ty anarany va tsika? Ino ty antony?
Teani-Jehovah hampiasan’olo ty anarany. Vakio Romanina 10:13, bakeo iaraho midiniky fanontanea retoa:
-
Manino ro tena ilà ty mampiasa ty anara-Ndranahary hoe Jehovah?
-
Ino ty tsapanao lafa tiaron’olo ty anaranao sady ampiasany?
-
Akory ty hevitsinao, ino ty tsapani-Jehovah lafa mampiasa ty anarany iha?
5. Teani-Jehovah ho namany iha
Nivola ampela mana anara Soten, baka Kambôdza any zay hoe ty fahaizany ty anara-Ndranahary ro ‘farani-ze raha nahafalifaly azy tan-tany etoy.’ Alefaso VIDEO toy, bakeo iaraho midiniky fanontanea toy:
-
Ino ty vokany lafa nahay ty anara-Ndranahary Soten?
Alohani-hinamànao amin’olo raiky, le tsy maintsy hainao tse ty anarany. Vakio Jakoba 4:8a, le iaraho midiniky fanontanea retoa:
-
Ino ty raha teani-Jehovah hataonao?
-
Manino iha ro hihamariniky a Ndranahary laha mahay ty anarany noho mampiasa ani-anarany io?
MIERITSERITSY TY OLO SISANY HOE: “Raiky avao Ndranahary zao, ka tsy manino ze anara ikaihanao azy.”
-
Ekenao va fa Jehovah ty anara-Ndranahary?
-
Akory ty hanazavànao amin’olo hoe tea-Ndranahary hampiasa ty anarany tsika?
FAMINTINA
Raiky avao ty Ndranahary marina. Jehovah ty anarany. Teany hahay noho hampiasa ani-anara io tsika, amy zay afaky hihamarìny azy.
Famerena
-
Manino Jehovah ro tsy mitovy amy ndranahary maro sankarazany ivavahan’olo?
-
Manino tsika ro tokony hampiasa ty anara-Ndranahary?
-
Ino ty mampiseho hoe teani-Jehovah hinama aminy tsika?
DINIHO KOA RETOA
Diniho ato ty porofo limy mampiseho hoe tena misy Ndranahary.
Henteo ato hoe manino ro marina ty hoe fa nisy avao Ndranahary liany bakany zay.
“Iza no Namorona An’Andriamanitra?” (Ny Tilikambo Fiambenana 1 Aogositra 2014)
Ianaro ato hoe manino tsika ro tokony hampiasa ty anara-Ndranahary avao, ndre tsy hay soa aza ty fomba fanonòna azy taloha tany.
Mety iaby va ze anara ikaihantsika a-Ndranahary? Manino tsika ro afaky mivola fa raiky avao ty tena anarany?
“Firy ny Anaran’Andriamanitra?” (Lahatsoratsy amy jw.org ao)
a Laha teanao ty hahazo fanazavà fanampiny mikasiky ty dikani-anara-Ndranahary noho ty antony tsy ahità ani-anara io amy Baiboly sisany, le henteo ty bokikely hoe Fianaran-draha amy Safà Ndranahary Ao, Fizarà 1.
Mety ho Teanao Koa
FANONTANEA FAPETRAKIN’OLO
Ino ro Atao hoe Fianara Baiboly?
Anovo hay ty valy fanontanea mikasiky fandahara fampianara Baiboly tsy andoava drala ataonay.
