SIFUNDVO 04
Ungubani Nkulunkulu?
Kusukela ngesikhatsi bantfu bacala kwandza emhlabeni, labanyenti babo bakhonte bonkulunkulu nabonkulunkulukati labanyenti. Nobe kunjalo, liBhayibheli likhuluma ngaNkulunkulu munye ‘lomkhulu kunabo bonkhe labanye bonkulunkulu.’ (2 Tikhronike 2:5) Ungubani loNkulunkulu? Yini lementa abe mkhulu kwendlula labanye bonkulunkulu? Kulesifundvo, utawutfola kutsi yini loNkulunkulu lafuna uyati ngaye.
1. Ngubani libito laNkulunkulu, futsi yini lesenta siciniseke kutsi ufuna silati?
EBhayibhelini, Nkulunkulu uyasitjela kutsi ungubani. Utsi: “Mine nginguJehova. Lelo libito lami.” (Fundza Isaya 42:5, 8.) NgesiHebheru, ligama lelitsi “Jehova” lisho kutsi “Ubangela Kutsi Kube Khona.” Jehova ufuna silati ligama lakhe. (Eksodusi 3:15) Singaciniseka njani ngaloku? Ligama lakhe livela tikhatsi letingetulu kwa-7 000 eBhayibhelini! a Ligama lelitsi Jehova, ‘laNkulunkulu weliciniso etulu ezulwini naphansi emhlabeni.’—Dutheronomi 4:39.
2. LiBhayibheli lisitjelani ngaJehova?
LiBhayibheli litsi kubo bonkhe bonkulunkulu labakhontwa bantfu, Jehova nguye kuphela longuNkulunkulu weliciniso. Kungani lisho njalo? Kunetizatfu letinyenti. Jehova usesikhundleni lesiphakeme futsi nguye yedvwa “Losetikwako Konkhe emhlabeni wonkhe.” (Fundza Tihlabelelo 83:18.) “UnguNkulunkulu Somandla,” lokusho kutsi unemandla ekwenta nobe ngabe yini lafuna kuyenta. “Wadala tonkhe tintfo”—indalo yonkhe nako konkhe lokuphilako emhlabeni. (Sembulo 4:8, 11) NguJehova kuphela lobekasolo akhona ngaphambi kwekutsi kudalwe tonkhe tintfo, futsi nguye kuphela utawuhlale akhona kuze kube phakadze.—Tihlabelelo 90:2.
CHUBEKA UFUNISISA
Fundza lokunyenti ngemehluko lokhona emkhatsisini weticu taNkulunkulu kanye neligama lakhe lelehlukile. Chubeka ufundza nekutsi kungani akutjela ligama lakhe nekutsi kungani akutjela ngaleyondlela.
3. Nkulunkulu uneticu letinyenti, kodvwa uneligama linye
Kuze ubone umehluko emkhatsisini wesicu semuntfu kanye neligama lakhe, dlala le-VIDEO, bese nicoca ngalombuto lolandzelako.
-
Ngumuphi umehluko lokhona emkhatsisini wesicu lesitsi “Nkhosi,” kanye neligama?
LiBhayibheli litsi bantfu bakhonta bonkulunkulu kanye nemakhosi lamanyenti. Fundza Tihlabelelo 136:1-3, bese nicoca ngalombuto:
-
Ngubani ‘Nkulunkulu wabonkulunkulu’ “neNkhosi yemakhosi”?
4. Jehova ufuna kutsi ulati futsi ulisebentise ligama lakhe
Wati njani kutsi Jehova ufuna ulati ligama lakhe? Dlala le-VIDEO, bese nicoca ngalemibuto lelandzelako.
-
Ucabanga kutsi Jehova ufuna latiwe yini ligama lakhe? Kungani usho njalo?
Jehova ufuna kutsi bantfu balisebentise ligama lakhe. Fundza KubaseRoma 10:13, bese nicoca ngalemibuto:
-
Kubaluleke ngani kusebentisa ligama laNkulunkulu lelitsi Jehova?
-
Utiva njani nangabe umuntfu alikhumbula ligama lakhofutsi alisebentisa?
-
Ucabanga kutsi Jehova utiva njani nawusebentisaligama lakhe?
5. Jehova ufuna kutsi ube ngumngani wakhe
Lomunye make waseCambodia ligama lakhe lokunguSoten utsi, kwati ligama laNkulunkulu kumsite wajabula kakhulu kunasesikhatsini lesendlulile. Dlala le-VIDEO, bese nicoca ngalemibuto lelandzelako.
-
Kule-video, kwati ligama laNkulunkulu kumsite njani Soten?
Ngaphambi kwekutsi ube ngumngani wemuntfu lotsite, kufanele wati ligama lakhe kucala. Fundza Jakobe 4:8a, bese nicoca ngalemibuto:
-
Jehova ukumema kutsi wenteni?
-
Kwati ligama laNkulunkulu kanye nekulisebentisa kungakusita njani kutsi usondzelane naye?
LABANYE BANTFU BATSI: “KunaNkulunkulu munye, ngako akunendzaba kutsi umbita kanjani.”
-
Uyaciniseka yini kutsi ligama laNkulunkulu nguJehova?
-
Ungamchazela njani lomunye umuntfu kutsi Nkulunkulu ufuna silisebentise ligama lakhe?
LOKO LESICOCE NGAKO
Ligama laNkulunkulu weliciniso nguJehova. Ufuna kutsi silati futsi silisebentise leligama lakhe kuze sisondzelane naye.
Yini Loyifundzile?
-
Yini leyenta Jehova ehluke kulabanye bonkulunkulu?
-
Kungani kufanele silisebentise ligama laNkulunkulu?
-
Yini lekhombisa kutsi Jehova ufuna usondzele kuye?
LOKUNYE LONGAKUHLOLA
Hlola tintfo letisihlanu letifakazela kutsi Nkulunkulu ukhona.
Kungani kunengcondvo kukholelwa kutsi Nkulunkulu bekasolo akhona.
“Ngubani Lowadala Nkulunkulu?” (Sicongosekulindza saSeptember 1, 2014)
Fundza kutsi kungani kufanele sisebentise ligama laNkulunkulu, ngisho nobe singayati kahle indlela lebelibitwa ngayo endvulo.
Kunendzaba yini kutsi simbita kanjani Nkulunkulu? Tfola kutsi kungani sitsi uneligama linye.
a Kuze utfole kwatiswa lokunyenti mayelana nekutsi ligama laNkulunkulu lisho kutsini nekutsi kungani lamanye emahumusho alikhiphile, buka Sandzisanchazo A4 eHumushweni Lemhlaba Lomusha LemiBhalo Lengcwele.
Lokunye Longatsandza Kukuhlola
IMIBUTO BANTFU LABAVAMISE KUYIBUTA
Siyini Sifundvo SeliBhayibheli Lesichutjwa BoFakazi BaJehova?
Ungasebentisa nobe ngabe nguliphi lihumusho leliBhayibheli nawutadisha naBoFakazi BaJehova. Ukhululekile kumema umndeni wakho wonkhe nobe bangani bakho kutsi babe khona nawufundza.
