ITYOUGH 04
Ka An Nan lu Aôndo?
Uumace ndera civir mbaaôndo mbagen kpishi ka kwagh u nyian a mi ga. Nahan kpa, Bibilo ôr kwagh u Aôndo ugen u a “hemba mbaaôndo mbagenev cii” yô. (2 Kroniku 2:5) Mba yer Aôndo shon ér ana? Man er nan ve a hembe mbaaôndo mbagenev mba ior ve civir la ciili? Ken ityough kin, u lu henen kwagh u Aôndo shon a soo ér we u fa sha kwagh na yô.
1. Iti i Aôndo ér ana, man ka nyi i tese ér a soo ér se fa iti na?
Aôndo pase iyol na hen a vese ken Bibilo. A kaa ér: ‘Iti Yam ér TER (ka Yehova je la).’ (Ôr Ekesodu 6:3.) Iti i ken zwa Heberu i i gem ér “Yehova” la inja na yô ér, “Gem Ne Kwagh Lu.” Yehova soo ér se fa iti na. (Ekesodu 3:15) Er nan ve se fe nahana? Se fa nahan sha ci u Bibilo ter iti na hemba kwa 7,000! a Iti i Yehova la ka iti i Aôndo u mimi, u a lu “Aôndo u Sha man u shin tar kpaa” la tswen.—Duteronomi 4:39.
2. Ka nyi Bibilo i̱ pase se sha kwagh u Yehova?
Bibilo kaa ér, ken mbaaôndo mba ior ve civir la cii, ka Yehova tseegh a lu Aôndo u mimi ye. Sha ci u atôakyaa ne: Yehova hemba tahav sha won cii. Sha nahan yô, ka un tseegh a lu “Uhembansha sha tar cii” ye. (Ôr Pasalmi 83:18.) Un ka “U Hemban Agee Cii,” inja na yô, ngu a tahav mbu eren hanma kwagh u a soo u eren cii. A “gba akaa cii,” sha man tar kua akaauma a a lu sha tar la cii. (Mpase 4:8, 11) Ma aôndo ugen ngu er Yehova ga; er Yehova yange lu je tsô ngu, shi ka u una lu zan zan gbem sha won.—Pasalmi 90:2.
HEN KWAGH I ZA SHIMI
Seer timen fan mkposo u ati agen a ior ve yilan Aôndo la man iti na kpôô kpôô, i i lu i̱ na tswen la. Maa u fa ityôkyaa i a pase u iti na yô, kua gbenda u a pase u i la kpaa.
3. Mba yilan Aôndo sha ati kpishi, kpa iti na kpôô kpôô ngi i môm tseegh
U yilan or sha iti i nan kpôô kpôô la kaha a u yilan nan sha ati agenee? Wea soo u zuan a mlumun sha mpin ne yô, nenge VIDIO i i lu heen ne, maa lam nen sha mpin ne.
-
Ati, er “Ter” man “Tor” nahan, kaha a iti i or kpôô kpôô nena?
Bibilo kaa ér mbaaôndo man uter mba kpishi mba ior ve civir yô. Ôr Pasalmi 136:1-3, maa lam nen sha mpin ne:
-
Ka an nan lu “Aôndo u mbaaôndo” man “Ter u uter”?
4. Aôndo soo ér we u fa iti na i Yehova la, shi u yilan un sha i
Ka nyi i tese u ér Aôndo soo ér we u fa iti na? Nenge VIDIO i i lu heen ne, maa lam nen sha mbampin mba ve dondo ne.
-
U nenge wer Aôndo soo ér se fa iti na i Yehova laa? U nenge nahan sha ci u nyi?
Aôndo soo ér ior ve yilan un sha iti na i Yehova la. Ôr Mbaroma 10:13, maa lam nen sha mbampin mban:
-
Gba hange hange u se yilan Aôndo sha iti na i Yehova la sha ci u nyi?
-
Or ka nana umbur iti you shi nana yila u sha i nahan, i lu u nena?
-
U hen wer ka wea yila Aôndo sha iti na i Yehova la nahan, i lu un nena?
5. Yehova soo ér we u ya ijende a na
Kwase ugen ken tar u Cambodia, iti na ér Soten, a kaa ér yange un fe iti i Aôndo yô, “hemba saan un iyol ken uma na cii.” Nenge VIDIO i i lu heen ne, maa lam nen sha mpin ne.
-
Ken vidio la, Soten yange fa iti i Aôndo nahan, kwagh la wase un nena?
Cii man u ya ijende a or yô, ka u vande fan iti i nan. Ôr Yakobu 4:8a, maa lam nen sha mbampin mban:
-
Yehova kaa ér we u er nyi?
-
Aluer u fa iti i Aôndo shi u ngu yilan un sha i yô, kwagh la una wase u nena ve u nenge wer u hemba ngun ikyua a naa?
IOR MBAGENEV KA VE KAA ÉR: “Aôndo ngu môm tseegh, nahan hanma iti i u yila un cii, zayol ngu ga.”
-
U nenge wer mimi je iti i Aôndo ér Yehova?
-
U fatyô u pasen er i hii ve u fe wer Aôndo soo ér se yilan un sha iti na i Yehova la kpa?
KA NYI U HENE?
Yehova ka iti i Aôndo u i lu un tseegh a lu u mimi la. A soo ér se fa iti shon shi se yilan un sha i kpaa, sha er se hemba kporom ikyua a na yô.
Mbampin mba umbur kwagh u i hen yô
-
Yehova ngu kposo a mbaaôndo mbagenev mba ior ve civir la cii nena?
-
Gba u se yilan Aôndo sha iti na sha ci u nyi?
-
Ka nyi i tese ér Yehova soo ér we u kporom ikyua a na?
SEER HENEN KWAGH
Time sha akaa ataan a a ne ve se fe ser mimi je Aôndo ngu yô.
Nenge er i hii ve i doo u se na jighjigh ser Aôndo yange lu je tsô ngu yô.
Fa er i hii ve i gbe u se yilan Aôndo sha iti na i Yehova la yô, sea fa er yange i yilan i sha ayange a tsuaa la ga je kpaa.
Aluer se mba yilan Aôndo sha hanma iti i se fe cii yô, zayol ngu sha kwagh laa? Nenge er i hii ve se fe ser mimi je iti na kpôô kpôô ngi i môm tseegh yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
