LĒSONI 04
Ko Hai ʻa e ʻOtuá?
Talu mei he kamataʻanga nai ʻo e faʻahinga ʻo e tangatá, kuo nau lotu ki he ngaahi ʻotua lahi. Neongo ia, ʻoku lave ʻa e Tohi Tapú ki he ʻOtua pē ʻe taha ʻa ia “ʻoku lahi ange ia ʻi he ngaahi ʻotua kehé kotoa.” (2 Kalonikali 2:5) Ko hai ia? Pea ko e hā ʻokú ne ʻai ia ke lahi ange ʻi he ngaahi ʻotua kehe kotoa ʻoku lotu ki ai ʻa e kakaí? ʻI he lēsoni ko ení, ako ki he founga ʻoku fakahaaʻi mai ai ʻe he ʻOtua ko ení ʻa ia tonu kiate koe.
1. Ko hai ʻa e huafa ʻo e ʻOtuá, pea ʻe lava fēfē ke tau fakapapauʻi ʻokú ne loto ke tau ʻiloʻi iá?
ʻI he Tohi Tapú, ʻoku fakahaaʻi mai ai ʻe he ʻOtuá ʻa ia tonu kiate kitautolu. ʻOkú ne pehē: “Ko au Sihova. Ko hoku hingoá ia.” (Lau ʻa e ʻAisea 42:5, 8.) Ko e “Sihova” ko e liliu ia ʻo ha hingoa faka-Hepelū ʻoku hā mahino ko hono ʻuhingá “ʻOkú Ne Fakatupunga ke Hoko.” ʻOku loto ʻa Sihova ke tau ʻiloʻi hono huafá. (ʻEkisoto 3:15) ʻE lava fēfē ke tau fakapapauʻi ia? ʻI he Tohi Tapú ʻokú ne fakakau ai hono huafá ʻo laka hake ʻi he tuʻo 7,000! a Ko e huafa Sihová ʻoku ʻa e “ʻOtua moʻoní, ʻi he langí ʻi ʻolungá na pea ʻi he māmaní ʻi laló ni.”—Teutalōnome 4:39.
2. Ko e hā ʻoku fakahaaʻi mai ʻe he Tohi Tapú fekauʻaki mo Sihová?
ʻOku tala mai ʻe he Tohi Tapú ko Sihova ʻa e ʻOtua moʻoni pē taha ʻi he haʻohaʻonga kotoa ʻo e ngaahi ʻotua ʻoku lotu ki ai ʻa e faʻahinga ʻo e tangatá. Ko e hā hono ʻuhingá? ʻOku lahi ʻa e ngaahi ʻuhinga ki aí. ʻOku maʻu ʻe Sihova ʻa e mafai aoniú, pea ko ia toko taha pē “ʻa e Fungani Māʻolunga ʻi he māmaní kotoa.” (Lau ʻa e Saame 83:18.) Ko ia “ʻa e Māfimafi-Aoniu,” ʻa ia ʻoku ʻuhingá ʻokú ne maʻu ʻa e mālohi ke fai ha faʻahinga meʻa pē ʻokú ne fili ke fai. Naʻá ne “fakatupu ʻa e ngaahi meʻa kotoa pē”—ʻa e ʻunivēsí mo e meʻamoʻui kotoa ʻi he māmaní. (Fakahā 4:8, 11) ʻI he ʻikai hangē ko ha toe tahá, ko Sihová kuó ne ʻi ai maʻu pē, pea te ne ʻi ai ai pē ʻo taʻengata.—Saame 90:2.
KELI LOLOTO ANGE
Sivisiviʻi ʻa e faikehekehe ʻi he ngaahi hingoa fakalakanga ʻo e ʻOtuá mo hono huafa laulōtahá. Pea ako leva ki he founga mo e ʻuhinga naʻá ne fakahaaʻi mai ai hono huafá kiate koé.
3. ʻOku lahi ʻa e ngaahi hingoa fakalakanga ʻo e ʻOtuá, ka ʻoku taha pē hono huafá
Ke sio ki he faikehekehe ʻi he ngaahi hingoa fakalakanga ʻo ha taha mo hono hingoá, huluʻi ʻa e VITIOÓ, pea lāulea leva ki he fehuʻi hokó.
-
Ko e hā ʻa e faikehekehe ʻi ha hingoa fakalakanga, hangē ko e “ʻEiki,” pea mo ha hingoa?
ʻOku tala mai ʻe he Tohi Tapú ko e kakaí ʻoku nau lotu ki he ngaahi ʻotua mo e ngaahi ʻeiki tokolahi. Lau ʻa e Saame 136:1-3, pea lāulea leva ki he fehuʻi ko ení:
-
Ko hai ʻa e “ʻOtua ʻo e ngaahi ʻotuá” mo e “ʻEiki ʻo e ngaahi ʻeikí”?
4. ʻOku loto ʻa Sihova ke ke ʻiloʻi pea ngāueʻaki hono huafá
Ko e hā ʻokú ne fakahaaʻi ʻoku loto ʻa Sihova ke ke ʻiloʻi hono huafá? Huluʻi ʻa e VITIOÓ, pea lāulea leva ki he ongo fehuʻi hokó.
-
ʻOkú ke fakakaukau ʻoku loto ʻa Sihova ke ʻiloʻi hono huafá? Ko e hā hono ʻuhingá?
ʻOku loto ʻa Sihova ke ngāueʻaki ʻe he kakaí hono huafá. Lau ʻa e Loma 10:13, pea lāulea leva ki he ngaahi fehuʻi ko ení:
-
ʻOku mahuʻinga fēfē ʻa hono ngāueʻaki ʻa e huafa ʻo e ʻOtuá, ʻa e Sihová?
-
ʻOkú ke ongoʻi fēfē ʻi he taimi ʻoku manatuʻi ai ʻe ha taha ho hingoá pea ngāueʻaki iá?
-
ʻOkú ke fakakaukau ʻoku fēfē ʻa e ongoʻi ʻa Sihová ʻi he taimi ʻokú ke ngāueʻaki ai hono huafá?
5. ʻOku loto ʻa Sihova ke ke ʻunuʻunu ofi ange kiate ia
Naʻe pehē ʻe ha fefine mei Kemipōtia ko Soten ko e ako ki he huafa ʻo e ʻOtuá naʻá ne tokoniʻi ia ke ne maʻu “ʻa e ongoʻi lelei taha ʻi he māmaní.” Huluʻi ʻa e VITIOÓ, pea lāulea leva ki he fehuʻi hokó.
-
ʻI he vitioó, naʻe anga-fēfē tokoniʻi ʻa Soten ʻi hono ʻiloʻi ʻa e huafa ʻo e ʻOtuá?
Ki muʻa ke ke hoko ko ha kaumeʻa ʻo ha taha, ʻoku angamaheniʻaki ke ke ʻiloʻi hono hingoá. Lau ʻa e Sēmisi 4:8a, pea lāulea leva ki he ongo fehuʻi ko ení:
-
Ko e hā ʻoku fakaafeʻi mai koe ʻe Sihova ke ke faí?
-
ʻE anga-fēfē nai hono tokoniʻi koe ʻi hono ʻiloʻi mo ngāueʻaki ʻa e huafa ʻo e ʻOtuá ke ke ongoʻi ofi ange ai kiate iá?
ʻOKU PEHĒ ʻE HE NIʻIHI: “ʻOku taha pē ʻa e ʻOtuá, ko ia ʻoku ʻikai ke mahuʻinga ia pe ko e hā ʻa e hingoa te ke uiʻaki iá.”
-
ʻOkú ke tui ko e huafa ʻo e ʻOtuá ko Sihova?
-
ʻE anga-fēfē haʻo fakamatalaʻi ʻoku loto ʻa e ʻOtuá ke tau ngāueʻaki hono huafá?
FAKANOUNOU
Ko Sihova ʻa e huafa ʻo e ʻOtua moʻoni pē tahá. ʻOkú ne loto ke tau ʻiloʻi pea ngāueʻaki ʻa e huafa ko iá koeʻuhi ke tau lava ʻo ʻunuʻunu ofi ange kiate ia.
Fakamanatu
-
ʻOku anga-fēfē kehe ʻa Sihova mei he ngaahi ʻotua kehe kotoa ʻoku lotu ki ai ʻa e kakaí?
-
Ko e hā ʻoku totonu ai ke tau ngāueʻaki ʻa e huafa ʻo e ʻOtuá?
-
Ko e hā ʻokú ne fakahaaʻi ʻoku loto ʻa Sihova ke ke ʻunuʻunu ofi ange kiate iá?
AKO LAHI ANGE
Sivisiviʻi ʻa e ngaahi ʻuhinga fakaueʻiloto ʻe nima ʻoku nau fakamoʻoniʻi ʻoku ʻi ai ʻa e ʻOtuá.
Lāulea ki he ʻuhinga lelei ʻo e tui kuo ʻi ai maʻu pē ʻa e ʻOtuá.
“Ko Hai Naʻá Ne Ngaohi ʻa e ʻOtuá?” (Ko e Taua Leʻo, Sepitema 1, 2014)
Ako ki he ʻuhinga ʻoku totonu ke tau ngāueʻaki ai ʻa e huafa ʻo e ʻOtuá, neongo kapau ʻoku ʻikai ke ʻiloʻi ʻa e anga hono puʻaki ia ʻi he kuonga muʻá.
ʻOku mahuʻinga nai ʻa e hingoa ʻoku tau uiʻaki ʻa e ʻOtuá? Sio ki he ʻuhinga ʻoku lava ai ke tau pehē ʻoku taha pē hono huafa fakafoʻituituí.
a Ke maʻu ha fakamatala lahi ange fekauʻaki mo e ʻuhinga ʻo e huafa ʻo e ʻOtuá pea mo e ʻuhinga kuo toʻo ai ia ʻe he ngaahi liliu Tohi Tapu ʻe niʻihi, sio ki he Fakamatala Fakalahi A4 ʻi he Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
