CIIYO 04
Ino Leza Nguni?
Kuzwa kaindi, bantu bali kukomba baleza banji baindene-indene. Nokuba boobo, Bbaibbele lyaamba buyo Leza omwe “mupati kwiinda baleza bambi boonse.” (2 Makani 2:5) Ino nguni? Alimwi ncinzi cimupa kuba mupati kwiinda baleza bambi boonse bantu mbobakomba? Muciiyo eeci, mulaiya Leza ncayanda kuti muzyibe kujatikizya nguwe.
1. Ino Leza nguni zina, alimwi ncinzi citondezya kuti uyanda kuti tulizyibe?
Mu Bbaibbele, Leza ulalipandulula kulindiswe. Waamba kuti: “Ndime Jehova. Eeli ndezina lyangu.” (Amubale Isaya 42:5, 8.) “Jehova” ndizina lyakasandululwa kuzwa mu Chihebrayo lyalo kweelana abasyaazibwene banji ilyaamba kuti “Uupa kuti kube.” Jehova uyanda kuti tulizyibe zina lyakwe. (Kulonga 3:15) Ino inga twasinizya buti oobo? Mu Bbaibbele zina lyakwe lilajanika ziindi ziinda ku 7,000! a Zina lyakuti Jehova, ndilya “Leza mwini-mwini kujulu aanyika.”—Deuteronomo 4:39.
2. Ino Bbaibbele litwaambila nzi kujatikizya Jehova?
Bbaibbele lyaamba kuti akati kabaleza boonse bakombwa abantu, Jehova ngo Leza alikke wakasimpe. Nkaambo nzi? Kuli twaambo tunji. Jehova mweendelezi mupati, alimwi walo alikke ngo “Mupatikampatila atala aanyika yoonse.” (Amubale Intembauzyo 83:18.) Ngu “Singuzuzyoonse” nkaambo ulijisi nguzu zyakucita kufwumbwa ncaasala kucita. “Ngowakalenga zintu zyoonse” kujulu aanyika. (Ciyubunuzyo 4:8, 11) Mukwiimpana amuntu uuli woonse, Jehova waliko lyoonse, alimwi unooliko mane kukabe kutamani.—Intembauzyo 90:2.
AMWIIYE ZINJI
Atubone kwiindana kuliko akati kamazina aabulemu alimwi azina lyakwe lilibedelede. Mpoonya tulaiya mbwaakaliyubununa zina lyakwe kulindinywe.
3. Leza ujisi mazina manji aabulemu, pele ujisi buyo zina lyomwe limugeme
Kutegwa tubone kwiindana kuliko akati kazina lyabulemu azina limugeme muntu, atweebelele VIDIYO, akubandika mubuzyo uutobela.
-
Nkwiindana nzi kuliko akati kazina lyabulemu, mbuli lyakuti “Mwami” alimwi azina buyo?
Bbaibbele lyaamba kuti bantu bakomba baleza banji abami. Amubale Intembauzyo 136:1-3, akubandika mubuzyo ooyu:
-
Ino “Leza wabaleza” alimwi “a Mwami wabami” nguni?
4. Jehova uyanda kuti mulizyibe zina lyakwe akulibelesya
Ncinzi citondezya kuti Jehova uyanda kuti mulizyibe zina lyakwe? Atweebelele VIDIYO, akubandika mubuzyo uutobela.
-
Nkaambo nzi ncomuyeeya kuti Jehova uyanda kuti zina lyakwe lizyibwe?
Jehova uyanda kuti bantu kabalibelesya zina lyakwe. Amubale Baroma 10:13, akubandika mibuzyo eeyi:
-
Nkaambo nzi ncociyandika kubelesya zina lya Leza lyakuti Jehova?
-
Ino mulimvwa buti ciindi muntu umwi nabelesya zina lyanu?
-
Ino muyeeya kuti Jehova ulimvwa buti ciindi nomubelesya zina lyakwe?
5. Jehova uyanda kuti mube mulongwe wakwe
Mukaintu umwi waku Cambodia wazina lya Soten wakaamba kuti, kwiiya zina lya Leza “kwakamugwasya kujana lukkomano lwini-lwini.” Atweebelele VIDIYO, akubandika mubuzyo uutobela.
-
Muvidiyo, ino kwiiya zina lya Leza kwakabapa kucita nzi ba Soten?
Kamutanatalika kumvwana amuntu umwi, inga musaanguna kuzyiba zina lyakwe. Amubale Jakobo 4:8a, akubandika mibuzyo eeyi:
-
Ino Jehova umutamba kuti mucite nzi?
-
Mbuti kuzyiba zina lya Leza alimwi akulibelesya mbokukonzya kuyumya cilongwe canu anguwe?
BAMWI BAAMBA KUTI: “Kuli buyo Leza omwe, aboobo tacikwe makani ambotumwiita.”
-
Sena mulasyoma kuti Jehova ndezina lya Leza?
-
Ino inga mwamupandulwida buti muntu, kuti Leza uyanda kuti katulibelesya zina lyakwe?
MUBUFWAAFWI
Jehova ndizina lya Leza mwini-mwini uuli alikke. Uyanda kuti tulizyibe zina eeli kutegwa tube acilongwe anguwe.
Ncinzi Ncomwaiya?
-
Ino Jehova wiindene buti abaleza bambi boonse bantu mbobakomba?
-
Nkaambo nzi ncotweelede kulibelesya zina lya Leza?
-
Ncinzi citondezya kuti Jehova uyanda kuti mube acilongwe anguwe?
AMUZYIBE ZINJI
Atulange-lange twaambo tosanwe tutupa kusyoma kuti Leza nkwali.
Nkaambo nzi ncocili camaano kusyoma kuti Leza waliko lyoonse?
“Ino Nguni Wakamulenga Leza?” (Ngazi Yamulindizi, August 1, 2014)
Atubone kaambo ncotweelede kulibelesya zina lya Leza, nokuba kuti tatuzyi bwini mbolyakali kwaambwa kaindi.
Sena tacikwe makani ambotumwiita Leza? Amubone kaambo ncotwaambila kuti ujisi buyo zina lyomwe limugeme.
a Kutegwa muzyibe bupanduluzi bwazina lya Leza alimwi akaambo ncobakaligusya mubusanduluzi bwama Bbaibbele aambi, amubone Makani Aayungizyidwe A4 mu Bbaibbele lya Busanduluzi bwa Nyika Mpya.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
