DYONDZO 04
Xikwembu I Mani?
Se i khale vanhu va ri karhi va gandzela swikwembu ni swikwembu swa xisati swo tala. Kambe Bibele yi vulavula hi Xikwembu xin’we lexi nga “xikulu eka swikwembu leswin’wana hinkwaswo.” (2 Tikronika 2:5) I mani Xikwembu lexi naswona i yini xi endlaka leswaku xi va xikulu eka swikwembu leswin’wana hinkwaswo leswi vanhu va swi gandzelaka? Eka nhlokomhaka leyi, dyondza ndlela leyi Xikwembu xi ti tivisaka ha yona eka wena.
1. I mani vito ra Xikwembu naswona hi swi tiva njhani leswaku xi lava hi ri tiva?
Xikwembu xi tirhisa Bibele leswaku xi titivisa eka hina. Xi ri: “Hi mina Yehovha. Rero i vito ra mina.” (Hlaya Esaya 42:5, 8.) “Yehovha” i vito leri hundzuluxeriweke ku suka eka Xiheveru leri nga vulaka leswaku “U Endla Leswaku Swi Va Kona.” Yehovha u lava hi tiva vito ra yena. (Eksoda 3:15) Hi swi tivisa ku yini leswi? EBibeleni ri boxiwa ku tlula ka 7 000! a Vito leri nge Yehovha i ra “Xikwembu xa ntiyiso ematilweni ni le misaveni.”—Deteronoma 4:39.
2. Bibele yi hi byela yini hi Yehovha?
Bibele yi vula leswaku eka swikwembu hinkwaswo leswi gandzeriwaka hi vanhu, Yehovha hi yena ntsena Xikwembu xa ntiyiso. Hikwalaho ka yini? Ku ni swivangelo swo hlayanyana. Yehovha u ni vulawuri lebyikulu naswona hi yena ntsena “La Nge Henhlahenhla emisaveni hinkwayo.” (Hlaya Pisalema 83:18.) I Xikwembu xa “Matimba Hinkwawo,” leswi vulaka leswaku u ni matimba yo endla leswi a lavaka ku swi endla. U “tumbuluxe swilo hinkwaswo”—vuako ni swilo hinkwaswo leswi hanyaka emisaveni. (Nhlavutelo 4:8, 11) I Yehovha ntsena loyi a a ri kona naswona u ta tshama a ri kona hilaha ku nga heriki.—Pisalema 90:2.
ANAKANYISISA
Kambisisa ku hambana eka mavito yo fundzha Xikwembu ni vito ra xona ro hlawuleka. Tlhela u kambisisa leswaku hikwalaho ka yini xi ku tivise vito ra xona nileswaku xi titivise njhani.
3. Xikwembu xi vitaniwa hi tindlela to tala kambe xi ni vito rin’we
Leswaku u vona ku hambana eka vito ra munhu ni mavito yo n’wi fundzha, tlanga VHIDIYO, ivi mi bula hi xivutiso lexi landzelaka.
-
Hi kwihi ku hambana exikarhi ka xithopo lexi nge “Hosi,” ni vito?
Bibele yi vula leswaku vanhu va gandzela swikwembu ni tihosi to tala. Hlaya Pisalema 136:1-3, ivi mi bula hi xivutiso lexi:
-
I mani “Xikwembu xa swikwembu” ni “Hosi ya tihosi”?
4. Yehovha u lava leswaku u tiva vito ra yena u tlhela u ri tirhisa
U swi tivisa ku yini leswaku Yehovha u lava leswaku u tiva vito rakwe? Tlanga VHIDIYO, ivi mi bula hi swivutiso leswi landzelaka.
-
U ehleketa leswaku Yehovha wa swi lava ku vanhu va tiva vito rakwe? Hikwalaho ka yini u vula tano?
Yehovha u lava leswaku vanhu va tirhisa vito rakwe. Hlaya Varhoma 10:13, ivi mi bula hi swivutiso leswi:
-
Hikwalaho ka yini swi ri swa nkoka ku tirhisa vito ra Xikwembu leri nge Yehovha?
-
U titwa njhani loko un’wana a tsundzuka vito ra wena a tlhela a ku vitana hi ndlela leyi u lavaka ku vitaniwa ha yona?
-
U ehleketa leswaku Yehovha u titwa njhani loko u tirhisa vito rakwe?
5. Yehovha u lava leswaku u va munghana wakwe
Wansati un’wana la vuriwaka Soten loyi a humaka eCambodia u vula leswaku ku tiva vito ra Xikwembu “a ku ri nchumu wa nkoka ngopfu” eka yena. Tlanga VHIDIYO, ivi mi bula hi xivutiso lexi landzelaka.
-
Eka vhidiyo leyi, Soten u titwe njhani loko a ta va a tive vito ra Xikwembu?
Loko u nga si va munghana wa munhu wo karhi, u sungula hi ku tiva vito rakwe. Hlaya Yakobo 4:8a, ivi mi bula hi swivutiso leswi:
-
Yehovha u lava leswaku u endla yini?
-
Ku tiva vito ra Xikwembu ni ku tlhela u ri tirhisa swi nga ku pfuna njhani leswaku u va munghana wa xona?
VAN’WANA VA RI: “Ku ni Xikwembu xin’we ntsena, a swi na mhaka leswaku u xi vitana hi vito rihi.”
-
Xana wa tshemba leswaku Yehovha i vito ra Xikwembu?
-
Hikwalaho ka yini Xikwembu xi lava hi tirhisa vito ra xona?
NKATSAKANYO
Yehovha i vito ra Xikwembu xa ntiyiso. U lava leswaku hi ri tiva hi tlhela hi ri tirhisa leswaku hi ta va vanghana va yena.
Mpfuxeto
-
Yehovha u hambane njhani ni swikwembu leswin’wana hinkwaswo leswi vanhu va swi gandzelaka?
-
Hikwalaho ka yini hi fanele hi tirhisa vito ra Xikwembu?
-
I yini leswi kombisaka leswaku Yehovha u lava u va munghana wakwe?
KUMA LESWI ENGETELEKEKE
Kambisisa swivangelo swa ntlhanu leswi endlaka hi tshemba leswaku Xikwembu xi kona.
“Xana Xikwembu Xi Kona?” (Nhlokomhaka leyi kumekaka eka website)
Kambisisa leswaku hikwalaho ka yini swi twala ku tshemba leswaku Xikwembu i khale xi ri kona.
“I Mani Loyi A Endleke Xikwembu?” (Xihondzo xo Rindza, August 1, 2014)
Kambisisa leswaku hikwalaho ka yini hi fanele hi tirhisa vito ra Xikwembu hambiloko hi nga swi tivi leswaku khale a ri vitaniwa njhani.
Xana i swa nkoka leswaku hi xi vitana hi vito rihi Xikwembu? Xiya leswaku hikwalaho ka yini hi vula leswaku xi ni vito rin’we ntsena.
“Xikwembu Xi Na Mavito Mangani?” (Nhlokomhaka leyi kumekaka eka website)
a Leswaku u kuma leswi engetelekeke mayelana ni nhlamuselo ya vito ra Xikwembu ni leswaku hikwalaho ka yini eTibibeleni tin’wana ri susiwile, vona Xiengetelo A4 eka Bibele—Matsalwa Yo Kwetsima Ya Misava Leyintshwa.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
