JORHENGUARHIKUA 4
¿Neeski Tata Diosï?
Desde enga ueenaka kʼuiripu jarhani, uánikua tata diosïchanksï kómarhiasïndi. Perujtsïni Biblia aiangusïndi eska jarhaska ma Tata Diosï “enga sánderu kʼérika eska iámindu máteru diosïcha” (2 Crónicas 2:5). ¿Nákiski i Tata Diosï? ¿Ka andisï sánderu k’érii eska iámindu máteru diosïcha enga kʼuiripu kómarhiajka? Ini jorhenguarhikua jimbo, exeakajtsï ambe uékasïni Tata Diosï eskajtsï míteaka imeeri ambe.
1. ¿Na arhinhasïni Tata Diosï, ka nénachi míteski eska ima uékasïnga eskachi míteaka na enga arhinhajka?
Bibliarhu Tata Diosï mismu uandasïndi ne enga jindeeka ima. Ima i ambe uandasïndi: “Ji jindeeska Jeoba. I jindeesti juchiiti nombri” (arhinta je Isaías 42:5, 8). I nombri ebreu jimbo jarhasti ka pʼurhe jimbo ísï peeranhasti Jeoba, imeecha engaksï mítekuka uandasïndiksï eska arhikuekasïnga “ima úsïndi eska iámindu ambe úkuarhiaka”. Jeoba uékasïndi eskachi míteaka na enga arhinhajka (Éxodo 3:15). ¿Nénachi míteski i ambe? Jimboka Bibliarhu, Tata Diosï jukari 7,000 xanhari kararkuarhiska i nombrini. a Jeoba arhinhasïndi, “Tata Diosï jurhimbiti auandarhu ka echerirhu” anapu (Deuteronomio 4:39).
2. ¿Ambejtsïni aiangusïni Biblia Jeobaeri ambe?
Kʼuiripuechaksï uánikua diosïchani kómarhiasïndi, perujtsïni Biblia arhisïndi eska májku Tata Diosï jarhaska enga tsípitiika, Jeoba. ¿Andi? Uánikua ambe jimbo. Ima jindeesti sánderu kʼéri juramuti ka imajku jindeesti “enga Sánderu K’éri ambeeka iámu parhakpinirhu” (arhinta je Salmo 83:18). No nema jarhasti enga sánderu uinhapitiika eska ima, jimbosï újti úni ambe enga ima uékajka. Ístu ima Kueraajpiristi, ima kueraasti Echerini ka auandani ka iámindu ambe enga tsípiti jaka (Jaŋaskuecha 4:8, 11). Ka ístu, desde méntkisï Jeoba tsípiti jarhasti ka no méni uarhiati (Salmo 90:2).
JORHENGUARHI JE SÁNDERU AMBE
Tata Diosï erakukuarhesti imeeri nombrini ka exeakachi andisï no májkueni títulu ma ka eska imeeri nombri. Ístuchi jorhenguarhiaka andijtsïnisï aiangujki imeeri nombrini ka andisï uéjki eskajtsï chá míteaka na enga arhinhajka ima.
3. Mámaruksï uandajpasïndi Tata Diosïni peru ima májku nombri jukasti
Parajtsï exeni eska no májkueniska na engaksï arhijka kʼuiripuni ma ka eska úrani imeeri nombrini, exe je BIDEUNI ka uandontskuarhi je íri ambe:
-
¿Andisï no májkueni nemani Tata arhini ka eska imeeri nombri jimbo uandajpani?
Biblia arhisïndi eskaksï kʼuiripuecha uánikua diosïchani ka tateechani kómarhiasïnga. Arhinta je Salmo 136:1-3 ka uandontskuarhi je íri ambe:
-
¿Né jindeeski “Diosï diosïcheri” ka “Tata tateecheri”?
4. Jeoba uékasïndi eskajtsï míteaka imeeri nombrini ka eskajtsï úraaka
¿Nénachi míteski eska Jeoba uékasïnga eskajtsï míteaka na enga arhinhajka? Exe je BIDEUNI ka uandontskuarhi je íri ambe:
-
¿Andisï uéjki Tata Diosï eska mítekuarhiaka na enga arhinhajka?
Jeoba uékasïndi eskaksï kʼuiripuecha úraaka imeeri nombrini. Arhinta je Roma 10:13 ka uandontskuarhi je íri ambe:
-
¿Andisï xáni jukaparhakue eskachi úraaka Tata Diosï Jeobaeri nombrini?
-
¿Nénajtsï pʼikuarherasïni chá engaksïni nema nombri jimbo uandajpajka?
-
¿Néna pʼikuarherajki Jeoba engajtsï chá úrajka imeeri nombrini?
5. Jeoba uékasïndi eska chá imeeri amigueuaka
Kamboia anapu ma uarhiiti enga Soteni arhinhajka, uandaspti eska no ma ambe jarhaska enga sánderu sésiika ka eska míteni na enga arhinhajka Tata Diosï. Exe je BIDEUNI ka uandontskuarhi je íri ambe:
-
Ísï eska na xarharajka bideurhu, ¿néna marhuakuspi Sotenini míteni na enga arhinhajka Tata Diosï?
Engachi jucha mítejka nemani ambe engachi orheta jorhenguarhijka jindeesti na enga arhinhajka. Arhinta je Santiagu 4:8a ka uandontskuarhi je íri ambe:
-
¿Ambeksïni arhixaki Tata Diosï eskajtsï uaaka?
-
Míteni Tata Diosïri nombrini ka úrani, ¿uaa úni eskajtsï chá sánderu andarhieraaka imani? ¿Andi?
MÁRUKSÏ I AMBE UANDASÏNDI: “Májku Tata Diosï jarhasti, ísï jimbo no arhiaati na enga ma uandajpaaka”.
-
¿Jakajkusïntsï chá eska Tata Diosï, Jeoba arhinhasïnga?
-
¿Nénajtsï úpirini chá arhistakuani máteruechani eska Tata Diosï uékasïnga eskachi úraaka imeeri nombrini?
AMBE ENGACHI JORHENGUARHIKA
Tata Diosï tsípiti, Jeoba arhinhasïndi. Parachi úni imeeri amigueni, ima uékasïndi eskachi míteaka ka úrani imeeri nombrini.
Ambejtsï jorhenguarhiski
-
¿Andisï no májkuenii Jeoba eska ima diosïcha enga kʼuiripu kómarhiajka?
-
¿Andichisï jatsi para úrani Tata Diosïri nombrini?
-
¿Nénachi míteski eska Jeoba uékasïnga eska chá imeeri amigueuaka?
ÍSTU EXE JE INI AMBE
Exe je sinko ambe engaksïni jarhuataaka kurhanguni eska jarhaska Tata Diosï tsípiti ma.
“¿Meru jarhaski Tata Diosï ma?” (Artikulu ma enga jw.org jimbo jaka)
Jorhenguarhi je andichisï uaa seguru jarhani eska Tata Diosï méntkisï jarhaska.
“¿Né kueraaski Tata Diosïni?” (Aianhpiri, 1 de agostu de 2014)
Jorhenguarhi je andichisï jatsi para úrani Jeobaeri nombrini nájkirukachi no míteka na enga kurhaakuarhienga ióntki Jeobaeri nombri.
¿Jukaparhakueski na engachi uandajpajka Tata Diosïni? Jorhenguarhi je andichisï uandajki eska Tata Diosï májku arhinhakua jatsiska.
“¿Namuni nombrichani jatsiaski Tata Diosï?” (Artikulu ma enga jw.org jimbo jaka)
a Engajtsï uéjka sánderu míteni Tata Diosïri nombriri ambe ka ambe enga arhikuekajka ka andiksïsï máru Bibliaecharhu pʼikunta i nombrini, exe je Bibliarhu apéndice A4 La Biblia. Traducción del Nuevo Mundo utusï jimbo.
Jamberijtsï ístu uéjka ini ambe míteni
KURHAMARHIKUECHA ENGAKSÏ SÁNDERU ÚKUARHIJKA
¿Nénaksï jorhentpisïni Biblieri ambe Jeobaeri testiguecha?
Parajtsï Jeobaeri testiguechani jingoni jorhenguarhini Biblieri ambe, chájtsï uaaka náki uéjki Bibliani jingoni jorhenguarhini. Ístujtsï uaaka pʼímarhini chaari familiani o amiguechani.
