SAMBIRO 04
Kasi Chiuta Ninjani?
Kwamba kale chomene, ŵanthu ŵakusopa ŵachiuta ŵakupambanapambana. Kweni Baibolo likuti Chiuta yumoza ndiyo “ni mukuru kuluska ŵachiuta ŵanyake wose.” (2 Midauko 2:5) Kasi Chiuta uyu ninjani? Chifukwa wuli Chiuta uyu ni mukuru kuluska ŵachiuta ŵanyake wose awo ŵanthu ŵakusopa? Mu sambiro ili, muwonenge kuti Chiuta uyu wakukhumba kuti mumumanye.
1. Kasi zina la Chiuta ninjani, ndipo kasi tikumanya wuli kuti wakukhumba kuti tilimanye?
Chiuta wakutiphalira zina lake kwizira mu Baibolo. Iyo wakuti: “Ine ndine Yehova. Ili ndilo zina lane.” (Ŵazgani Yesaya 42:5, 8.) Zina lakuti “Yehova” lili kufuma ku lizgu Lachihebere ilo likung’anamura kuti “Wakuchitiska Kuŵako.” Yehova wakukhumba kuti timanyenge zina lake. (Ekisodo 3:15) Kasi tikumanya wuli? Mu Baibolo, zina lake likusangika mu malo ghakujumpha 7,000! a Zina lakuti Yehova nda “Chiuta waunenesko mu mtambo kuchanya na charu chapasi kusi.”—Dotoronome 4:39.
2. Kasi Baibolo likutiphalira vichi vyakukhwaskana na Yehova?
Baibolo likuti Yehova yekha ndiyo ni Chiuta waunenesko pa ŵachiuta wose awo ŵanthu ŵakusopa. Chifukwa? Pali vifukwa vinandi chomene. Yehova ndiyo wali na mazaza ghakuru chomene, nakuti ndiyo yekha “Wapachanya Nkhanira pa charu chose chapasi.” (Ŵazgani Salimo 83:18.) Iyo wakuchemeka “Wankhongonozose,” chifukwa wali na nkhongono zakuchitira chilichose icho wakhumba. Iyo ‘wakalenga vinthu vyose,’ vyakuchanya na vyose vya pa charu. (Chivumbuzi 4:8, 11) Nakuti ni Yehova pera uyo wakaŵako, waliko ndipo wazamuŵako muyirayira.—Salimo 90:2.
MANYANI VINANDI
Manyani mphambano iyo yilipo pakati pa mazina ghaudindo gha Chiuta na zina lake leneko, kweniso chifukwa icho wali kuvumbulira zina lake kwa imwe.
3. Chiuta wali na mazina ghanandi ghaudindo, kweni wali na zina leneko limoza
Kuti mumanye mphambano iyo yilipo pakati pa mazina ghaudindo na zina leneko, wonelerani VIDIYO, kufuma apo dumbiskanani fumbo ili.
-
Kasi pali mphambano wuli pakati pa zina laudindo nga lakuti “Fumu,” na zina leneko?
Baibolo likuti ŵanthu ŵakusopa ŵachiuta na mafumu ghanandi. Ŵazgani Salimo 136:1-3, kufuma apo dumbiskanani fumbo ili:
-
Kasi “Chiuta wa ŵachiuta” na “Fumu ya mafumu” ninjani?
4. Yehova wakukhumba kuti mulimanye zina lake na kulizunura
Kasi mukumanya wuli kuti Yehova wakukhumba kuti mulimanye zina lake? Wonelerani VIDIYO, kufuma apo dumbiskanani fumbo ili.
-
Chifukwa wuli Yehova wakukhumba kuti mulimanye zina lake?
Yehova wakukhumba kuti ŵanthu ŵachemenge pa zina lake. Ŵazgani Ŵaroma 10:13, kufuma apo dumbiskanani mafumbo agha:
-
Chifukwa wuli ntchakuzirwa kuzunura zina la Chiuta lakuti Yehova?
-
Kasi mukujipulika wuli usange munthu munyake wakukumbuka zina linu na kulizunura?
-
Kasi mukughanaghana kuti Yehova wakujipulika wuli usange mukuzunura zina lake?
5. Yehova wakukhumba kuti muŵe nayo paubwezi
Mwanakazi munyake wa ku Cambodia zina lake Soten wakuti kumanya zina la Chiuta kukamovwira kuti wakondwenge na umoyo. Wonelerani VIDIYO, kufuma apo dumbiskanani fumbo ili.
-
Kuyana na ivyo mwawona mu vidiyo, kasi Soten wasanga chandulo wuli chifukwa cha kumanya zina la Chiuta?
Pambere mundaŵe paubwezi na munthu, chakwamba mukumanya dankha zina lake. Ŵazgani Yakobe 4:8a, kufuma apo dumbiskanani mafumbo agha:
-
Kasi Yehova wakumupemphani kuti muchite vichi?
-
Kasi kumanya na kuzunura zina la Chiuta kungamovwirani wuli kuti mujipulike kuti muli nayo paubwezi?
IVYO ŴANYAKE ŴAKUYOWOYA: “Kuli Chiuta yumoza pera ntheura ungamuchema zina lililose ilo wakhumba.”
-
Kasi mukugomezga kuti Chiuta zina lake ni Yehova?
-
Kasi mungalongosora wuli kuti Chiuta wakukhumba kuti tizunurenge zina lake?
MWAKUDUMURA
Zina la Chiuta waunenesko ni Yehova. Iyo wakukhumba kuti tilimanyenge zina lake na kulizunura kuti tiŵe nayo paubwezi.
Kuweleramo
-
Kasi Yehova wakupambana wuli na ŵachiuta ŵanyake wose awo ŵanthu ŵakusopa?
-
Chifukwa wuli tikwenera kuzunura zina la Chiuta?
-
Kasi ntchivichi chikulongora kuti Yehova wakukhumba kuti muŵe nayo paubwezi?
SANGANI FUNDO ZAKUSAZGIKIRA
Wonani fundo 5 izo zikutovwira kugomezga kuti Chiuta waliko nadi.
Wonani chifukwa icho tikugomezgera kuti Chiuta waliko nyengo zose.
“Kasi Ni Njani Wakalenga Chiuta?” (Gongwe la Mulinda, Ogasiti 1, 2014)
Wonani chifukwa icho tikwenera kuzunura zina la Chiuta nangauli tikumanya yayi umo ŵakazunuliranga kale.
Kasi tingamuchema Chiuta mulimose umo takhumbira? Wonani chifukwa icho tikuyowoyera kuti Chiuta wali na zina leneko limoza.
“Kasi Chiuta Wali na Mazina Ghalinga?” (Nkhani ya pa Intaneti)
a Kuti mumanye vinandi ivyo zina la Chiuta likung’anamura, kweniso chifukwa icho mu Mabaibolo ghanyake ŵali kufumiskiramo zina ili, wonani Vyakusazgirapo A4 mu Baibolo la Malemba Ghakupatulika mu Mang’anamuliro gha Charu Chiphya.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Kosi ya Kusambira Baibolo ya Ŵakaboni ŵa Yehova Ni Vichi?
Apo mukusambira Baibolo munthowa yakudumbiskana na Ŵakaboni ŵa Yehova, mungagwiliskira ntchito Baibolo lililose ilo mwakhumba. Fwatukani kuchemerako banja linu panji ŵabwezi ŵinu.
