MATAUPU 04
Ko oi te Atua?
Ko leva eiloa ne tapuaki atu a tino ki atua mo atua fā‵fine e uke. Kae ne fakaasi mai i te Tusi Tapu me e tokotasi fua te Atua telā “e sili atu i nisi atua katoa.” (2 Nofoaiga Tupu 2:5) Ko oi tenā? Kae kaia e sili atu ei a ia i atua katoa kolā e tapuaki ki ei a tino? I te mataupu tenei, onoono me e manako te Atua tenei ke iloa ne koe a mea e uiga ki a ia.
1. Ko oi te igoa o te Atua, kae e iloa pefea ne tatou me e manako ke iloa ne tatou a ia?
E fakaasi mai ne te Atua a fakamatalaga e uiga ki a ia i te Tusi Tapu. Ana muna: “Au ko Ieova. Tenā toku igoa.” (Faitau te Isaia 42:5, 8.) A “Ieova” ko te ‵fuliga o te igoa Epelu telā e fakauiga ki te “Ka Fai Eiloa ne Au so se Mea e ‵Tau o Fai.” E manako a Ieova ke iloa ne tatou tena igoa. (Esoto 3:15) E iloa pefea ne tatou te mea tenā? I te Tusi Tapu, e sili atu i te 7,000 taimi ne tusi i ei tena igoa! a E fakasino atu fua te igoa ko Ieova ki “te Atua tonu i te lagi i luga mo te lalolagi i lalo nei.”—Teutelonome 4:39.
2. Se a te mea e fakaasi mai i te Tusi Tapu e uiga ki a Ieova?
E fai mai te Tusi Tapu me i tafa o atua katoa kolā e tapuaki ki ei a tino, a Ieova ko te Atua tonu fua e tokotasi. Kaia? E uke a pogai. A Ieova ko te ‵toe pule sili, kae ko ia fua tokotasi “te Atua Tafasili i te Maluga i te lalolagi kātoa.” (Faitau te Salamo 83:18.) A ia ko “te Atua Malosi Katoatoa” ko tena uiga, e maua ne ia te ‵mana ke fai so se mea e ‵tau o fai. Ne “faite ne ia a mea katoa”—te iunivesi mo mea ola katoa i te lalolagi. (Fakaasiga 4:8, 11) E se pelā mo tino, ne ola faeloa Ieova, kae ka ola foki a ia ki te se-gata-mai.—Salamo 90:2.
KELI MALOSI IFO
Ke iloilo aka te ‵kese o tofi o te Atua mo tena igoa tāua. Ko onoono ki te auala mo te pogai ne fakaasi atu tena igoa ki a koe.
3. E uke a tofi o te Atua kae tasi tena igoa
Ke lavea atu a te ‵kese o te ‵tofi o se tino mo tena igoa, pei te VITIO, ko sau‵tala ei ki te fesili tenei.
-
Se a te ‵kese o se tofi e pelā mo te “Aliki,” mo se igoa?
E fai mai te Tusi Tapu me e tapuaki a tino ki atua mo aliki e tokouke. Faitau te Salamo 136:1-3, ko sau‵tala ei ki te fesili tenei:
-
Ko oi “te Atua o atua” mo “te Aliki o aliki”?
4. E manako a Ieova ke iloa kae fakaaoga ne koe tena igoa
Ne a mea e fakaasi mai me e manako a Ieova ke iloa ne koe tena igoa? Pei te VITIO, ko sau‵tala ei ki fesili konei.
-
Se a tau faka‵tau, e mata, e manako te Atua ke iloa ne tino tena igoa? Kaia?
E manako a Ieova ke fakaaoga ne tino tena igoa. Faitau te Loma 10:13, ko sau‵tala ei ki fesili konei:
-
Kaia e tāua ei ke fakaaoga te igoa o te Atua, ko Ieova?
-
Ne a ou lagonaga māfai e masaua ne se tino tou igoa kae fakaaoga ne ia?
-
Se a tau faka‵tau me ne a lagonaga o Ieova māfai e fakaaoga ne koe tena igoa?
5. E manako a Ieova ke fakapilipili atu koe ki a ia
Ne fai mai se fafine mai Cambodia e igoa ki a Soten me i te iloaga ne ia te igoa o te Atua ne fesoasoani atu ke maua ne ia “te ‵toe lagonaga ‵lei eiloa.” Pei te VITIO, ko sau‵tala ei ki te fesili tenei.
-
I te vitio, ne otia pefea a Soten i te iloaga ne ia te igoa o te Atua?
A koi tuai o fai koe mo taugasoa o se tino, e masani o fia iloa muamua ne koe tena igoa. Faitau te Iakopo 4:8a, ko sau‵tala ei ki fesili konei:
-
Se a te mea e fakamalosi atu a Ieova ke fai ne koe?
-
E mafai pefea o fesoasoani atu a te iloaga ki te fakaaogaga o te igoa o te Atua ke pili atu koe ki a ia?
MEA E FAI MAI NE NISI TINO: “E tokotasi fua te Atua, tela la, e mafai fua o fakaaoga so se igoa.”
-
E a, e talitonu koe me i a Ieova ko te igoa o te Atua?
-
Ka fakamatala atu pefea ne koe me e manako te Atua ke fakaaoga ne tatou tena igoa?
MANATU AOGA
A Ieova ko te igoa o te Atua tonu. E manako a ia ke iloa kae fakaaoga te igoa tenā ke mafai o fakapili‵pili atu ki a ia.
Fesili
-
E ‵kese pefea a Ieova mai nisi atua katoa?
-
Kaia e ‵tau o fakaaoga ne tatou te igoa o te Atua?
-
Ne a mea e fakaasi mai me e manako a Ieova ke fakapilipili atu koe ki a ia?
NISI FAKAMATALAGA
Ke iloilo aka a pogai e lima kolā e fakamaoni mai i ei me e ola tonu te Atua.
Kaia e ‵lei ke tali‵tonu me ne ola faeloa te Atua?
“Ko oi ne Faite ne Ia te Atua?” (Te Faleleoleo Maluga, Aokuso 1, 2014)
Tauloto ki te pogai e ‵tau ei o fakaaoga ne tatou te igoa o te Atua, faitalia me e se iloa ne tatou te faka‵leoga tonu i aso mua.
E mata, e tāua te igoa e fakaaoga ne tatou ki te Atua? Onoono ki te pogai e mafai ne tatou o fai atu me e tasi fua tena igoa.
a Mō nisi fakamatalaga e uiga ki te igoa o te Atua mo te pogai ne ave keatea ei mai nisi ‵fuliga o te Tusi Tapu, onoono ki te Mataupu Fakaopoopo A4 i te Tusi Tapu i te ‵Fuliga o te Lalolagi Fou.
