UYONO 04
Ono Yen Ọghẹnẹ?
Emerha nuro rhanvwẹ ọke ra vwọ ma ihworakpọ, ọyen ayen vwọ ga eghẹnẹ buebun cha re. Dedena, Baibol na ta ota kpahen Ọghẹnẹ ọvo rọ “rhonọ edjọ ejobi.” (2 Ikun Rivie 2:5) Ono yen Ọghẹnẹ yena? Kẹ idjerhe vọ yen ọ vwọ rho nọ eghẹnẹ ri chekọ rẹ ihwo vwẹ ẹga kẹ? Vwẹ uyono nana, yono kpahen oborẹ Ọghẹnẹ nana dje oma rọyen kẹ wẹ wan.
1. Die yen odẹ rẹ Ọghẹnẹ, kẹ mavọ yen o vwo mu avwanre ẹro nẹ ọ guọnọre nẹ avwanre riẹn odẹ na?
Vwẹ Baibol na, Ọghẹnẹ dje oma rọyen kẹ avwanre. Ọ da ta: “Mẹvwẹ Jihova. Ọyehẹ odẹ me.” (Se Aizaya 42:8, NW.) “Jihova,” ọyen odẹ ra fan vwo nẹ odẹ ri Hibru ro se mudiaphiyọ “Ọ ro se Ru Kemu Kemu ro Rhere Ẹwẹn.” Jihova guọnọre nẹ avwanre riẹn odẹ rọyen. (Eyanno 3:15) Diesorọ avwanre vwo vwo imuẹro nana? A mrẹ odẹ rọyen vwẹ Baibol na vrẹ abọ 7,000! a Jihova yen odẹ rẹ “Ọghẹnẹ rọ evun rẹ odjuvwu vẹ enu rẹ akpọ rọ herọ vwẹ obotọ na.”—Urhi Rivẹ 4:39.
2. Die yen Baibol na vuẹ avwanre kpahen Jihova?
Baibol na tare nẹ usun rẹ eghẹnẹ rẹ ihworakpọ vwẹ ẹga kẹ, Jihova ọvo yen Ọghẹnẹ rẹ uyota na. Diesorọ? Fikirẹ erọnvwọn buebun. Jihova yen vwo ogangan rọ ma rho kparobọ, ọyen ọvo yen “Me Kpenu vwẹ enu rẹ akpọ na ejobi.” (Se Une Rẹ Ejiro 83:18.) Ọyehẹ “Ọrovwoẹgba,” ro mudiaphiyọ nẹ o vwo ẹgba ro vwo ru kemu kemu rọ guọnọre. Ọyen “mama emu ejobi” kọyen akpọ vẹ odjuvwu kugbe kemu kemu rehẹ evun rayen. (Ẹvwọphia 4:8, 11) Vwọ fẹnẹ kohwo kohwo, Jihova vwo ọtonphiyọ-ọ, ọ je cha dia bẹdẹ bẹdẹ.—Une Rẹ Ejiro 90:2.
HIẸ KODO
Fuẹrẹn ofẹnẹ rọ herọ vwẹ uvwre rẹ edova rẹ Ọghẹnẹ vẹ oderhi rọyen. Wo ji yono idjerhe ro vwo dje odẹ rọyen kẹ avwanre vẹ oboresorọ o vwo ru ọtiọyen.
3. Ọghẹnẹ vwo edova buebun, ẹkẹvuọvo odẹ vuọvo yen o vwori
A sa vwọ mrẹ ofẹnẹ rọ herọ vwẹ uvwre odẹ rẹ ohwo vẹ odova rẹ ohwo, Hworo IVIDIO na, ovwan ta ota kpahen onọ ro nenire.
-
Die yen ofẹnẹ rẹ odova kerẹ “Ọrovwori” vẹ oderhi?
Baibol na tare nẹ ihwo ga eghẹnẹ buebun vẹ irivwori buebun. Se Une Rẹ Ejiro 136:1-3, ovwan ta ota kpahen onọ nana:
-
Ono yen “Ọghẹnẹ Osonobrughwẹ” vẹ “Ọrovwohwo rọrovwihwo”?
4. Jihova guọnọre nẹ wọ riẹn odẹ rọyen je reyọ vwo ruiruo
Die yen djerephia nẹ Jihova guọnọre nẹ wọ riẹn odẹ rọyen? Hworo IVIDIO na, ovwan ta ota kpahen enọ ri nenire.
-
Wo rorori nẹ Jihova guọnọre nẹ a riẹn odẹ rọyen? Kẹ, diesorọ?
Jihova guọnọre nẹ ihwo reyọ odẹ rọyen vwo ruiruo. Se Rom 10:13, ovwan ta ota kpahen enọ nana:
-
Mavọ yen ọ ghanre te ra vwọ vwẹ odẹ rẹ Ọghẹnẹ rọ dia Jihova vwo ruiruo?
-
Mavọ yen oma ru we siẹrẹ ohwo da karophiyọ odẹ wẹn je reyọ vwo se we?
-
Mavọ wo rorori nẹ oma ru Jihova siẹrẹ wọ da vwẹ odẹ rọyen vwo ruiruo?
5. Jihova guọnọre nẹ wo sikẹrẹ ọyen
Aye ọvo ro nẹ Cambodia rhe re se Soten tare nẹ, “odẹ rẹ Ọghẹnẹ rọ rhe riẹn nẹrhẹ o vwo omavwerhovwẹn vwọ vrẹ obo ri jovwo.” Hworo IVIDIO na, ovwan ta ota kpahen enọ ri nenire.
-
Vwẹ ividio na, mavọ yen odẹ rẹ Ọghẹnẹ vwo djobọte Soten?
Tavwen wọ ke dia ugbeyan rẹ ohwo, wọ cha riẹn odẹ rẹ ohwo na. Se Jems 4:8a, ovwan ta ota kpahen enọ nana:
-
Edurhie vọ yen Jihova vwọ kẹ wẹ?
-
Wọ da riẹn odẹ rẹ Ọghẹnẹ je reyọ vwo ruiruo, mavọ yen ọnana se vwo si we kẹrẹ?
IHWO EVO TA: “Ọghẹnẹ vuọvo yen herọ, ọtiọyena otoro odẹ wo sere-e.”
-
O muwẹro nẹ Jihova yen odẹ rẹ Ọghẹnẹ?
-
Mavọ wo se vwo djephia nẹ Jihova guọnọre nẹ avwanre reyọ odẹ rọyen vwo ruiruo?
ỌDJẸKOKO
Jihova yen odẹ rẹ Ọghẹnẹ rẹ uyota na. Ọ guọnọre nẹ avwanre riẹn odẹ na je reyọ vwo ruiruo e se vwo sikẹrẹ.
Ẹrhomafuẹrẹn
-
Idjerhe vọ yen Jihova vwọ fẹnẹ eghẹnẹ efa?
-
Diesorọ o vwo fo nẹ avwanre reyọ odẹ rẹ Ọghẹnẹ vwo ruiruo?
-
Die yen djerephia nẹ Jihova guọnọre nẹ avwanre sikẹrẹ ọyen?
HIẸ GUỌNỌ
Fuẹrẹn erọnvwọn iyorin ri djerephia nẹ Ọghẹnẹ ghini herọ.
Roro kpahen erọnvwọn evo ri djerephia nẹ Ọghẹnẹ ghini herọ.
Yono oboresorọ o vwo fo nẹ e se odẹ rẹ Ọghẹnẹ, dede nẹ a ghwa riẹn oborẹ ihwo awanre sere wa-an.
Otoro odẹ re se Ọghẹnẹ? Mrẹ oboresorọ a vwọ tanẹ o vwo oderhi vuọvo.
a Wọ da guọnọ evuẹ efa kpahen oborẹ odẹ rẹ Ọghẹnẹ mudiaphiyọ vẹ oboresorọ efanfan ri Baibol evo vwo si odẹ na no, ni Appendix A4 rọhẹ New World Translation of the Holy Scriptures.
Wọ je sa Fuẹrẹn
ENỌ REDJE ẸNẸNỌ
Die Yen Uyono ri Baibol rẹ Iseri ri Jihova Vwo Muẹ kẹ Ihwo?
Vwẹ uyono ri Baibol ọphẹ rẹ Iseri ri Jihova vwo muẹ kẹ ihwo na, wọ sa reyọ kefanfan kefanfan ri Baibol ro je we vwo ruiruo. Wo se durhie ihwo rẹ orua wẹn eje yẹrẹ kugbeyan kugbeyan ru wọ guọnọre odedede.
