YOOSOMA 04
Muluku taani?
Mweekhaikhai ovinya ehuhu apattuxiwaaya atthu, annakokhoreliwa amuluku eethiru. Mene Biblya onnamuthaliha Muluku yoowo ori “mutokwene opwaha miluku sothene.” (2 Sowereya 2:4 [2:5, Tradução do Novo Mundo]) Mulukweene yoowo taani? Mwaha wa heeni owo oraiye mutokweene opwaha miluku sootheene? Owo ontthuna weera nyuwo mmusuwele. Ninkela woona mwa yoosomeene yeela.
1. Muluku nsina nawe taani? Ni ti heeni enoonihera weera owo ontthuna weera musuwele nsina nawe?
Mbiblyani, onnahima mwaneene nsina nawe eeraka: “Miyo kà Yahvéh, nla ti nsina naka.” (Mmusome Yesaya 42:5, 8.) “Yehova” nsina na Muluku va eHeeberini. Nsina nno nintaphulela weera owo “onimweeriha okhala etthu ontthunawe.” Yehova ontthuna weera nyuwo musuwele nsina nawe. (Ottimula 3:15) Ninrowa ororomela hayi eyo? Emaara alempwaawe Biblya noovareliwa muteko nsina na Muluku ikwaha soopwaha 7.000! a Atthu antxipale annamwiitthana okhala Muluku a “Miluku” naari annavarela muteko maitthaneliwo ntoko “Apwiya,” “Mpattuxa” ni òwerya sothesene.” Mene Muluku eekhaikhai “Muluku osulú weiwe wirimu ni wenno vathi vava” khaavo onlikana ni Yehova.—Olaleya 4:39.
2. Biblya onhima heeni sa Yehova?
Atthu annaakokhorela amiluku antxipale, mene Biblya onnahima weera Yehova paahi toori Muluku eekhaikhai. Mwaha wa heeni onhimaawe hiiho? Aakhala mathowa mantxipale. Khaavo orinono owera wompwaha Yehova ni ti yeeyo osuweliwaawe okhala “Namusulú velaponi vothene.” (Musome Nsalmu 83:19 [83:18, NM].) Owo ‘nanwera sootheene’ mwaha wooweera okhalano owera woopaka etthu ontthunaawe. Owo ‘òpattuxa sothesene’—siri wiirimu ni elapo ya vathi. (Apokalise 4:8, 11) Yehova meekhaawe tokhanle wookhala, ni onnakhala mahiku ootheene.—Nsalmu 90:2.
WEERA MUXUTTERE SINTXIPALE
Muxuttere ovirikana okhanle variyari va maitthaneliwo a Muluku ni nsina nawe nihinlikana ni nsina nikina. Moone tho moota Muluku oosuwelihaaweni nsina nawe ni mwaha wa heeni opankaawe eyo.
3. Muluku ookhalano maitthaneliwo mantxipale, mene orinono nsina nimoha
Wookhala ovirikana eriyari ya maitthaneliwo a mutthu ni nsina nawe? Weera noone waakhuliwa waya, moone EVIIDIYU, avinyaka mutthekule ni epontu enttharelana
-
Ovirikana heeni okhanle eriyari ya nsina ni maitthaneliwo, ntoko “Apwiya”?
Biblya onnahima weera atthu annaakokhorela miluku sintxipale ni asipwiya antxipale. Musome Nsalmu 136:1-3, ni avinyaka mutthekule ni epontu enttharelana:
-
Taani ori “Muluku a miluku” ni “Pwiya àsipwiya”?
4. Nto Yehova ontthuna weera musuwele nsina nawe ni nvareleke muteko
Etthu heeni enoonihera weera Yehova ontthuna weera musuwele nsina nawe? Moone EVIIDIYU, ni avinyaka mutthekule ni ipontu sinttharelana
-
Mwaha wa heeni munonaanyu weera Yehova ontthuna weera atthu esuwele nsina nawe?
Yehova ontthuna weera atthu evareleke muteko nsina nawe. Mmusome Aroma 10:13, ni avinyaka mutthekule ni ipontu sinttharelana:
-
Heeni oraaya wootthuneya ovarela muteko nsina na Yehova?
-
Nyuwo munoonela hayi mutthu mukina uupuwelaka nsina nanyu?
-
Yehova onoonela hayi nyuwo mwaavarelaka muteko nsina nawe?
5. Yehova ontthuna weera nyuwo mmwaattameleke
Moone yooweereya ya muthiyana mmoha oCamboja onnitthaniwa Soten. Owo enre owera osuwela nsina na Muluku ni yootaphulelaaya “yaari etthu yootthuneya mweekumini mwaka.” Moone EVIIDIYU, avinyaka mutthekule ni epontu enttharelana
-
Moota heeni ekumi ya Soten yaatxentxalaaya mwaha woosuwela nsina na Muluku??
Mwaatthunaka okhala nthamwene a mutthu muhimusuwenlaanyu, etthu yoopatxera muntthuneyaanyu opaka ori osuwela nsina nawe. Mmusome Yakobe 4:8a, ni avinyaka mutthekule ni ipontu sinttharelana:
-
Yehova onoovekelani opaka eheeni?
-
Moota heeni osuwela ni ovarela muteko nsina na Muluku oneeraaya wookhavihereni omwattamela?
ATTHU AKINA ANEERA: “Muluku ori mmoha paahi. Nto khonhiyana moota mwimwiitthanaanyu.”
-
Neereke nyuwo munnaroromela nsina na Yehova?
-
Muluku ontthuna weera atthu evareleke muteko nsina nawe. Nyuwo munkela waaleela hayi eyo atthu akina?
NYAHA SOOTTHUNEYA
Yehova nsina na Muluku mmoha eekhaikhai. Owo ontthuna weera atthu emwaattameleke. Mwa yeeyo ti vootthuneya osuwela ni ovarela muteko nsina na Yehova.
Wuuluula
-
Mwaha wa heeni Yehova ovirikannaawe ni amiluku akina?
-
Mwaha wa heeni oraaya wootthuneya ovarela muteko nsina na Muluku?
-
Etthu heeni enoonihera weera Yehova ontthuna weera mmwaattameleke?
WEERA MUSUWELE ITTHU SINTXIPALE
Moone itthu ithanu sinoonihera weera Muluku ookhala
Moone mwaha wa heeni oraaya wootthuneya ororomela weera Muluku ookhala.
“Taani ompattunxe Muluku?” (A Sentinela, 1.º a Agosto a 2014)
Khanisuwenle moota niitthaniwaaya nsina na Muluku ehuhu ya khalayi. Nnaamweera vareene hiiho onnatthuneya oxuttera ni ovarela muteko nsina nawe.
Onnareerela omwiitthanela Muluku nsina nawe naari hooye? Moone mwaha wa heeni ninhimaahu weera Muluku orinono nsina nimoha paahi.
a Weera musuwele sintxipale sa nsina na Muluku ni mwaha wa heeni ninvexiwaayamo mBiblyani, mmoone Apêndice A4 a Tradução do Novo Mundo da Bíblia Sagrada.
