YOOSOMA 04
Muluku ti Pani?
Okhuma vaavale apattuxiwe aya apinaatamu, atthu annaakokhorela amuluku anceene. Masi Biibiliya onihimya wira Muluku eekeekhai ori mmosa paahi. Owo ti “mulupale wavikana amuluku othene”. (2 Wahala 2:5) Muluku xeeni owo? Xeeni ori awe muulupale waavikana amuluku akina? Muluku owo, oniphavela wira nyuwo mmusuwele. Nto yoosoma ela, ninrowa omusuwela Muluku eekeekhai.
1. Nsina na Muluku tinivi? Ninsuwela sai wira owo oniphavela wira nisuwele nsina nawe?
MBiibiliyani Muluku onnihimya nsina nawe. Owo onihimya so: “Miyo k’Apwiya [Yehova NWT], nsina naka ti nenla”. (Mmusome Yesaya 42:5, 8.) Nsina noowi “Yehova” ninkhuma elavulelo ya eHeeberi, nenno nintaphulela wira “Owo Onniiriha Okhala”. Yehova oniphavela wira nisuwele nsina nawe. (Okhuma 3:15) Exeeni ennikupaliha eyo? Etthu ennikupaliha, okhala wira Yehova ohiiriha olempwa nsina nawe mBiibiliyani ikwaha sinivikana 7.000! a (Nwehe enoota) Tthiri Muluku eekeekhai yoowo ori Muluku “okhuma osulu mpakha vathí-va” ookhalana nsina.—Otumererya 4:39.
2. Itthu xeeni Biibiliya onihimya awe sinimuromola Yehova?
Atthu annaakokhorela amuluku anceene, masi Biibiliya onihimya wira Yehova paahi tori Muluku eekeekhai. Etthu xeeni enniiriha ohimya siiso? Sookhala itthu sinceene sinniiriha ohimya eyo. Khuuvo mutthu orina okhulupale oninvikana Yehova. Maana Yehova tori ‘mulupalexa’ olumwenku wotheene. (Musome Esalimo 83:19.) Nave owo Muluku Oowerya Sotheene, maana ookhalana owerya woopaka khula etthu oniphavela awe. Muluku topattunxe “itthu sotheene” siri wiirimu ni itthu sotheene sikhanle valaponi. (Wiisuupulula 4:8, 11) Nave Yehova paahi tohirina wanipacerya nnakhala wanikisa, owo onikhala mahiku otheene.—Esalimo 90:2.
MWIIXUTTE ITTHU SIKINA
Nwehe ovirikana okhanle maihaneliwo a nttittimiho a Muluku ni nsina nawe. Nave nwehe moota Yehova oosuwelinhaaweni nsina nawe ni nthowa nimwiirinhe woosuwelihani.
3. Muluku ookhalana maihaneliwo manceene a nttittimiho, masi orina nsina nimosa paahi
Niireke wookhala ovirikana eriyari ya maihaneliwo a nttittimiho a mutthu ni nsina nawe? Wira nwehe waakhuliwa waya, nwehe EVIIDIYU, nuumala-vo mwaakhule nikoho ninttharelana.
-
Ovirikana xeeni okhanle eriyari ya mwiihaneliwo wa nttittimiho oowi “Apwiya” ni nsina?
Biibiliya onihimya wira apinaatamu annaakokhorela amuluku anceene ni mapwiya manceene. Musome Esalimo 136:1-3, nuumala-vo mwaakhule nikoho ninttharelana:
-
Tani ori “Muluku àmuluku” ni “Mwené a mamwene”?
4. Yehova oniphavela wira musuwele nsina nawe ni murumeeleke
Etthu xeeni enooniherya wira Yehova oniphavela wira musuwele nsina nawe? Nwehe EVIIDIYU, nuumala-vo mwaakhule makoho anittharelana.
-
Etthu xeeni enookupalihani wira Yehova oniphavela wira atthu asuwele nsina nawe? Mwaha wa xeeni?
Yehova oniphavela wira atthu arumeeleke nsina nawe. Mmusome aRoma 10:13, nuumala-vo mwaakhule makoho anittharelana:
-
Xeeni vari aya vooloka orumeela nsina na Yehova?
-
Nyuwo munoonela sai vaavo mutthu onsuwela awe ni onuupuwela awe nsina nanyu?
-
Yehova onoonela sai vaavo nyuwo munirumeela anyu nsina nawe?
5. Yehova oniphavela wira mukhale mpatthani awe
Nwehe yowiiraneya ya muthiyana a oCamboja oniihaniwa Soten. Owo ohimmye wira “osuwela nsina na Muluku ni ele nintaphulela aya etthu enimuhakalaliha vanceene”. Nwehe EVIIDIYU, nuumala-vo mwaakhule nikoho ninttharelana.
-
Ntoko yoonihenrye aya eviidiyu, okumi wa Soten waaturukeyale sai nuumala osuwela nsina na Muluku?
Muhinatthi okhala mpatthani a mutthu, wanipacerya muhaana osuwela nsina nawe. Mmusome Yakobo 4:8a, nuumala-vo mwaakhule makoho anittharelana:
-
Nlattulo xeeni Yehova onoovahaaweni?
-
Osuwela ni orumeela nsina na Muluku, onrowa wookhaliheryani sai okhala mpatthani awe?
ATTHU AKINA ANIHIMYA WIRA: “Muluku ori mmosa, nto khivanitthuneya oxanka ni moota womwiitthana”.
-
Niireke nyuwo munnikupali wira nsina na Muluku ti Yehova?
-
Muluku oniphavela wira nirumeeleke nsina nawe. Mwaarowa omutthokiherya sai mutthu mukina wira Muluku oniphavela wira nirumeeleke nsina nawe?
IPONTO SUULUPALE
Yehova ti nsina na Muluku eekeekhai. Owo oniphavela wira nikhale mpatthani awe. Nto ti vooloka osuwela ni orumeela nsina nawe.
Wuuluula
-
Yehova ovirikanne sai ni amuluku akina?
-
Xeeni vari aya vooloka orumeela nsina na Muluku?
-
Etthu xeeni enooniherya wira Yehova oniphavela wira mukhale mpatthani awe?
NWEHEE ITTHU SIKINA
Nwehe itthu 5 sinooniherya wira Muluku ookhala.
Nwehe etthu ennikupaliha wira Muluku khorina wanipacerya nnakhala wanikisa.
“Ti pani ompake Muluku?” (Owehaweha, 1 a Agosto, 2014)
Khaninsuwela moota khalai atthu yaaromola aya nsina na Muluku. Hata vari siiso, nwehe xeeni vari aya vooloka orumeela nsina na Muluku.
Niireke ti vooloka omwiitthana Muluku nirumeelaka nsina nawe? Nwehe itthu sinooniherya wira Muluku orina nsina nimosa paahi.
a Wira nwehe ele nintaphulela aya nsina na Muluku ni nthowa naya aBiibiliya akina anvitha aya nsina nlo mBiibiliyani, munwehe Apendise A4 a Tradução do Novo Mundo da Bíblia Sagrada.
